1 Makani
20 Lino kumatalikilo aamwaka* ciindi bami nobaunka kuyoolwana, Joabu+ wakasololela basikalumamba kuyoonyonyoona nyika yabana Amoni; wakaboola akusinkila munzi wa Raba,+ pele Davida wakasyaala mu Jerusalemu.+ Joabu wakaulwana munzi wa Raba akuunyonyoona.+ 2 Mpoonya Davida wakabweza musini iwakali kumutwe wa Malikamu, eelyo wakajana kuti wakali kulema talenta* lyangolida lyomwe, alimwi mulinguwo mwakali mabwe mayandisi; eelyo Davida wakasamikwa musini ooyo kumutwe. Alimwi wakabweza zisaalo zinji kapati kuzwa mumunzi ooyu.+ 3 Bantu ibakali kukkala mumunzi ooyu wakabatola akubabikka+ kuti babe basikubeza mabwe, basikubelesya zibelesyo zibosya zyabutale abasikubelesya tweembe. Oobu mbombubo Davida mbwaakacita kuminzi yoonse yabana Amoni. Kumane Davida abasikalumamba boonse bakapiluka ku Jerusalemu.
4 Kuzwa waawo, kwakabuka nkondo aba Filisiti ku Gezeri. Aciindi eeco Sibekai+ muna Husati wakajaya Sipai* iwakali umwi walunyungu lwa Refaimu,+ eelyo ba Filisiti bakazundwa.
5 Alimwi kwakabuka nkondo aba Filisiti, eelyo Elihanani mwana wa Jairi wakajaya Lami mwanookwabo a Goliati+ muna Gati, ooyo iwakajisi sumo lili amukwikko uuli mbuli cisamu cabasikuluka.+
6 Nkondo yakabuka alimwi ku Gati,+ ooko ikwakali lintu+ ilyakajisi minwe iili cisambomwe kujanza limwi alimwi, aminwe iili cisambomwe kucituta cimwi acimwi, antoomwe minwe yakali 24; alyalo lintu eeli lyakali lyalunyungu lwa Refaimu.+ 7 Lintu eelyo lyakazumanana kusampaula+ bana Israyeli. Aboobo Jonatani mwana wa Simea,+ imwanookwabo a Davida wakalijaya lintu eelyo.
8 Aaba mbabakali balunyungu lwa Refaimu+ ku Gati,+ eelyo bakajaigwa a Davida alimwi ababelesi bakwe.