Marko
1 Matalikilo aamakani mabotu aamba zya Jesu Kristo, Mwana wa Leza: 2 Mbubonya mbokulembedwe kuli Isaya musinsimi kuti: “(Bona! Mebo ndatuma mutumwa wangu kumbele lyako,* ooyo uuyookubambila nzila.)+ 3 Kulimvwisya jwi lyamuntu woongolola munkanda kati: ‘Amubambe nzila ya Jehova!* Amululamike migwagwa yakwe.’” + 4 Johane Mubbapatizi wakali munkanda, kakambauka lubbapatizyo lutondezya kweempwa kutegwa zibi zilekelelwe.+ 5 Eelyo cilawo coonse ca Judaya abantu boonse bamu Jerusalemu bakali kuunka kulinguwe, mpoonya wakali kubabbapatizya* mu Mulonga wa Jordano, kabalyaambilila zibi+ zyabo antangalala. 6 Lino Johane wakali kusama cisani caboya bwankamela alutambo lwacipaya mucibuno,+ alimwi wakali kulya cikwikwi abuci.+ 7 Alimwi wakali kukambauka kuti: “Muntu umwi uundiinda nguzu ulaboola munsi lyangu, ooyo mebo ngonditeeleli kooka akwaangununa ntambo zyampato zyakwe.+ 8 Mebo ndakamubbapatizya amaanzi, pele walo uyoomubbapatizya amuuya uusalala.”+
9 Kumazuba aayo, Jesu wakaboola kuzwa ku Nazareta mu Galilaya eelyo Johane wakamubbapatizya mu Mulonga wa Jordano.+ 10 Mbwaakaimpukila buyo mumaanzi, wakabona julu kalijaluka, amuuya uulibonya mbuli nziba kauseluka aalinguwe.+ 11 Alimwi kujulu kwakazwa jwi ilyakaamba kuti: “Yebo uli Mwanaangu ngweyandisya, ngwekkomanina.”+
12 Mpoonya-mpoonya muuya wakamupa kuti aunke munkanda. 13 Aboobo wakakkala munkanda kwamazuba aali 40, kasunkwa a Saatani.+ Wakali kukkala abanyama, pele bangelo bakali kumukutaukila.+
14 Lino Johane naakaangwa, Jesu wakaunka ku Galilaya+ kakambauka makani mabotu aa Leza+ 15 kati: “Ciindi cibikkidwe cazuzikizyigwa, alimwi Bwami bwa Leza bwaswena. Amweempwe+ alimwi amube alusyomo mumakani mabotu.”
16 Eelyo naakali kweenda mumbali aa Lwizi lwa Galilaya, wakabona Simoni a Andreya+ imunyina Simoni kabawaala nsabwe zyabo mulwizi,+ nkaambo bakali bazubi banswi.+ 17 Aboobo Jesu wakabaambila kuti: “Amunditobele, eelyo ndilamupa kuba bazubi babantu.”+ 18 Mpoonya aawo bakasiya nsabwe zyabo akumutobela.+ 19 Naakeenda aniini kuyaampela, wakabona Jakobo mwana wa Zebedayo a Johane imunyina, ibakali mubwato kabasuma nsabwe zyabo,+ 20 aboobo cakutasowa ciindi wakabaita. Eelyo bakabasiya ba Zebedayo bausyi mubwato ababelesi kumane bakamutobela. 21 Mpoonya bakanjila mu Kapernauma.
Mbobwakasikila buyo buzuba bwa Sabata wakanjila mucikombelo akutalika kuyiisya.+ 22 Alimwi bakagambwa kapati ambwaakali kuyiisya, nkaambo wakali kubayiisya mbuli muntu uujisi nguzu zizwa kuli Leza, ikutali mbuli balembi.+ 23 Aciindi nciconya eeco, mucikombelo cabo kwakali muntu wakanjidwe muuya uusofweede, aboobo wakoongolola kuti: 24 “Ino tujisi kaambo nzi anduwe Jesu omuna Nazareta?+ Sena walonda kutunyonyoona? Ndilikuzyi kabotu kuti uli Musalali wa Leza!”+ 25 Pele Jesu wakaukalalila kati: “Umuna, kozwa mumuntu ooyu!” 26 Eelyo muuya uusofweede ooyu nowakamusuntusya akumoongolozya, wakazwa mumuntu ooyo. 27 Aboobo bantu boonse bakakankamana cakuti bakatalika kwaambaula mulicabo kabati: “Ino ncinzi eeci? Nkuyiisya kupya! Ulijisi nguzu zyakulailila noiba myuuya iisofweede, alimwi ilamuswiilila.” 28 Aboobo mukaindi kaniini buyo mpuwo yakwe yakamwaika kumabazu oonse mucooko coonse ca Galilaya.
29 Ndilyonya bakazwa kucikombelo akuya kuŋanda ya Simoni a Andreya antoomwe a Jakobo a Johane.+ 30 Lino banyinazyala+ Simoni bakalilede nkaambo mubili wakali kupya, mpoonya bakamwaambila Jesu kuti balicisidwe. 31 Aboobo wakaunka nkobakalede, wabajata janza akubabusya. Eelyo mubili wakaleka kupya, mpoonya bakatalika kubakutaukila.
32 Nokwakaba kumangolezya, bantu bakatalika kumuletela boonse aabo bakali kuciswa alimwi abaabo bakanjidwe madaimona;+ 33 alimwi boonse bantu bamumunzi bakavwoomana amulyango. 34 Aboobo wakabaponya banji bakali kuciswa malwazi+ aaindene-indene, alimwi wakatanda madaimona manji, pele madaimona tanaakali kwaazumizya kwaambaula, nkaambo akalimuzyi kuti ngu Kristo.*
35 Lino mafwumofwumo kakucisiya ansi, wakabuka akuzwa anze akuya kubusena butakwe bantu, aboobo okuya wakatalika kupaila.+ 36 Pele Simoni abaabo mbaakali limwi bakatalika kumuyandaula 37 mane bakamujana, eelyo bakamwaambila kuti: “Bantu boonse bayandaula nduwe.” 38 Pele wakabaambila kuti: “Katuunka kumbi, muminzi iili munsi-munsi ikutegwa akwalo nkakambauke, nkaambo eeci ncindakaboolela.”+ 39 Aboobo wakaunka kayaabukambauka muzikombelo zyabo mu Galilaya moonse akuyaabutanda madaimona.+
40 Alimwi kwakamusikila sicinsenda, wakamufwugamina akumukombelezya kuti: “Ikuti koyanda, ulakonzya kundisalazya.”+ 41 Aboobo wakamufwida luzyalo, eelyo wakatandabika janza akumujata, mpoonya wakati: “Ndilayanda! Kosalazyigwa.”+ 42 Mpoonya aawo cinsenda cakwe cakamana, eelyo wakasalala. 43 Kumane, wakamupa malailile akumuleka kuti aunke, 44 wakati: “Utaambili muntu naba omwe cintu cili coonse, pele koya ukalitondezye kumupaizi, kuti akakutuulile zintu Musa nzyaakalailila kutondezya kuti wasalala,+ kutegwa bukabe bumboni kulimbabo.”+ 45 Pele naakazwa aawo, imwaalumi ooyo wakatalika kwaambilizya akumwaya makani aaya koonse-koonse, cakuti Jesu aciindi aawa wakakakilwa kunjila caantangalala mumunzi uuli woonse, pele wakazumanana kukkala anze mumasena aali kulamfwu abantu. Nokuba boobo, bakazumanana kuboola kulinguwe kuzwa kumasena oonse.+