1 Bakorinto
12 Lino kujatikizya zipego zyamuuya+ bakwesu, tandiyandi kuti nywebo kamutakwe luzyibo mumakani aaya. 2 Mulizyi kuti nomwakacili bantu bakunyika, mwakali kuyungwa akweenwa kuti mutobele mituni eeyo iitaambauli,+ mwakali kuunka kufwumbwa nkoimusololela. 3 Lino ndiyanda kuti nywebo muzyibe kuti kunyina muntu ooyo waambaula kwiinda mumuuya wa Leza waamba kuti: “Jesu ulisinganizyidwe!” alimwi kunyina uunga waamba kuti: “Jesu Mwami!” ccita buyo kwiinda mumuuya uusalala.+
4 Lino kuli zipego ziindene-indene, pele kuli buyo muuya omwe;+ 5 alimwi kuli milimo yiindene-indene,+ pele kuli buyo Mwami omwe; 6 alimwi kuli nzila zyakubeleka ziindene-indene, pele Leza ngumwi buyo ooyo uucita zintu eezyi zyoonse mubantu boonse.+ 7 Pele zipego zyamuuya zilapegwa kumuntu umwi aumwi kutegwa zibeleke mulimo uugwasya.+ 8 Nkaambo, kwiinda mumuuya muntu umwi upegwa busongo mukwaambaula,* umbi upegwa luzyibo mukwaambaula kuzwa kumuuya omwe nguwenya, 9 umbi upegwa lusyomo+ kuzwa kumuuya omwe nguwenya, umbi upegwa zipego zyakuponya+ kuzwa kumuuya ooyo omwe, 10 umbi upegwa nguzu zyakucita milimo mipati,+ umbi upegwa nguzu zyakusinsima, umbi upegwa nguzu zyakuzyiba majwi aakasololelwa amuuya,+ umbi upegwa nguzu zyakwaambaula myaambo* yiindene-indene,+ alimwi umbi upegwa nguzu zyakupandulula myaambo yiindene-indene.+ 11 Pele milimo yoonse eeyi ilacitwa amuuya omwe nguwenya ooyu, uupa zipego eezyi kuli umwi aumwi kumugama kweelana ambouyanda.
12 Nkaambo mbubonya mubili mbouli omwe pele ujisi zizo zinji, alimwi zizo zyoonse izyamubili ooyo nokuba kuti nzinji, mubili omwe,+ awalo Kristo mbwabede oobo. 13 Nkaambo kwiinda mumuuya omwe toonse twakabbapatizyigwa mumubili omwe, kufwumbwa naa tuli ba Juda naa iba Giriki, bazike naa baangulukide, alimwi toonse twakanywisyigwa muuya omwe.
14 Nkaambo ncobeni mubili taupangidwe acizo comwe pe, pele upangidwe azizo zinji.+ 15 Ikuti kuulu kwaamba kuti, “Akaambo kakuti tandili janza, mebo tandili cibeela camubili pe,” aaka kaambo takakonzyi kupa kuti kuulu kutabi cibeela camubili pe. 16 Alimwi ikuti kutwi kwaamba kuti, “Akaambo kakuti tandili liso, mebo tandili cibeela camubili pe,” aaka kaambo takakonzyi kupa kuti kutwi kutabi cibeela camubili pe. 17 Ikuti mubili woonse nowali liso, ino notwali kuswiilila buti? Ikuti mubili woonse nowali kutwi, ino notwali kununkizya buti? 18 Pele lino Leza wakabikka cizo cimwi acimwi mumubili, kweelana ambwaakayanda.
19 Ikuti zyoonse nozyali cizo comwe, ino mubili nowali kuli? 20 Pele lino zizo nzinji, nokuba boobo mubili ngumwi. 21 Liso talikonzyi kwaambila janza kuti: “Tokwe mulimo kulindime”; alimwi mutwe taukonzyi kwaambila maulu kuti: “Tamukwe mulimo kulindime.” 22 Muciindi caboobo, izizo zyamubili izilibonya mbuli kuti tazijisi nguzu zilayandika, 23 alimwi izibeela zyamubili nzyotuyeeyela kuti tazilemekwi kapati, eezyi tulazilemeka kapati,+ aboobo izizo zyesu izitalibonyi kabotu zilalemekwa kapati, 24 kakuli zizo zyesu izyeebeka taziyandiki cintu cili coonse. Nokuba boobo, Leza wakabamba mubili akupa bulemu bunji kucibeela cakabulide, 25 kutegwa kutabi kwaandaana mumubili, pele kuti zizo zyanguwo kazibikkilana maano.+ 26 Ikuti naa cizo cimwi capenga, zizonyina zyoonse zipengela antoomwe ancico;+ naa ikuti cizo cimwi calemekwa, zizonyina zyoonse zilakkomana ancico.+
27 Lino nywebo muli mubili wa Kristo+ azizo zyanguwo ziindene-indene.+ 28 Alimwi Leza wabikka bantu baindene-indene mumbungano: bakusaanguna mbaapostolo;+ babili mbasinsimi;+ batatu mbaamayi;+ mpoonya bacita milimo mipati;+ ibajisi zipego zyakuponya;+ ibacita milimo iigwasya; ibajisi luzyibo lwakweendelezya;+ abaambaula mumyaambo yiindene-indene.+ 29 Sena boonse mbaapostolo? Sena boonse mbasinsimi? Sena boonse mbaamayi? Sena boonse balacita milimo mipati? 30 Sena boonse balijisi zipego zyakuponya? Sena boonse balaambaula mumyaambo yiindene-indene?+ Sena boonse mbasanduluzi?+ 31 Pele amuzumanane kuyandaula zipego zipati cabusungu.+ Nokuba boobo, ndilamutondezya nzila yiinda zyoonse.+