2 Makani
16 Mumwaka wa 36 wabulelo bwa Asa, Mwami Basa+ wa Israyeli wakaboola kulwana Juda akutalika kuyaka* bulambo kuzinguluka Rama+ kutegwa kutabi muntu uuzwa naa uuboola ku* Mwami Asa wa Juda.+ 2 Eelyo Asa wakagwisya nsiliva angolida kuzwa muziyobwedo zyamuŋanda ya Jehova+ azyaŋanda yamwami akuzituma ku Mwami Beni-hadadi wa Siriya+ iwakali kukkala ku Damasiko, kati: 3 “Kuli cizuminano akati kandime anduwe alimwi aakati kataata auso. Ndilakutumina nsiliva angolida. Koboola, ujaye cizuminano ncookapangana a Mwami Basa wa Israyeli, ikutegwa andileke.”
4 Beni-hadadi wakamumvwida Mwami Asa alimwi wakatuma basilutwe bampi yakwe yabasikalumba kuyoolwana minzi ya Israyeli, eelyo bakazunda Iyoni,+ Dani,+ Abeli-maimu, aziyobwedo zyoonse zyamuminzi ya Nafutali.+ 5 Lino Basa naakaamvwa makani aaya, mpoonya-mpoonya wakacileka kuyaka* Rama. 6 Mpoonya Mwami Asa wakayobolola ba Juda boonse, eelyo bakabweza mabwe azisamu zyaku Rama+ eezyo Basa nzyaakali kubelesya kuyaka,+ mpoonya wakazibelesya kuyaka* Geba+ alimwi a Mizipa.+
7 Kuciindi eeco Hanani+ sikubona zyakumbele wakaboola ku Mwami Asa wa Juda akumwaambila kuti: “Akaambo kakuti wakasyoma* mwami wa Siriya muciindi cakusyoma* Jehova Leza wako, impi yabasikalumamba yamwami wa Siriya yaloboka mumaanza aako.+ 8 Sena bana Etiopiya abana Libya tiibakali mpi mpati yabasikalumamba, kabajisi nkalaki zinji abasimabbiza banji? Pele akaambo kakuti wakasyoma Jehova, sena tanaakabaaba mumaanza aako?+ 9 Nkaambo meso aa Jehova alalanga-langa munyika yoonse+ kutegwa atondezye nguzu* zyakwe ikugwasya baabo bamusyoma camoyo woonse.*+ Yebo wacita cabufwubafwuba mumakani aaya; kuzwa sunu unoosikilwa nkondo.”+
10 Nokuba boobo Asa wakanyema akaambo kasikubona zyakumbele ooyo alimwi wakamubikka muntolongo* nkaambo wakakalala akaambo kamakani aaya. Mpoonya Asa wakatalika kupenzya abantu bambi aciindi nciconya eeco. 11 Lino makani oonse aakaindi aamba zya Asa, kuzwa kumatalikilo kusikila kumamanino alilembedwe mu Bbuku lyamakani aamba zyamazuba aa Bami baba Juda ababana Israyeli.+
12 Lino mumwaka wa 39 wabulelo bwakwe, Asa wakaciswa bulwazi bwamaulu mane limwi wakaciswa kapati; pele nomuba mukuciswa kwakwe, tanaakayandaula Jehova pe, pele wakaunka kubasilisi. 13 Kumane Asa wakoona abamausyi;+ wakafwa mumwaka wa 41 wabulelo bwakwe. 14 Aboobo bakamuzikka mubusena bwakwe bulemekwa bwakuzikkila mbwaakasya mu Munzi wa Davida,+ eelyo bakamulazika abulo bwakwe ibwakatilidwe mafwuta aamabbona amafwuta aambi aamisyobo misyobo aakasanganizyidwe kabotu.+ Kuyungizya waawo bakakunka bbibi lyamulilo* adilwe lyakwe.