Malaki
2 “Lino mulawo ooyu nguwanu, nywebo nobapaizi.+ 2 Ikuti mukake kuswiilila alimwi ikuti mumyoyo yanu mutabikkili maano kukulemeka zina lyangu,” mbwaamba Jehova wamakamu, “ndilamusinganya,+ azyalo zileleko zyanu ndilazisinganya.+ Inzya, ndazisinganya kale zileleko, akaambo kakuti tamubikkili maano mumyoyo yanu.”
3 “Amubone! Akaambo kandinywe+ ndiyoonyonyoona* mbuto zyanu zisyangidwe, alimwi ndiyoomutila bufwumba kumeso aanu, ibufwumba bwamapobwe aanu; eelyo muyootolwa nkuko.* 4 Aboobo muyoozyiba kuti ndamupa mulawo ooyu ikutegwa cizuminano cangu a Levi cizumanane,”+ mbwaamba Jehova wamakamu.
5 “Cizuminano cangu ncondakapangana anguwe cakali cabuumi aluumuno, eezyo nzyondakamupa antoomwe akuyoowa.* Wakandiyoowa, inzya, wakalilemeka kapati zina lyangu. 6 Mulawo* wakasimpe wakali mukanwa lyakwe,+ alimwi kunyina kutalulama kwakajanwa kumulomo wakwe. Wakeenda andime muluumuno amubululami,+ alimwi wakasandula bantu banji kuzwa kucinyonyoono. 7 Nkaambo milomo yamupaizi yeelede kuba aluzyibo lyoonse, alimwi bantu beelede kuyandaula mulawo* kumulomo wakwe,+ nkaambo ngomutumwa wa Jehova wamakamu.
8 “Pele nywebo mwaleya munzila. Mwapa kuti bantu banji balebwe mumakani aamulawo.*+ Mwajaya cizuminano ca Levi,”+ mbwaamba Jehova wamakamu. 9 “Aboobo ndiyoomupa kusampaulwa akubonwa kuti muli bantu-bantu buyo kubantu boonse, nkaambo tiimwakatobela nzila zyangu, pele mwakali kusalulula caboola kukutobela mulawo.”+
10 “Sena taateesu toonse tali omwe buyo?+ Sena tali Leza omwe buyo wakatulenga? Aboobo, nkaambo nzi ncotucitilana cabumpelenge,+ kwiinda mukusampaula cizuminano cabamatata? 11 Juda wacita cabumpelenge, alimwi mu Israyeli amu Jerusalemu mwacitwa cintu cisesemya; nkaambo Juda wasampaula busalazi* bwa Jehova,+ oobo mbwayanda, alimwi wakwata mwana musimbi waleza muzwakule.+ 12 Jehova uyoomunyonyoona muntu woonse uucita boobo mumatente aa Jakobo, kufwumbwa naa nguni, nokuba kuti upa cipego cacituuzyo kuli Jehova wamakamu.”+
13 “Alimwi kuli cintu acimwi ncomucita, icapa kuti cipaililo ca Jehova cizule misozi, kulila alimwi akutongela, cakuti kunyina nacibikkila maano kucituuzyo canu cacipego nokuba kukkomanina cintu cili coonse cizwa kumaanza aanu.+ 14 Lino mubuzya kuti, ‘Ino nkaambo nzi?’ Nkaambo kakuti Jehova waba kamboni akati kako amukaintu wako wakubukubusi bwako, ooyo ngoocitila cabumpelenge, nokuba kuti mweenzinyoko alimwi mukaintu wako wacizuminano.*+ 15 Pele kuli muntu watakacita boobo, nkaambo wakacijisi muuya. Ino wakali kuyanda nzi? Wakali kuyanda lunyungu lwa Leza. Aboobo amuucenjelele muuya wanu, alimwi umwi aumwi wanu atamucitili cabumpelenge mukaintu wakubukubusi bwakwe. 16 Nkaambo ndilikusulide kulekana,”+ mbwaamba Jehova Leza wa Israyeli, “antoomwe amuntu uuvwumba cisani cakwe alunya,”* mbwaamba Jehova wamakamu. “Aboobo amuucenjelele muuya wanu, alimwi tamweelede kucita cabumpelenge pe.+
17 “Nywebo mwamukatazya Jehova kwiinda mumajwi aanu.+ Pele mubuzya kuti, ‘Ino twamukatazya buti?’ Nkwiinda mukwaamba kuti, ‘Muntu woonse uucita bubi uli kabotu mumeso aa Jehova, alimwi ulamukkomanina muntu uuli boobu,’+ naa kuti, ‘Ino uli kuli Leza wabululami?’”