Bafilipi
1 Ndime Paulo nendili antoomwe a Timoteyo, tobazike ba Kristo Jesu, nendilembela basalali boonse ibakamantene a Kristo Jesu ibali mu Filipi,+ kubikkilizya abalangizi alimwi abakutausi kuti:+
2 Amube aluzyalo alimwi aluumuno kuzwa kuli Leza Taateesu a Mwami wesu Jesu Kristo.
3 Ndilamulumba lyoonse Leza wangu nondimwiibaluka 4 mukukombelezya koonse nkondikombela ndinywe nyoonse. Mukukombelezya akumwi ndilakomba cakukondwa,+ 5 akaambo kalubazu ndomwajisi mukugwasyilizya kumwaya makani mabotu kuzwa buzuba bwakusaanguna nomwakaatambula kusikila lino. 6 Nkaambo ndilisinizyide kujatikizya cintu eeci, ikuti ooyo wakatalika mulimo ooyu mubotu akati kanu ulazumanana kuubeleka kusikila mane akaumanizye+ mubuzuba bwa Kristo Jesu.+ 7 Cili buyo kabotu kuti mebo ndiyeeye boobu kujatikizya ndinywe nyoonse, akaambo kakuti muli kalungu kangu kaamoyo, nywebo nomutola lubazu antoomwe andime muluzyalo lwa Leza, libe leelyo nondaangidwe nketani muntolongo+ alimwi anondikwabilila akusitikizya makani mabotu mumulawo.+
8 Nkaambo Leza ngokamboni wangu kujatikizya mbondimuyandisisya nyoonse aluyando lwamumoyo luli mbuli ndwajisi Kristo Jesu. 9 Alimwi eeci ncondizumanana kupailila, kuti luyando lwanu luzumanane kuvwula lyoonse+ antoomwe aluzyibo lwini-lwini+ alimwi akumvwisya koonse;+ 10 kuti musinizye zintu ziyandika kapati,+ kutegwa mutabi amulandu uuli woonse alimwi kamutalebyi bamwi+ kusikila kubuzuba bwa Kristo; 11 akuti muzule micelo iiluleme, nkokuti ikwiinda muli Jesu Kristo,+ ikutegwa Leza apegwe bulemu akutembaulwa.
12 Lino bakwesu ndiyanda kuti nywebo muzyibe kuti bukkale bwangu mubwini bwapa kuti makani mabotu aunke kumbele, 13 cakuti nketani nzyondaangidwe+ akaambo ka Kristo zyazyibwa koonse-koonse+ ku Balindizi ba Mwami Muna Roma akubantu boonse. 14 Lino, ibunji bwabakwesu mu Mwami bayuma kapati akaambo kanketani nzyondaangidwe, alimwi baindila kuba basicamba ikwaamba jwi lya Leza cakutayoowa.
15 Masimpe, bamwi bakambauka Kristo kwiinda mukuba amunyono akuzundana, pele bamwi bacita boobo amizeezo mibotu. 16 Aabo bacita boobo amizeezo mibotu baambilizya Kristo akaambo kaluyando, nkaambo balizyi kuti ndakasalilwa kukwabilila makani mabotu;+ 17 pele aabo bamwi bacita boobo akaambo kakuyanda mazwanga, ikutali amizeezo mibotu, nkaambo bayanda kundiletela mapenzi nondaangidwe nketani. 18 Aboobo ino ncinzi cacitika? Cilikke cacitika ncakuti munzila zyoonse, kufwumbwa naa muukulicengeezya buyo naa muukasimpe, Kristo ulaambilizyigwa alimwi eeci cindipa kukondwa. Alimwi buya ndilazumanana kukondwa, 19 nkaambo ndilizyi kuti eeci ciyoondipa kufwutulwa kwiinda mukukombelezya+ kwanu alimwi akwiinda mukugwasyigwa amuuya wa Jesu Kristo.+ 20 Eeci cileendelana akulangila cakuyandisisya kwangu abulangizi bwakuti tandikausyigwi nsoni munzila iili yoonse, pele kuti mukwaamba cakutayoowa abuniini mbubonya mbocabede lyoonse, lino Kristo ulalemekwa kwiinda mumubili wangu, mube mubuumi naa mulufwu.+
21 Nkaambo kulindime ikuti kandipona, ndinooponena Kristo,+ alimwi ikuti ndafwa, nimpindu.+ 22 Lino ikuti naa ndazumanana kupona mumubili ooyu, inga ndajana mucelo uumbi mumulimo wangu; nokuba boobo icintu nconditiisale tandikoocaamba pe. 23 Ndabula cakucita azintu eezyi zyobilo, nkaambo ndilombozya kwaangununwa alimwi akuba a Kristo,+ eeco mubwini cili ncecintu ciinda kubota.+ 24 Nokuba boobo, cilayandika kapati kuti ndizumanane mumubili ooyu akaambo kandinywe. 25 Aboobo, mbwaanga ndilacisyoma eeci, ndilizyi kuti ndilazumanana mumubili alimwi ndiyookkala andinywe nyoonse kutegwa muyaambele akuti mukondwe akaambo kalusyomo lwanu, 26 ikutegwa mukkomane kapati muli Kristo Jesu akaambo kandime eelyo nendiyooba andinywe alimwi.
27 Lino cipati ncakuti amulilemeke* kweelana amakani mabotu aajatikizya Kristo,+ ikutegwa kufwumbwa naa ndikaboole kumubona neliba leelyo nonditali andinywe, kandimvwa mpuwo yanu akuti muliimvwi nji mumuuya omwe, mubelekela antoomwe mbuli muntu omwe+ ikulwanina lusyomo lwamakani mabotu, 28 akuti kunyina abuniini nomukongwa abasinkondonyoko. Cintu eeci ncimunya ncisinizyo cakuti balo bayoonyonyooka,+ pele nywebo muyoofwutuka;+ alimwi eeci cizwa kuli Leza. 29 Nkaambo nywebo mwapegwa coolwe akaambo ka Kristo, ikutali buyo kuti mumusyome pe, pele alimwi akuti mupenge akaambo kanguwe.+ 30 Nkaambo nywebo mulwana nkondo njimunya njomwakabona kandilwana,+ lino njomumvwide kuti ndicilwana.