Milimo

9 Pele Saulo kacifwundilide kuyanda kupenzya akujaya basikwiiya ba Mwami,+ wakaunka kumupaizi mupati 2 akuyoomulomba magwalo aakutola kuzikombelo zyaku Damasiko ikutegwa aakujana bantu bali boonse, ibaalumi abamakaintu batobela Nzila Eeyi*+ akabajate akubaleta ku Jerusalemu kabaangidwe.

3 Lino naakali kweenda alimwi naakasika afwaafwi aku Damasiko, ndilyonya mumuni uuzwa kujulu wakamumwekela,+ 4 mpoonya wakawida ansi alimwi wakamvwa jwi kaliti kulinguwe: “Saulo, Saulo, ino undipenzyela nzi?” 5 Saulo wakabuzya kuti: “Ino nduwe ni, Mwami?” Wakati: “Ndime Jesu+ ooyo ngopenzya.+ 6 Nokuba boobo, nyamuka unjile mumunzi, eelyo uyakwaambilwa ncoyelede kucita.” 7 Lino baalumi mbaakali kweenda limwi bakabbwelemana buyo kabatakonzyi kwaambaula, mubwini nokuba kuti ijwi bakalimvwa, kunyina muntu ngobakabona pe.+ 8 Mpoonya Saulo wakanyamuka ansi, alimwi nokuba kuti meso aakwe akalijalukide, kunyina ncaakali kubona. Aboobo bakamujatilila kujanza akumunjizya mumunzi wa Damasiko. 9 Eelyo kwamazuba otatwe kunyina naakabona cintu cili coonse,+ alimwi tanaakali kulya nokuba kunywa.

10 Mu Damasiko mwakali sikwiiya umwi uutegwa Hananiya,+ eelyo mucilengaano Mwami wakamwiita wati: “Hananiya!” Wakaingula wati: “Mpondili Mwami.” 11 Mwami wakati kulinguwe: “Nyamuka uunke kunzila iitegwa Iimvwi Nci, eelyo waakusika kuŋanda ya Judasi ukalombe kubonana amuntu uutegwa Saulo uuzwa ku Tarso.+ Nkaambo bona ulapaila, 12 alimwi mucilengaano wabona mwaalumi uutegwa Hananiya iwanjila akubikka maanza aalinguwe kutegwa atalike kubona.”+ 13 Pele Hananiya wakaingula kuti: “O Mwami, mbanji mbondamvwa kabaamba zyamwaalumi ooyu, zintu zyoonse zibi nzyaakacita kubasalali bako mu Jerusalemu. 14 Alimwi akokuno basilutwe babapaizi bakamupa nguzu zyakwaanga boonse aabo baita zina lyako.”+ 15 Pele Mwami wakati kulinguwe: “Koya buyo! Nkaambo mwaalumi ooyu ncibelesyo ncindasala+ kuti akaambilizye zina lyangu kuli bamasi+ akubami+ alimwi akubana ba Israyeli. 16 Nkaambo ndiyoomutondezya cakusalazya mbozili zinji zintu nzyayelede kupenga akaambo kazina lyangu.”+

17 Aboobo Hananiya wakaunka akuyoonjila muŋanda eeyo, alimwi wakabikka maanza aakwe alinguwe akwaamba kuti: “Saulo mukwesu, Mwami Jesu, uulya iwakalibonya kulinduwe munzila nookali kuboola kokuno wandituma kutegwa ukonzye kubona akuti uzuzyigwe muuya uusalala.”+ 18 Ndilyonya eelyo mumeso aakwe mwakaloka izilibonya mbuli makwa aanswi, mpoonya wakatalika kubona. Kumane wakanyamuka akubbapatizyigwa, 19 eelyo wakalya cakulya akuba anguzu.

Wakakkala kwamazuba aali mbwaabede abasikwiiya ku Damasiko,+ 20 alimwi ndilyonya eelyo wakatalika kukambauka muzikombelo kujatikizya Jesu kuti ooyu Mwana wa Leza. 21 Pele aabo boonse ibakali kumuswiilila bakagambwa kapati alimwi bakali kwaamba kuti: “Sena ooyu tali ngomwaalumi uulya iwakabapenzya kapati aabo bali mu Jerusalemu ibaita zina eeli?+ Sena tanaakaboola kuno kajisi makanze aakuti abaange akubatola* kuli basilutwe babapaizi?”+ 22 Pele Saulo wakazumanana kuba anguzu zinji kapati alimwi wakali kubazula ba Juda ibakali kukkala mu Damasiko naakali kupa bumboni busalede bwakuti ooyu ngo Kristo.+

23 Lino nokwakainda mazuba manji, ba Juda bakapangana kuti bamujaye.+ 24 Nokuba boobo, Saulo wakaazyiba makanze aabo. Bakali kulindilila akumilyango yamunzi isyikati amasiku kutegwa bamubona bamujaye. 25 Aboobo masiku basikwiiya bakwe bakamubikka mumutaanga akumwiinzya acipulo cabwaanda bamuselusizya kunze.+

26 Naakasika mu Jerusalemu+ wakasoleka kulisanganya kuli basikwiiya, pele boonse bakali kumuyoowa nkaambo tiibakasyoma kuti wakali sikwiiya awalo. 27 Aboobo Barnaba+ wakamubweza akumutola kubaapostolo, alimwi ooko wakabapandulwida Saulo mbwaakabona Mwami munzila,+ akuti wakaambaula anguwe, alimwi ambwaakakambauka cabusicamba muzina lya Jesu ku Damasiko.+ 28 Eelyo wakazumanana kukkala ambabo, kaangulukide kweendeenda* mu Jerusalemu akwaambaula cabusicamba muzina lya Mwami. 29 Wakali kubandika akukazyanya aba Juda baambaula Chigiriki, pele aaba bakali kusoleka kumujaya.+ 30 Lino bakwesu nobakazyiba makani aaya, bakamuleta ku Kaisareya akumutumina ku Tarso.+

31 Mpoonya mbungano mu Judaya, mu Galilaya amu Samariya+ moonse yakaba muluumuno alimwi yakali kuyumizyigwa; mpoonya akaambo kakuti yakali kweenda cakuyoowa Jehova* amuluumbulizyo lwamuuya uusalala,+ yakazumanana kuyungizyigwa.

32 Lino Petro naakali kuyaabweenda mucooko coonse, wakasika akubasalali ibakali kukkala ku Luda.+ 33 Ooko wakajana mwaalumi umwi uutegwa Eneya, ooyo watakali kukonzya kubuka abulo kwamyaka iili lusele nkaambo wakalebukide mubili. 34 Eelyo Petro wakati kulinguwe: “Eneya, Jesu Kristo wakuponya.+ Kobuka uyale bulo bwako.”+ Eelyo wakabuka mpoonya aawo. 35 Lino boonse aabo ibakali kukkala mu Luda amu Cibanda ca Saroni nobakamubona, bakatalika kusyoma Mwami.

36 Lino mu Jopa kwakali sikwiiya umwi uutegwa Tabita, ilyaamba kuti “Dorika”* lyasandululwa. Wakali kucitila bamwi milimo mibotu minji alimwi akupa zipego zyaluse. 37 Pele kumazuba aayo wakaciswa akufwa. Aboobo bakausanzya mubili wakwe akuulazika muŋanda yamujulu. 38 Lino mbwaanga munzi wa Luda wakali afwaafwi aku Jopa, basikwiiya nobakamvwa kuti Petro wakali mumunzi ooyo, bakatuma baalumi bobilo kuyoomulomba kuti: “Twakomba kaka ufwambaane kuboola kulindiswe.” 39 Naakamvwa boobo Petro wakanyamuka akuunka ambabo. Eelyo naakaakusika ooko, bakamutola muŋanda yamujulu; alimwi bamukabafwu boonse bakaboola kulinguwe kabalila akumutondezya zisani azikobela* zinji Dorika nzyaakali kubasumina naakacili ambabo. 40 Mpoonya Petro wakabaambila kuti bazwe anze boonse,+ kumane wakafwugama akupaila. Mpoonya wakacengulukila kwakali mubili akwaamba kuti: “Tabita, buka!” Wakajalula meso aakwe alimwi mbwaakamubonena buyo Petro, wakabuka akukkala.+ 41 Petro wakamujata ajanza lyakwe akumwiimikizya, alimwi wakaita basalali abamukabafwu akubatondezya kuti Tabita muumi.+ 42 Aboobo makani aaya akazyibwa mu Jopa moonse, alimwi banji bakatalika kusyoma mu Mwami.+ 43 Kwamazuba manji Petro wakakkala mu Jopa amusuki wazipaya umwi uutegwa Simoni.+