2 Makani
24 Jehoasi wakali amyaka iili ciloba naakaba mwami,+ alimwi wakalela kwamyaka iili 40 mu Jerusalemu. Banyina bakali ba Zibiya baku Beere-seba.+ 2 Lino Jehoasi wakazumanana kucita ziluleme mumeso aa Jehova mazuba oonse aabuumi bwa Jehoyada mupaizi.+ 3 Jehoyada wakamusalila bamakaintu bobilo, eelyo wakazyala bana basankwa abasimbi.
4 Nokwakainda ciindi Jehoasi wakayandisisya mumoyo wakwe kubambulula ŋanda ya Jehova.+ 5 Aboobo wakabunganya bapaizi aba Levi antoomwe akubaambila kuti: “Kamuya muminzi ya Juda mukayobolole mali kuzwa kubana Israyeli boonse, aakubambuluzya ŋanda ya Leza wanu+ mwaka amwaka; alimwi mweelede kufwambaana kucita oobu.” Pele ba Levi tiibakafwambaana kucita oobo.+ 6 Aboobo mwami wakaita Jehoyada silutwe wabapaizi akumwaambila kuti:+ “Ino nkaambo nzi ncotanabaambila ba Levi kuleta mutelo uusetekene kuzwa kuba Juda akubantu bamu Jerusalemu kweelana ambwaakalailila Musa+ mubelesi wa Jehova, nkokuti mutelo uusetekene wambungano yabana Israyeli, watente lya Bumboni?+ 7 Nkaambo bana ba Ataliya+ mukaintu uulya mubi bakapwaya ŋanda ya Leza mwini-mwini,+ alimwi bakazibelesya zintu zyoonse zisalala zyamuŋanda ya Jehova kuli ba Baala.” 8 Mpoonya mwami naakalailila, bakapanga bbokesi+ akulibikka anze kumulyango waŋanda ya Jehova.+ 9 Kumane bakatumya mulomo mu Juda amu Jerusalemu moonse kuti baletele Jehova mutelo uusetekene+ ooyo Musa mubelesi wa Leza mwini-mwini ngwaakaambila bana Israyeli munkanda kuti kabapa. 10 Basilutwe boonse abantu boonse bakasekelela+ alimwi bakaleta zyakusanga akuwaala mubbokesi kusikila lyazula.*
11 Kufwumbwa ciindi bbokesi nolyakali kuletwa aba Levi kumwami alimwi babona kuti kuli mali manji, mulembi wamwami asikugwasyilizya mupaizi bakali kuboola akwaalongolola mali kuzwa mubbokesi,+ mpoonya bakali kulipilusya kubusena bwalyo. Oobo mbobakali kucita buzuba abuzuba, aboobo bakayobolola mali manji. 12 Mpoonya mwami a Jehoyada bakali kwaapa kulibaabo ibakali kweendelezya mulimo wakubambulula ŋanda ya Jehova, eelyo bakanjizya mulimo basikubeza mabwe abasyaazibwene mukupanga zintu zyakubelesya muŋanda ya Jehova,+ alimwi abafwuzi babutale amukuba kuti babambulule ŋanda ya Jehova. 13 Aabo ibakali kweendelezya mulimo bakautalika mulimo, eelyo mulimo wakubambulula wakazumanana kuyaambele kaweendelezyegwa ambabo kusikila limwi ŋanda ya Leza mwini-mwini yakaba kweelana amboyakeelede kuba alimwi bakaiyumya. 14 Lino mbobakamanina buyo bakaleta mali oonse aakasyaala kumwami akuli Jehoyada alimwi bakaabelesya kupanga zibelesyo zyaŋanda ya Jehova, zibelesyo zyamumulimo, zyakubelesya mukutuula zituuzyo, nkapu azibelesyo zyangolida ansiliva.+ Alimwi bakali kutuula zipaizyo zyuumpwa+ muŋanda ya Jehova mazuba oonse aabuumi bwa Jehoyada.
15 Lino Jehoyada naakacembaala akupona myaka minji, wakafwa kajisi myaka iili 130. 16 Aboobo bakamuzikka mu Munzi wa Davida antoomwe abami+ akaambo kazintu zibotu nzyaakacita mu Israyeli+ alimwi akujatikizya Leza mwini-mwini aŋanda ya Leza.
17 Lino naakafwa Jehoyada, basilutwe bamu Juda bakaboola akukotama kumwami eelyo mwami wakabamvwida. 18 Bakaisiya ŋanda ya Jehova Leza wabamausyi akutalika kukomba misemu yazisamu yakukomba* alimwi amituni aboobo bukali bwa Leza bwakabasikila* mu Juda amu Jerusalemu akaambo kamulandu wabo ooyo. 19 Wakazumanana kubatumina basinsimi kutegwa babapilusye kuli Jehova, alimwi bakazumanana kubacenjezya* pele bakakaka kuswiilila.+
20 Lino muuya wa Leza wakaselukila Zekariya mwana wa Jehoyada+ mupaizi alimwi wakaima atala kumbele lyabantu akubaambila kuti: “Mboobu mbwaamba Leza mwini-mwini, ‘Ino nkaambo nzi ncomusotoka milawo ya Jehova? Tamukoozwidilila pe! Akaambo kakuti mwamusiya Jehova, awalo ulamusiya.’”+ 21 Pele bakamubukila+ akumupwaya mabwe mulubuwa lwaŋanda ya Jehova kweelana amwami mbwaakalailila.+ 22 Aboobo Mwami Jehoasi tanaakayeeya luyando lutamani oolo Jehoyada usyi* ndwaakatondezya kulinguwe nkaambo wakamujaila mwanaakwe, ooyo ciindi naakali kufwa iwakaamba kuti: “Jehova abone ncoocita akukupa mulandu.”+
23 Kumatalikilo aamwaka,* impi yabasikalumamba yabana Siriya yakaboola kuzoomulwana Jehoasi akusaala Juda a Jerusalemu.+ Mpoonya bakajaya basilutwe boonse+ babantu, eelyo lubono lwabo loonse bakalutuma kumwami waku Damasiko. 24 Nokuba kuti impi yabasikalumamba yabana Siriya iyakasaala yakali nsyoonto, Jehova wakayaaba mpi yabasikalumamba mpati mumaanza aabo+ akaambo kakuti bakasiya Jehova Leza wabamausyi; aboobo bakamubeteka* Jehoasi. 25 Eelyo nibakazwa kulinguwe (nkaambo bakamucisa* kapati), babelesi bakwe bakamubukila akaambo kabulowa mbwaakatila bwabana* ba Jehoyada+ mupaizi. Bakamujaya abulo bwakwe.+ Aboobo wakafwa eelyo bakamuzikka mu Munzi wa Davida,+ pele tiibakamuzikka mumasena aazikkilwa bami.+
26 Mbaaba bantu bakamubukila:+ Zabadi mwana wa Simeati imukaintu muna Amoni a Jehozabadi mwana wa Simiriti imukaintu muna Moabu. 27 Lino kujatikizya bana bakwe amilumbe minji iyakali kumusikila+ alimwi akubambululwa* kwaŋanda ya Leza mwini-mwini,+ zintu zyoonse eezyi zililembedwe mu Bbuku* lyamakani aa Bami. Eelyo Amaziya mwanaakwe wakaba mwami mubusena bwakwe.