Jeremiya
39 Mumwaka wafwuka wa Mwami Zedekiya wa Juda, mumwezi wa 10, Mwami Nebukadinezara* wa Babuloni antoomwe ampi yabasikalumamba bakwe boonse bakaboola kumunzi wa Jerusalemu, mpoonya bakausinkila.+
2 Mumwaka wa 11 wabulelo bwa Zedekiya, mumwezi wane, mubuzuba bwafwuka bwamwezi, bakapwaya bwaanda bwamunzi.+ 3 Mpoonya basilutwe bamwami wa Babuloni bakanjila mukati akukkala ku Mulyango Waakati,+ nkokuti ba Nerigali-sarezara uutegwa Samugari, Nebo-Sarisekimu uutegwa Rabisarisi,* Nerigali-sarezara uutegwa Rabumagi* alimwi abasilutwe bambi boonse bamwami wa Babuloni.
4 Mwami Zedekiya wa Juda abasikalumamba boonse nobakababona, bakatija+ akuzwa mumunzi masiku, bakainda nzila yiinda mumuunda wamwami, kumulyango uuli akati kamalambo obilo, eelyo bakazumanana kuunka munzila iitozya ku Araba.+ 5 Pele impi yabasikalumamba yaba Kasidi yakabatandaanya, mpoonya bakamweenzya Zedekiya muzibanda zyamucimpayuma ca Jeriko.+ Bakamujata akumuleta ku Mwami Nebukadinezara* wa Babuloni ku Ribila+ mucisi ca Hamati,+ ooko nkwaakamubetekela. 6 Mwami wa Babuloni wakalailila kuti bana ba Zedekiya bajaigwe ku Ribila walo kalangilila, alimwi mwami wa Babuloni wakalailila kuti nkumekume zyoonse zyamu Juda azyalo zijaigwe.+ 7 Mpoonya wakoofwaazya meso aa Zedekiya, kumane wakamwaanga nketani zyamukuba akumutola ku Babuloni.+
8 Mpoonya ba Kasidi bakayuumpa ŋanda yamwami antoomwe amaanda aabantu,+ alimwi bakakolomona malambo aamunzi wa Jerusalemu.+ 9 Nebuzaradana+ mupati wabasikugatela mwami wakabatola mubuzike ku Babuloni bantu boonse aabo ibakasyeede mumunzi, aabo bakatijilide kulinguwe, alimwi amuntu uuli woonse wakasyeede.
10 Pele Nebuzaradana mupati wabasikugatela mwami wakabasiya bantu bamwi mucisi ca Juda ibakali bacete babacete, nkokuti aabo ibatakajisi cintu cili coonse. Mubuzuba mbubonya oobo wakabapa myuunda yamisaansa alimwi amyuunda iimbi buyo kuti kababeleka* mulinjiyo.+
11 Lino Mwami Nebukadinezara* wa Babuloni wakapa Nebuzaradana mupati wabasikugatela mwami malailile aaya kujatikizya Jeremiya: 12 “Komubweza ukamulanganye; utamuciti cintu cibi cili coonse, alimwi weelede kumucitila kufwumbwa ncatiikwaambile.”+
13 Aboobo Nebuzaradana mupati wabasikugatela mwami, Nebusazibani uutegwa Rabisarisi,* Nerigali-sarezara uutegwa Rabumagi,* alimwi abalupati-pati boonse bamwami wa Babuloni bakatuma bantu, 14 eelyo bakagwisya Jeremiya mu Lubuwa lwa Mulindizi+ akumubikka mumaanza aa Gedaliya+ mwana wa Ahikamu+ imwana wa Safani+ kuti amutole kuŋanda yakwe. Aboobo wakakkala akati kabantu.
15 Ciindi Jeremiya naakajalilidwe mu Lubuwa lwa Mulindizi,+ ijwi lya Jehova lyakamusikila, kaliti: 16 “Koya, ukaambile Ebedi-meleki+ muna Etiopiya kuti, ‘Mboobu mbwaamba Jehova wamakamu, Leza wa Israyeli: “Bona ndilaazuzikizya majwi aangu ngendakaamba kujatikizya munzi ooyu aakuti ulasikilwa mapenzi ikutali bubotu, eelyo mubuzuba oobo yebo uyoocibona ameso aako kacicitika eeci.”’
17 “‘Pele mubuzuba oobo yebo ndiyookuvwuna,’ mbwaamba Jehova, ‘tokaabwi pe mumaanza aabantu aabo mboyoowa.’
18 “‘Nkaambo ziyume zitete ndiyookufwutula, tokajaigwi apanga. Uyoofwutula buumi bwako,*+ akaambo kakuti wakandisyoma,’+ mbwaamba Jehova.”