1 Petro

4 Mbwaanga Kristo wakapenga mumubili wanyama,+ andinywe amuliyumye amuzeezo* ngoonya ooyu; nkaambo muntu iwapenga mumubili wanyama wazileka zibi,+ 2 ikutegwa kuciindi cisyeede nacili mumubili wanyama ataponi limbi kweelana azisusi zyabantu,+ pele aponene kucita kuyanda kwa Leza.+ 3 Nkaambo musyule oomu mwakajisi ciindi cinji cakucita kuyanda kwabamasi+ nimwakali kweenda mubukkale busesemya,* muluunyaunya lwakutalijata, mukuciindizya kunywa makoko, mumapobwe aateendelezyeki, mukuzundana kunywa makoko amukukomba mituni kukasyidwe amulawo.+ 4 Balakopana nobabona kuti tamucibaliki ambabo mubukkale oobu busofweede bwabutaka, aboobo balamusampaula.+ 5 Pele bantu aaba bayoolyaambilila kuli yooyo uulibambilide kubeteka baumi abafwide.+ 6 Mubwini, nkakaambo kaako makani mabotu ncaakaambilizyigwa akubafwu,+ ikutegwa, nokuba kuti balabetekwa mumubili mumeso aabantu, bakonzye kupona kweelana amuuya mumeso aa Leza.

7 Pele mamanino aazintu zyoonse aswena afwaafwi. Aboobo amulibatamike+ akupakamana kujatikizya mipailo.+ 8 Ikwaambisya, amuyandane kapati,+ nkaambo luyando lulavwumba zibi zinji kapati.+ 9 Amusamausyanye kakunyina kutongooka.+ 10 Kweelana acipego umwi aumwi ncaakatambula, amucibelesye mukubelekelana mbuli babanzi babotu baluzyalo lwa Leza ilutondezyegwa munzila ziindene-indene.+ 11 Ikuti naa kuli uukanana, aakanane mbuli yooyo waamba majwi aazwa kuli Leza; ikuti naa kuli uubeleka, abeleke kasyomede nguzu nzyapa Leza;+ kutegwa muzintu zyoonse Leza akonzye kulemekwa+ kwiinda muli Jesu Kristo. Ibulemu anguzu nzizyakwe lyoonse mane kukabe kutamani. Ameni.

12 Nobayandwa, mutagambwi pe akaambo kamapenzi aali mbuli mulilo ngomujisi lino,+ mbuli kuti mucitikilwa cintu ceenzu. 13 Muciindi caboobo, amuzumanane kukondwa+ nkaambo andinywe mulaalubazu mumapenzi aa Kristo,+ ikutegwa alimwi mukakondwe akusekelela kapati kuciindi cakuyubununwa kwabulemu bwakwe.+ 14 Ikuti naa kamusampaulwa* akaambo kazina lya Kristo, mulakkomana,+ nkaambo muuya wabulemu, nkokuti imuuya wa Leza, ulaalindinywe.

15 Pele, kutabi muntu naba omwe akati kanu uupenga akaambo kakuba mujayi naa mubbi naa sizibi naa uunjililila mumakani aabantu bamwi.+ 16 Pele ikuti umwi wapenga akaambo kakuti Munakristo, atafwi nsoni pe,+ pele azumanane kulemeka Leza najisi zina eeli. 17 Nkaambo ecino nceciindi cibikkidwe cakuti lubeta lutalikile aŋanda ya Leza.+ Lino ikuti naa lwatalikila alindiswe,+ ino ciyooba buti kuli baabo ibataswiilili makani mabotu aa Leza?+ 18 “Alimwi ikuti naa mululami ulafwutuka cakukatazyigwa, ino ncinzi ciyoocitikila sikusampaula Leza alimwi asizibi?”+ 19 Aboobo, aabo ibapenga kweelana akuyanda kwa Leza abazumanane kulibikka* mumaanza aa Mulengi uusyomeka kwiinda mukuzumanana kucita zibotu.+