Jeremiya
17 “Cibi ca Juda cililembedwe acilembyo cabutale.
Cilisimbidwe acilembyo cadaimondi aamyoyo yabo
Alimwi aameja aazipaililo zyabo,
2 Ciindi bana babo nobayeeya zipaililo zyabo amisemu yabo yazisamu yakukomba*+
Iili kumbali aacisamu cifwefwema, atala aatulundu tulamfwu,+
3 Aazilundu zili musyokwe.
Lubono lwako, zintu zyako ziyandisi zyoonse ndiyoozyaaba kuti zisaalwe,+
Inzya, masena aako aakukombela akaambo kacibi cili muzilawo zyako zyoonse.+
4 Cakuliyandila uyakwaaba lukono lwako ndundakakupede.+
Alimwi mebo ndiyookupa kuti ubelekele basinkondonyoko mucisi ncotazyi,+
Nkaambo nywebo mwakapa kuti bukali bwangu buvwutuke mbuli mulilo.*+
Bunooyaka lyoonse mane kukabe kutamani.”
5 Mboobu mbwaamba Jehova:
“Ulisinganizyidwe muntu* uusyoma bantu balya maila,+
Alimwi ooyo uujisi moyo uuleya kuzwa kuli Jehova.
6 Uyooba mbuli cisamu cili buyo cilikke mucimpayuma.
Takabuboni bubotu bwaakusika,
Pele unookkala mumasena aalunda kasuko munkanda,
Munyika yamunyo iitakkalwi bantu.
8 Uyooba mbuli cisamu cisyangidwe kumbali aamaanzi,
Icitunga miyanda yancico kukalonga.
Takakumvwi kupya kwaakuboola,
Pele matuvwu aakwe anoofwefwema lyoonse.+
Mumwaka waciyumayuma takalibiliki pe,
Alimwi takaleki kuzyala micelo.
9 Moyo uleena* kwiinda cintu cimbi cili coonse alimwi ulapenzya kapati.*+
Ino nguni uukonzya kuuzyiba?
10 Mebo, nde Jehova, ndilalanga-langa moyo,+
Ndilalingula mizeezo yamukati mwini,*
Kuti muntu umwi aumwi ndimupe kweelana anzila zyakwe,
Kweelana amicelo yamilimo yakwe.+
Buyoomusiya mazuba aabuumi bwakwe kaacili akati,
Alimwi kumamanino uyooba ciyanga.”
12 Cuuno cabwami cabulemu icisumpukide kuzwa kumatalikilo,
Mbobusena bwacikombelo cesu.+
13 O Jehova, obulangizi bwa Israyeli,
Aabo boonse bakusiya bayakuusyigwa nsoni.
Aabo baleya kuzwa kulinduwe* bayoolembwa ansi mubulongo,+
Nkaambo basiya Jehova, ikasensa kamaanzi aabuumi.+
14 Kondiponya, O Jehova, eelyo ndilapona.
Kondifwutula, eelyo ndilafwutuka,+
Nkaambo yebo nduwe ngonditembaula.
15 Bona! Kuli bantu bandaambila kuti:
“Ino lili kuli jwi lya Jehova?+
Alizuzikizyigwe!”
16 Pele mebo kunyina nindakatija akuleka kukutobela mbuli mweembezi,
Alimwi tiindakabulombozya pe buzuba bwamapenzi.
Yebo ulaazyi majwi oonse aakazwa kumilomo yangu;
Oonse akaambwa kubusyu bwako!
17 Utabi cintu cindiyoosya.
Uli mayubilo aangu mubuzuba bwamapenzi.
18 Aabo bandipenzya abausyigwe nsoni,+
Pele mebo nditausyigwi nsoni pe.
Balo abayoowe,
Pele mebo nditayoowi pe.
19 Mboobu mbwaakandaambila Jehova: “Koya, ukaime mumulyango wabana babantu bangu ooyo bami ba Juda ngobabelesya nobanjila anobazwa, amumilyango ya Jerusalemu yoonse.+ 20 Ukabaambile kuti, ‘Amumvwe jwi lya Jehova, nywebo nobami ba Juda anobantu bamu Juda nyoonse anywebo nyoonse nomukkala mu Jerusalemu, nywebo nomunjilila mumilyango eeyi. 21 Mboobu mbwaamba Jehova: “Amucenjele, mutanyamuni mukuli uuli woonse mubuzuba bwa Sabata nokuba kuunjizya mumilyango ya Jerusalemu.+ 22 Tamweelede kuleta mukuli kuzwa mumaanda aanu mubuzuba bwa Sabata; alimwi tamweelede kucita mulimo uuli woonse pe.+ Mweelede kusalazya buzuba bwa Sabata, mbubonya mbondakabalailila bamauso.+ 23 Pele tiibakaswiilila pe nokuba kucenjeka matwi aabo, alimwi cankazi bakakaka* kumvwida naa kulaigwa.”’+
24 “‘“Nokuba boobo, ikuti naa mulomye kundimvwida,” mbwaamba Jehova, “alimwi ikuti mutaleti mukuli uuli woonse akuunjizya mumilyango yamunzi ooyu mubuzuba bwa Sabata alimwi ikuti naa mubusalazye buzuba bwa Sabata kwiinda mukutacita mulimo uuli woonse mulimbubo,+ 25 nkokuti bami alimwi abasilutwe ibakkala acuuno cabwami ca Davida+ bayoonjila mumilyango yamunzi ooyu, kabatantide munkalaki alimwi aamabbiza, balo abasilutwe babo, baalumi ba Juda abantu bakkala mu Jerusalemu;+ eelyo munzi ooyu unookkalwa bantu lyoonse mane kukabe kutamani. 26 Alimwi bantu bayooboola kuzwa muminzi ya Juda, kuzwa kumasena aayengelede Jerusalemu, kuzwa kucisi ca Benjamini,+ kuzwa kunyika iiyalene iili kunselelo,+ kuzwa kucooko camalundu alimwi akuzwa ku Negebi,* kabaleta zituuzyo zyuumpwa buumbulu,+ zipaizyo,+ zituuzyo zyamaila,+ tununkilizyo twalibano alimwi azipaizyo zyakulumba muŋanda ya Jehova.+
27 “‘“Pele kuti mutandimvwidi kwiinda mukutasalazya buzuba bwa Sabata alimwi akunyamuna mikuli akwiinjizya mumilyango ya Jerusalemu mubuzuba bwa Sabata, nkokuti ndiyoodoneka milyango yanguwo, eelyo mulilo uyoozyuumpa cakumaninina ngazi zikwabilidwe zyamu Jerusalemu,+ alimwi taukazimwi pe.”’”+