Zekariya
11 “Kojalula milyango yako, yebo O Lebano,
Kutegwa mulilo uumpe zisamu zyako zyakkedari.
2 Kolila, yebo ocisamu camulombe, nkaambo cisamu cakkedari cawa;
Zisamu zipati zyanyonyoonwa!
Kamulila, nywebo nomasamu mapati aaku Basani,
Nkaambo coonde cisisinkene cagonkwa!
3 Amuswiilile! Kulila kwabeembezi,
Nkaambo bulemu bwabo bwamana.
Amuswiilile! Kuvwuluma kwabasyuumbwa bacili bana-bana,
Nkaambo zyoonde zisisinkene izili mumbali aamulonga wa Jordano zyanyonyoonwa.
4 “Mboobu mbwaamba Jehova Leza wangu, ‘Koembela butanga bwambelele izyuunka kukujaigwa,+ 5 oobo ibujaigwa abasikuzyuula+ kakunyina kupegwa mulandu. Abalo aabo bazisambala+ baamba kuti, “Aatembaulwe Jehova, nkaambo mebo ndilaba muvwubi.” Alimwi beembezi banzizyo kunyina nobazifwida lubomba.’+
6 “‘Nkaambo tandikabafwidi limbi lubomba bantu bakkala mucisi eeci,’ mbwaamba Jehova. ‘Aboobo umwi aumwi wabo ndiyoomwaaba mumaanza aamweenzinyina amumaanza aamwami wakwe; aboobo bayoopwayaula cisi coonse, pele mebo tandikabavwuni pe mumaanza aabo.’”
7 Ndakatalika kumweembelela butanga bwambelele izyuunka kukujaigwa,+ nywebo nombelele zyamubutanga zipenzyegwa. Aboobo ndakabweza misako yobilo, kumane umwi ndakawiita kuti Bubotu, mpoonya uumbi ndakawiita kuti Lukamantano,+ aboobo ndakatalika kweembela butanga bwambelele. 8 Mpoonya ndakatanda beembezi botatwe mumwezi omwe, nkaambo bakandicima alimwi abalo bakandisesemwa. 9 Ndakati: “Tandikoozumanana kumweembela nywebo pe. Ooyo uufwa, kafwa buyo. Ayooyo uuloba, kaloba buyo. Mpoonya aabo basyeede, umwi aumwi wabo alye nyama yamweenzinyina.” 10 Aboobo ndakabweza musako wangu uutegwa Bubotu akuutyola,+ ikutondezya kuti ndajaya cizuminano cangu ncondakapangana abantu boonse. 11 Aboobo cakafwa mubuzuba oobo, eelyo munzila eeyi mbelele zipenzyegwa zyamubutanga bwambelele izyakali kundilangilila zyakazyiba kuti lyakali jwi lya Jehova.
12 Mpoonya ndakabaambila kuti: “Ikuti kacili kabotu mumeso aanu, amundipe zyakuvwola zyangu; pele ikuti kacitali kabotu, mutandipi pe.” Aboobo bakandipa* zyakuvwola zyangu, imali aansiliva aali 30.+
13 Eelyo Jehova wakandaambila kuti: “Koasowela muciyobwedo calubono—imuulo ooyo mupati ngobakali kuyeeyela kuti ngomuulo wangu.”+ Aboobo ndakabweza mali aayo aansiliva aali 30 akwaasowela muciyobwedo calubono kuŋanda ya Jehova.+
14 Mpoonya ndakatyola musako wangu wabili iwiitwa kuti Lukamantano,+ ikutondezya kuti ndanyonyoona bunyina ibuli akati ka Juda a Israyeli.+
15 Kumane Jehova wakandaambila kuti: “Lino kozibweza zibelesyo zyamweembezi wabuyo.+ 16 Nkaambo ndilabusya mweembezi mucisi. Takazibikkili maano mbelele eezyo zinyonyooka;+ kunyina nayooyandaula bana bambelele, naa kuponya mbelele zityokede+ nokuba kusanina zyeezyo zikonzya kwiimikila. Muciindi caboobo, ulya nyama yambelele iineneede+ alimwi ukwamauna nsumba zyambelele.+
17 Maawe kumweembezi wangu wabuyo,+ ooyo uusiya butanga!+
Ipanga liyooyasa janza lyakwe alimwi aliso lyakwe lyalulyo.
Ijanza lyakwe liyoonyana lyoonse buyo,
Alyalo liso lyakwe lyalulyo liyakoofwaala akufwidilila.”