2 Bami
5 Lino Naamani silutwe wampi yabasikalumamba yamwami wa Siriya wakaba muntu uulemekwa alimwi uuyandika kapati kumwami wakwe, nkaambo kwiinda mulinguwe Jehova wakapa bana Siriya luzundo.* Wakali sikalumamba singuzu nokuba kuti wakali sicinsenda.* 2 Bana Siriya nobakaunkide kuyoosaala nyika ya Israyeli aciindi cimwi, bakabweza kasimbi kamwi mubuzike ikakaba kabelesi kamukaintu wa Naamani. 3 Kasimbi aaka kakaambila namalelo wankako kuti: “Inga cabota kuti simalelaangu waunka kumusinsimi+ uuli mu Samariya! Eelyo ulakonzya kumuponya cinsenda cakwe.”+ 4 Aboobo wakaunka* kuyakwaambila simalelaakwe kuti: “Mboobu aboobu mbukaamba kasimbi kazwa kunyika ya Israyeli.”
5 Mpoonya mwami wa Siriya wakati: “Mbubo koya! Alimwi ndilatuma alugwalo kumwami wa Israyeli.” Aboobo wakaunka akutolelezya amatalenta* aansiliva aali 10, ngolida iilema masyekeli aali 6,000 alimwi azisani zili 10. 6 Wakalutola lugwalo kumwami wa Israyeli, ilwakalembedwe kuti: “Aciindi nciconya eeco nolwasika lugwalo kulinduwe, ndatuma amubelesi wangu Naamani kutegwa umuponye cinsenda cakwe.” 7 Lino mwami wa Israyeli mbwaakalubalila buyo lugwalo oolo, wakazapula zisani zyakwe akwaamba kuti: “Sena mebo ndime Leza uukonzya kujaya akuponya?+ Nkaambo watuma muntu ooyu kulindime kuti ndimuponye cinsenda cakwe! Mwalibonena kuti muntu ooyu uyanda kuti tuzwangane.”
8 Pele Elisha muntu wa Leza mwini-mwini mbwaakamvwida buyo kuti mwami wa Israyeli wazapula zisani zyakwe, wakatumya mulomo kumwami kuyoomubuzya kuti: “Ino nkaambo nzi ncoozapwida zisani zyako? Muntu ooyo kaboola kulindime kutegwa azyibe kuti kuli musinsimi mu Israyeli.”+ 9 Aboobo Naamani wakaboola amabbiza aakwe alimwi ankalaki zyakwe zyankondo akwiima amulyango waŋanda ya Elisha. 10 Pele Elisha wakatuma mutumwa kulinguwe kuyoomwaambila kuti: “Koya ukasambe ziindi zili ciloba+ mu Jordano+ kutegwa upone, eelyo ulasalala.” 11 Amvwe boobo Naamani wakanyema akutalika kupiluka kati: “Mebo ndali kuyeeya kuti, ‘Ulazwida anze akuboola kulindime akuzikwiima aano akwiita muzina lya Jehova Leza wakwe, kavwukauzya janza lyakwe atala aazilonda akundiponya cinsenda.’ 12 Sena milonga yaku Damasiko+ ya Abana a Faripara taili mibotu kwiinda maanzi oonse aamu Israyeli? Sena tandikonzyi kusamba mulinjiyo akusalala?” Mpoonya wakavwuuluka akuunka cabukali.
13 Babelesi bakwe bakamutobela akumwaambila kuti: “Taata, ikuti musinsimi naakwaambila kucita cintu cimwi cipati, sena nootacicita? Ino mbuti lino mbwaanga wakwaambila buyo kuti, ‘Kosamba kutegwa usalale’?” 14 Mpoonya wakaunka akuliwaala* mu Jordano ziindi zili ciloba kweelana ambwaakamwaambila muntu wa Leza mwini-mwini.+ Mpoonya wakapona+ alimwi lukanda lwakwe lwakapiluka akuba mbuli lwamwana muniini.+
15 Naakamana wakapiluka kumuntu wa Leza mwini-mwini,+ walo antoomwe abasikalumamba bakwe boonse,* akuunka waakwiima kumbele lyakwe akwaamba kuti: “Lino ndazyiba kuti taakwe Leza kubusena buli boonse anyika ccita buyo mu Israyeli.+ Lino ndakomba, tambula cipego* kuzwa kulindime ndemubelesi wako.” 16 Nokuba boobo, Elisha wakati: “Masimpe mbubonya Jehova ngondibelekela* mbwali muumi, tandikoocitambula pe.”+ Wakamukombelezya kuti acitambule, pele wakakaka. 17 Mpoonya Naamani wakati: “Mbookaka cipego, nkokuti kondipa ndemubelesi wako bulongo bukonzya kunyamunwa amamyuulu* obilo, nkaambo ndemubelesi wako kunyina nendiyootuula limbi cituuzyo cuumpwa naa cipaizyo kuli baleza bambi pe, pele buyo kuli Jehova. 18 Pele Jehova aandilekelele mebo ndemubelesi wako akaambo kaceeci: Simalelaangu nanjila muŋanda* ya Rimoni kuyookomba, janza lyangu ndelimutabilila aboobo andime ndeelede kukotama muŋanda ya Rimoni. Lyoonse ndakotama muŋanda ya Rimoni, Jehova aakandilekelele mebo ndemubelesi wako akaambo kaceeci.” 19 Mpoonya Elisha wakati kulinguwe: “Koya muluumuno.” Mbwaakaunkila buyo akweenda musinzo uuli mbuubede, 20 Gehazi+ mubelesi wa Elisha imuntu wa Leza mwini-mwini+ wakalyaambauzya kati: ‘Simalelaangu wamuleka buyo Naamani+ muna Siriya kakunyina kutambula cipego ncaaletede. Masimpe mbubonya Jehova mbwali muumi, mebo ndilamutobela kutegwa ndikabweze cintu cimwi kulinguwe.’ 21 Aboobo Gehazi wakatandila Naamani. Lino Naamani naakabona muntu uzyaabuzuza kaboola kulinguwe, mpoonya aawo wakaseluka munkalaki yakwe kuti aswaangane anguwe, eelyo wakati: “Mwati zintu zyoonse zili kabotu?” 22 Kumane Gehazi wakati: “Zyoonse zili buyo kabotu. Simalelaangu wandituma kuzikwaamba kuti, ‘Bona! Mboozwida buyo kwandiswaya balombe bobilo kuzwa kubana babasinsimi kumalundu aa Efraimu. Aboobo ndalomba ubape talenta lyansiliva azisani zyobilo.’”+ 23 Mpoonya Naamani wakati: “Koya, kobweza matalenta obilo.” Wakazumanana kumukombelezya+ mane wakamwaangila matalenta aansiliva obilo muzibbeeke zyobilo, azisani zyobilo mpoonya wakazipa kubabelesi bakwe bobilo kuti bamunyamwide Gehazi.
24 Naakasika ku Ofeli,* wakazibweza kuzwa kulimbabo akuzibikka muŋanda eelyo wakaambila baalumi aabo kuti baunke. Nobakaunka, 25 Gehazi wakaunka akuyakwiima kumbele lyasimalelaakwe. Lino Elisha wakamubuzya kuti: “Ino wazwa kuli Gehazi?” Pele walo wakati: “Tiindaunkide kuli koonse ndemubelesi wako.”+ 26 Mpoonya Elisha wakati kulinguwe: “Sena moyo wangu tiiwali ayebo ciindi Naamani naaseluka munkalaki yakwe kuti aswaangane anduwe? Sena eeci nciindi cakutambula nsiliva naa zisani naa myuunda yamaolifa naa myuunda yamisaansa naa mbelele naa ŋombe naa babelesi baalumi naa babelesi bakaintu?+ 27 Lino cinsenda ca Naamani+ cilaba alinduwe alunyungu lwako mane kukabe kutamani.” Mpoonya aawo Gehazi wakazwa kulinguwe, eelyo wakaba acinsenda cituba buu mbuli caanda.+