Ciyubunuzyo
3 “Kumungelo wambungano iili mu Sarde, kolemba kuti: Eezyi nzyezintu nzyaamba ooyo uujisi myuuya ya Leza+ iili ciloba alimwi anyenyeezi zili ciloba:+ ‘Ndiliizyi milimo yako, ikuti ujisi zina* lyakuti uli muumi, pele ulifwide.+ 2 Kopakamana,+ alimwi koyumya-yumya zintu zisyeede izyali afwaafwi kufwa, nkaambo ndajana kuti milimo yako tiiyacitwa cakumaninina kumbele lya Leza wangu. 3 Aboobo, kozumanana kuyeeya ncowakatambula ancowakamvwa, eelyo kozumanana kucibamba alimwi koempwa.+ Masimpe ccita kuti usinsimuke, ndilaboola mbuli mubbi+ alimwi tokoozyiba abuniini ciindi nconditiisike kulinduwe.+
4 “‘Nokuba boobo, yebo ujisi bantu basyoonto* mu Sarde ibatakasofwaazya zisani zyabo zyaatala,+ alimwi aaba bayakweenda andime muzisani zituba,+ nkaambo baleelela. 5 Aboobo, ooyo uuzunda+ uyoosamikwa zisani zituba,+ alimwi kunyina pe nondiyoolimwaya zina lyakwe mubbuku lyabuumi,+ pele ndiyoozumina kuti ndililizyi zina lyakwe kumbele lya Taata akumbele lyabangelo bakwe.+ 6 Ooyo uujisi matwi aamvwe ncowaamba muuya kumbungano.’
7 “Kumungelo wambungano iili mu Filadelufiya, kolemba kuti: Eezyi nzyezintu nzyaamba ooyo uusalala,+ wamasimpe,+ uujisi kkii ya Davida,+ ooyo uunga ajalula kunyina uunga wajala, alimwi ajala kunyina uunga wajalula: 8 ‘Ndiliizyi milimo yako—bona, ndakubikkila mulyango uujalukide kumbele lyako,+ ooyo uutakonzyi kujalwa amuntu uumbi. Alimwi ndilizyi kuti ujisi nguzu ziniini, akuti wakalitobela jwi lyangu alimwi tiiwakaleka pe kusyomeka kuzina lyangu. 9 Bona! Ndilapa kuti aabo bazwa kucikombelo ca Saatani ibalyaamba kuti mba Juda, kakuli tabali boobo pe,+ pele balabeja—bona, ndilabapa kuti baboole akufwugama kumaulu aako akubapa kuzyiba kuti ndilakuyanda. 10 Akaambo kakuti wakalitobela jwi lyaamba zyakuliyumya kwangu,*+ andime ndiyookubamba muciindi camasunko,+ iciyoosikila muntu woonse anyika, ikusunka baabo bakkala anyika. 11 Ndilaboola cakufwambaana.+ Kozumanana kujatisya ceeco ncojisi, ikutegwa kutabi muntu uukunyanga musini wako.+
12 “‘Ooyo uuzunda—ndiyoomupa kuba musemu mutempele lya Leza wangu, alimwi kunyina limbi nayoozwa mulindilyo, alimwi ndiyoolemba alinguwe izina lya Leza wangu alimwi azina lyamunzi wa Leza wangu,+ nkokuti Jerusalemu+ Mupya ooyo uuseluka kuzwa kujulu kuli Leza wangu, alimwi azina lyangu lipya.+ 13 Ooyo uujisi matwi aamvwe ncowaamba muuya kumbungano.’
14 “Kumungelo wambungano iili mu Laodikeya,+ kolemba kuti: Eezyi nzyezintu nzyaamba Ameni,+ kamboni+ uusyomeka alimwi wamasimpe,+ imatalikilo aazilenge zya Leza:+ 15 ‘Ndiliizyi milimo yako, kuti totontoli alimwi topyi pe. Nocali cibotu ikuti nowali kutontola naa kupya. 16 Aboobo, akaambo kakuti ukasaala buyo alimwi topyi+ naa kutontola,+ ndilakuswida kuzwa mukanwa lyangu. 17 Nkaambo waamba kuti, “Ndilivwubide+ alimwi ndalijanina lubono lunji alimwi kunyina cintu ncondibulide,” pele tozyi kuti ulipengede, uleetezya, uli mucete, uli moofwu alimwi uli mantanda, 18 ndikulailila kuti uule kulindime ngolida yakasalazyigwa amulilo ikutegwa uvwube, alimwi azisani zituba ikutegwa usame akuti utafwi nsoni mantanda aako aabonwa abamwi,+ alimwi uule amusamu wamumeso+ wakunanika mumeso aako ikutegwa ubone.+
19 “‘Aabo boonse mbondiyanda ndilabasinsa akubalaya.+ Aboobo sungwaala akweempwa.+ 20 Bona! Ndiliimvwi amulyango alimwi ndilakonkomona. Ikuti umwi wamvwa jwi lyangu akujalula mulyango, ndilanjila muŋanda yakwe alimwi walo andime tulalida antoomwe cilalilo. 21 Ooyo uuzunda+ ndiyoomuzumizya kukkala andime acuuno cangu cabwami,+ mbubonya andime mbondakazunda akukkala+ a Taata acuuno cakwe cabwami. 22 Ooyo uujisi matwi aamvwe ncowaamba muuya kumbungano.’”