Jeremiya
14 Ndeeli jwi lya Jehova ilyakamusikila Jeremiya kujatikizya ciyumayuma:+
2 Cisi ca Juda cilalila,+ ayalo milyango yancico yanyonyooka.
Yabbila mubulongo kayuuside,
Akwalo kulila kwamvwugwa kuzwa mu Jerusalemu.
3 Basimalelo babo batuma babelesi babo* kuti bakateke maanzi.
Baunka kumigoti akujana kuti taakwe maanzi.
Bajokela anongo zyabo zinyina maanzi.
Bagunwa alimwi batyompwa,
Eelyo balivwumba kumutwe.
4 Akaambo kakuti nyika yaandauka,
Mbokunga tiikwawa mvwula mucisi,+
Balimi bausa alimwi balivwumba kumutwe.
5 Noiba insya iili musyokwe yasiya mwana nguyazwa aakuzyala
Akaambo kakuti taakwe bwizu.
6 Imbongolo zyamusyokwe zyaile kwiima atala aatulundu aatakwe cintu.
Zilafwekemba mbuli bamwaaba;
Meso aanzizyo alema nkaambo taakwe bwizu.+
7 Nokuba kuti zinyonyoono zyesu zipa bumboni bwakuti tulaamulandu,
O Jehova, kobweza ntaamu akaambo kazina lyako.+
Nkaambo micito yesu yakutasyomeka yavwulisya,+
Alimwi nduwe ngotwabisyila.
8 Akaka yebo obulangizi bwa Israyeli, Mufwutuli+ wakwe ciindi camapenzi,
Ino nkaambo nzi ncooba mbuli mweenzu buyo mucisi,
Ambuli silweendo waleya kuti aone busiku bomwe buyo?
9 Ino nkaambo nzi ncooba mbuli muntu wamaninwa maano,
Mbuli mwaalumi singuzu uutakonzyi kufwutula?
Akaka, utatulekelezyi pe.
10 Mboobu mbwaamba Jehova kujatikizya bantu aaba: “Bayandisya kwiingaila;+ tabaalesyi maulu aabo pe.+ Aboobo Jehova tabakkomanini pe.+ Lino ulaciyeeya cinyonyoono cabo alimwi ulabasubula akaambo kazibi zyabo.”+
11 Mpoonya Jehova wakandaambila kuti: “Utabapailili bantu aaba kuti zintu zibeendele kabotu.+ 12 Nobaliimya kulya, tandiswiilili kulila kwabo kwakukombelezya,+ alimwi nobatuula zipaizyo zyuumpwa buumbulu azituuzyo zyamaila, tandizikkomanini pe;+ nkaambo ndiyoobajaya apanga, nzala alimwi acilwazi.”+
13 Aboobo mebo ndakati: “Akaka, O Mwami Singuzuzyoonse Jehova! Bona basinsimi babaambila kuti, ‘Tamukaliboni panga, alimwi tamukasikilwi nzala, pele ndiyoomupa luumuno lwini-lwini mubusena oobu.’”+
14 Mpoonya Jehova wakandaambila kuti: “Nzyakubeja eezyo basinsimi nzyobasinsima muzina lyangu.+ Kunyina nendabatuma, nokuba kubalailila naa kubaambila pe.+ Nobasinsima kulindinywe, bamwaambila cilengaano cakubeja, kusonda kwabuyo, alimwi alweeno lwamumyoyo yabo beni.+ 15 Aboobo, mboobu mbwaamba Jehova kujatikizya basinsimi ibasinsima muzina lyangu, nokuba kuti mebo taakwe nindabatuma, alimwi ibaamba kuti takukabi panga noiba nzala mucisi ecino: ‘Basinsimi aabo bayoomana kujaigwa apanga alimwi anzala.+ 16 Abalo bantu aabo mbobasinsimina bayoosoogwa mumigwagwa ya Jerusalemu akaambo kanzala apanga, kunyina muntu uuyoobazikka,+ inzya balo, bamakaintu babo alimwi abana babo basankwa abasimbi, nkaambo ndiyoobapoomweda mapenzi aabeelede.’+
17 “Lino weelede kubaambila majwi aaya,
‘Meso aangu aakunke misozi syikati amasiku alimwi italeki pe,+
Nkaambo nakalindu, imwana musimbi wabantu bangu wapwaika alimwi watyoka cakumaninina,+
Akaambo kakuti waumwa cibyaabi.
18 Lino kuti naa ndaunka musyokwe akulanga,
Ndibona buyo baabo bakajaigwa apanga!+
Alimwi naa ndanjila mumunzi,
Amwalo ndibona buyo malwazi aaboola akaambo kanzala!+
Nkaambo musinsimi alimwi amupaizi boonse buyo bayaabwiingaila mucisi ncobatazyi.’”+
19 Sena yebo wamukakila limwi Juda, sena wamucimwa Ziyoni?+
Ino nkaambo nzi yebo ncootuumina boobu cakuti tatukonzyi kupona?+
Twakali kulangila luumuno, pele kunyina bubotu bwakasika,
Ciindi cakuponesyegwa, pele kuli buyo zintu ziyoosya!+
21 Akaambo kazina lyako, utatukaki pe;+
Utanyansyi cuuno cako cabwami cabulemu.
Koyeeya alimwi utacijayi cizuminano ncojisi andiswe.+
22 Sena akati kamituni yabuyo yamasi kuli mutuni nuuba omwe uukonzya kuleta mvwula,
Naaba majulu, sena alakonzya kulosya mvwula alikke?
Sena toli nduwe olikke, O Jehova Leza wesu?+
Swebo tulangila nduwe,
Nkaambo yebo olikke nduwe wacita zintu eezyi zyoonse.