2 Makani
32 Nozyakainda zintu eezyi alimwi amilimo eeyi yakusyomeka,+ Mwami Sanakeribu wa Asuri wakaboola akusinkilila cisi ca Juda. Wakasinkilila minzi iikwabilidwe kajisi makanze aakunjila akwiibweza.+
2 Lino Hezekiya naakabona kuti Sanakeribu waboola amakanze aakulwana Jerusalemu, 3 naakamana kubuzya-buzya basilutwe bakwe alimwi abasikalumamba bakwe, wakasala kusinka tusensa twamaanzi twakali anze aamunzi,+ eelyo bakazuminana kucita oobo. 4 Bantu banji bakabungana antoomwe, eelyo bakatusinka tusensa toonse akalonga ikakali kwiinda mucisi cabo kabati: “Tatuyandi kuti bami ba Asuri baboola bazoojane maanzi manji.”
5 Kunze lyaboobo, wakabeleka canguzu kuyakulula bwaanda moonse mobwakakolomokede akuyaka ngazi alimbubo, alimwi wakayaka abumbi bwaanda anze. Kuyungizya waawo wakabambulula a Citantaala*+ camu Munzi wa Davida, alimwi wakapanga zilwanyo* antobo zinji. 6 Mpoonya wakasala basilutwe babasikalumamba kuti balanganye bantu alimwi wakababunganya antoomwe mulubuwa lwakumulyango wamunzi akubayumya-yumya amajwi aakuti: 7 “Amuyume akuba basicamba. Mutayoowi nokuba kukankama akaambo kamwami wa Asuri+ alimwi ankamu mpati yoonse yabantu njali limwi, nkaambo mbotuli limwi mbanji kwiinda mbobali limwi.+ 8 Walo ujisi buyo janza lyanyama,* pele swebo tuli aa Jehova Leza wesu kuti atugwasye akutulwanina nkondo zyesu.”+ Aboobo bantu bakayumizyigwa amajwi aa Mwami Hezekiya wa Juda.+
9 Kuzwa waawo, Mwami Sanakeribu wa Asuri naakali ku Lakisi+ antoomwe abasikalumamba bakwe boonse,* wakatuma babelesi bakwe ku Jerusalemu ku Mwami Hezekiya wa Juda abana Judaya boonse ibakali ku Jerusalemu+ kuti:
10 “Mboobu mbwaamba Mwami Sanakeribu wa Asuri, ‘Ino ncinzi ncomusyoma cimupa kuti kamukkede mu Jerusalemu kakuli mulisinkilidwe?+ 11 Sena Hezekiya tamucengi buya akumupa kuti mufwe nzala anyota, kaamba kuti: “Jehova Leza wesu ulatuvwuna kujanza lyamwami wa Asuri”?+ 12 Sena tali Hezekiya ngoonya iwakagwisya masena aakukombela+ aa Leza* wanu azipaililo zyakwe+ akwaambila ba Juda abantu bamu Jerusalemu kuti: “Mweelede kukotama kucipaililo comwe akuuntumuna busi bwazipaizyo alincico”?+ 13 Sena tamuzyi mebo abamatata ncotwakacita kubantu boonse bamuzisi?+ Sena baleza babamasi bakacikonzya kufwutula cisi cabo kuzwa kujanza lyangu?+ 14 Ino nguni akati kabaleza boonse babamasi aaba balo bamatata mbobakanyonyoona ibakakonzya kufwutula bantu babo kuzwa mujanza lyangu, kutegwa Leza wanu amufwutule kuzwa kujanza lyangu?+ 15 Lino mutalekeli Hezekiya kuti amucenge naa kumoongelezya boobu!+ Mutamusyomi pe, nkaambo kunyina leza wacisi cili coonse naa wabwami buli boonse iwakakonzya kufwutula bantu bakwe kujanza lyangu nomuba mujanza lyabamatata. Ino walo Leza wanu inga ulakonzya buti kumufwutula kujanza lyangu?’”+
16 Babelesi bakwe bakazumanana kwaamba majwi aambi aakusampaula Jehova Leza mwini-mwini amubelesi wakwe Hezekiya. 17 Alimwi wakalemba amagwalo+ aakutukila Jehova Leza wa Israyeli+ akumusampaula kati: “Mbubonya mbuli baleza bamasi ibatakakonzya kufwutula bantu babo mujanza lyangu,+ awalo Leza wa Hezekiya takabafwutuli bantu bakwe mujanza lyangu.” 18 Bakazumanana koompolola ajwi lipati mumwaambo waba Juda kubantu bamu Jerusalemu ibakali atala aabwaanda, kuti babayoosye akubanyonganya kutegwa bausaale munzi.+ 19 Bakamusampaula Leza wa Jerusalemu mbubonya mbobakali kusampaula baleza babantu bamunyika ibakapangwa amaanza aabantu. 20 Pele Mwami Hezekiya amusinsimi Isaya+ imwana wa Amozi, bakazumanana kwaapailila makani aaya kuli Leza wakujulu akumukwiilila kulomba lugwasyo.+
21 Mpoonya Jehova wakatuma mungelo iwakanyonyoona basikalumamba boonse basinguzu,+ basololi abasilutwe babasikalumamba bamwami wa Asuri cakuti mwami wa Asuri wakapiluka kauside kucisi cakwe. Kuzwa waawo wakanjila muŋanda* yaleza wakwe, eelyo bana bakwe bamwi bakamujaya apanga.+ 22 Aboobo Jehova wakavwuna Hezekiya abantu bamu Jerusalemu kujanza lya Mwami Sanakeribu wa Asuri akumaanza aabantu bambi boonse alimwi wakabapa kulyookezya mumabazu oonse. 23 Alimwi bantu banji bakali kuleta zipego kuli Jehova ku Jerusalemu azintu ziyandisi ku Mwami Hezekiya wa Juda,+ kuzwa leelyo wakali kulemekwa kapati amasi oonse.
24 Kumazuba aayo Hezekiya wakaciswa kapati cakuti wakali afwaafwi kufwa, eelyo wakapaila kuli Jehova,+ iwakamwiingula akumupa citondezyo.*+ 25 Pele Hezekiya tanaakalumba kuzintu zibotu nzyaakacitilwa nkaambo moyo wakwe wakalisumpula, eelyo bukali bwa Leza bwakamubukila, walo aba Juda abantu bamu Jerusalemu. 26 Nokuba boobo Hezekiya wakalibombya kukulisumpula kwamoyo wakwe,+ walo abantu bamu Jerusalemu, aboobo bukali bwa Jehova tiibwakabasikila mumazuba aa Hezekiya.+
27 Lino Hezekiya wakaba alubono abulemu bupati kapati;+ wakapanga ziyobwedo+ zyansiliva, zyangolida, zyamabwe mayandisi, zyamafwuta aamabbona, zyantobo azyazibelesyo ziyandisi zyoonse. 28 Alimwi aziyobwedo zyamaila, zyawaini, zyamafwuta, zimpati zyabanyama bamisyobo-misyobo alimwi azyaanda zyambelele. 29 Alimwi wakaba aminzi, banyama bavwubwa banji, mbelele aŋombe zinji kapati, nkaambo Leza wakamupa mbono zinji kapati. 30 Hezekiya ngonguwe wakasinka kasensa kamaanzi+ aaku Gihoni+ akwaanyona kuti agame kunselelo kumbo lya Munzi wa Davida,+ alimwi Hezekiya wakazwidilila mumilimo yakwe yoonse. 31 Nokuba boobo, batumwa babasilutwe baku Babuloni nibakatumwa kuyoomubuzya kujatikizya citondezyo*+ cakacitika mucisi,+ Leza mwini-mwini wakamusiya alikke kutegwa amusunke,+ kuti azyibe zyoonse zili mumoyo wakwe.+
32 Lino makani oonse aakaindi aamba zya Hezekiya amilimo yakwe yaluyando lutamani+ alilembedwe mucilengaano ca Isaya+ musinsimi, imwana wa Amozi, mu Bbuku lyamakani aa Bami baba Juda ababana Israyeli.+ 33 Mpoonya Hezekiya wakoona abamausyi, eelyo bakamuzikka mukalundu kunzila iigama kubusena bwakuzikkila bwabana ba Davida;+ alimwi ba Juda boonse abantu bamu Jerusalemu bakamulemeka ciindi naakafwa. Eelyo Manase mwanaakwe wakaba mwami mubusena bwakwe.