1 Samuele

25 Lino Samuele+ wakafwa; alimwi bana Israyeli boonse bakabungana akumulila kumane bakamuzikka kuŋanda yakwe ku Rama.+ Mpoonya Davida wakanyamuka akuunka kunkanda ya Parani.

2 Lino kwakali mwaalumi iwakali kukkala ku Maoni,+ pele wakali kubelekela ku Karimeli.*+ Ooyu mwaalumi wakalivwubide kapati; wakajisi mbelele zili 3,000 ampongo zili 1,000, alimwi aciindi eeco wakali kugela mbelele zyakwe ku Karimeli. 3 Zina lyakwe wakali Nabala+ eelyo mukaintu wakwe wakali Abigayeli.+ Mukaintu ooyu wakali musongo alimwi wakali mubotu, pele mulumaakwe wakali mukali amilimo yakwe yakali mibi;+ alimwi wakali muna Kalebe.+ 4 Mpoonya Davida wakamvwa munkanda kuti Nabala wakali kugela mbelele zyakwe. 5 Aboobo Davida wakatuma balombe bali kkumi kuli Nabala, eelyo Davida wakaambila balombe aaba kuti: “Kamuya ku Karimeli, eelyo mwasika kuli Nabala mundijuzizye nguwe. 6 Mpoonya mwaambe kuti, ‘Woongole akupona kabotu* alimwi abamuŋanda yako bapone kabotu kubikkilizya azintu zyako zyoonse. 7 Lino ndamvwa kuti ugela mbelele. Beembezi bako nibakali andiswe, kunyina cibi ncitwakabacita pe,+ alimwi kunyina cintu ncobakasweekelwa ciindi coonse ncobakali ku Karimeli. 8 Kobabuzya balombe bako balakwaambila. Kobafwida luzyalo balombe bangu, nkaambo twaboola aciindi cibotu.* Lino ndakukomba kobapa kufwumbwa ncojisi babelesi bako alimwi amwanaako Davida.’”+

9 Aboobo balombe ba Davida bakaunka akumwaambila Nabala majwi oonse ngaakabaambila Davida. Nibakamana kumwaambila, 10 Nabala wakavwiila babelesi ba Davida kuti: “Ino Davida nguni, alimwi ino mwana wa Jese ooyo nguni? Mazuba aano babelesi ibatija kuzwa kuli basimalelaabo bavwula kapati.+ 11 Sena ndeelede kubweza cinkwa cangu, maanzi aangu anyama yangu njindajaila basikugela bangu akuzipa bantu mbonditazyi ankobazwa?”

12 Bamvwe boobo balombe ba Davida bakapiluka akuunka kulinguwe kuyoomulwiida majwi oonse aaya. 13 Mpoonya aawo Davida wakaambila baalumi bakwe kuti: “Umwi aumwi alyaangilile panga lyakwe!”+ Aboobo boonse bakalyaangilila mapanga aabo alimwi awalo Davida wakalyaangilila panga lyakwe, kumane baalumi basika ku 400 bakaunka a Davida, eelyo bali 200 bakasyaala kabalindilila zintu.

14 Lino mulombe umwi wakaambila Abigayeli mukaintu wa Nabala kuti: “Davida watumide bantu kuzwa kunkanda kuti baanzye simaleleesu, pele walo wabakalalila kapati.+ 15 Baalumi aaba bakali kabotu kapati kulindiswe. Tiibakatupenzya pe alimwi tiitwakasweekelwa cintu nociba comwe ciindi coonse notwakali ambabo musyokwe.+ 16 Bakali mbuli bwaanda bwakatucingilide, syikati amasiku, ciindi coonse notwakali ambabo katweembela mbelele. 17 Lino kozyiba cakucita, nkaambo simaleleesu bakanza kumucitila cibi abamuŋanda yakwe boonse,+ alimwi muntu ooyu wabuyo*+ taambiliki pe.”

18 Aboobo cakufwambaana Abigayeli+ wakabweza zinkwa zili 200, nsazi zipati zyobilo zyawaini, mbelele zyosanwe zijaidwe kale, zisuwo* zyosanwe zyamaila aayokedwe, zibbuubbu zyamisaansa miyumu izili 100 azibbuubbu zyankuyu izili 200 akuzibikka zyoonse ambongolo.+ 19 Mpoonya wakaambila babelesi bakwe kuti: “Kamuya kumbele lyangu; eelyo mebo ndilamutobela.” Pele mulumaakwe Nabala tanaakamwaambila cili coonse.

20 Lino naakali kuyaabuya katantide ambongolo akuselemuka cilundu, aciindi ncicona eeco Davida abaalumi bakwe bakali kuselemukila nkwaakali kuletezya, eelyo wakaswaangana ambabo. 21 Lino Davida wakali kwaamba kuti: “Ndakalipenzya buyo kulanganya zintu zyoonse zyamuntu ooyu munkanda. Kunyina cintu cakwe nociba comwe cakasweeka,+ pele walo wandicitila cibi musyule lyakumucitila cibotu.+ 22 Aboobo Leza abasubule kapati basinkondonyina Davida* ikuti naa ndisiye naba omwe akati kabaalumi* bakwe boonse kusikila mafwumofwumo.”

23 Lino Abigayeli naakamubona Davida, wakafwambaana kuseluka ambongolo akukotama kubusyu bwa Davida, wakavwuntama ansi. 24 Mpoonya wakawida kumaulu aa Davida akwaamba kuti: “Mulandu ube alindime, Osimalelaangu; akaka kondileka ndemubelesi wako ndikwaambile alimwi koswiilila majwi aangu ndemubelesi wako. 25 Akaka simalelaangu utabikkili maano kumwaalumi ooyu wabuyo Nabala,+ nkaambo uli mbubonya mbolyaamba zina lyakwe. Izina lyakwe ngu Nabala,* aboobo bufwubafwuba buli mulinguwe. Pele mebo ndemubelesi wako, tiindababona balombe aabo mbootumide. 26 Lino simalelaangu, Jehova mbwali muumi alimwi ayebo mboli muumi, Jehova nguwakulesya+ kuti utabi amulandu wabulowa+ alimwi nguwakukasya kupilusya cibi.* Basinkondonyoko abaabo bayanda kukubisizya simalelaangu ababe mbuli Nabala. 27 Lino cipego* eeci+ ncindaleta kulinduwe ndemubelesi wako, acipegwe kubalombe bakutobela simalelaangu.+ 28 Kondilekelela kaka ndemubelesi wako, nkaambo Jehova uyoopa kuti ŋanda+ yako izumanane kuyuma nkaambo yebo simalelaangu ulwana nkondo zya Jehova,+ alimwi kunyina bubi bwajanika mulinduwe mazuba oonse aabuumi bwako.+ 29 Kuti naa muntu wakutobela akuyanda kuti akujaye, Jehova Leza wako uyookwabilila buumi bwako mbubonya mbuli muntu mbwavwunga zintu ziyandisi mucibbeeke, pele buumi bwabasinkondonyoko uyoobufwusa mbuli mabwe aafwuswa kuzwa munkwisyo. 30 Ciindi Jehova aakucitila simalelaangu zintu zibotu zyoonse nzyaakasyomezya alimwi akukubikka kuba musololi wa Israyeli,+ 31 tokausi naa kupenga* mumoyo wako akaambo kakutila bulowa kakunyina mulandu alimwi akupilusya cibi.*+ Ciindi Jehova aakukucitila cibotu simalelaangu, ukandiyeeye ndemubelesi wako.”

32 Aboobo Davida wakati kuli Abigayeli: “Aalumbwe Jehova Leza wa Israyeli iwakutuma sunu kuti uzooswaangane andime! 33 Leza akulongezye akaambo kabusongo bwako! Ulongezyegwe akaambo kakundilesya sunu kuba amulandu wabulowa+ alimwi akupilusya cibi.* 34 Nikwatali boobo, masimpe mbubonya Jehova Leza wa Israyeli mbwali muumi iwandilesya kucita cintu cibi kulinduwe,+ ikuti niwatafwambaana kuboola kuzooswaangana andime,+ ncobeni kusikila mafwumofwumo nikwatasyaala mwaalumi* naba omwe kuli Nabala.”+ 35 Mpoonya Davida wakatambula zintu nzyaakamuletela Abigayeli akumwaambila kuti: “Koya kuŋanda yako muluumuno. Ndaswiilila jwi lyako alimwi ndilakucitila ncoyanda.”

36 Kumane Abigayeli wakapiluka kuli Nabala iwakali kupobola mbuli mwami muŋanda yakwe, alimwi Nabala wakalikondedwe mumoyo akukolwa kusika mpoceela. Abigayeli tanaakamwaambila Nabala cintu cili coonse kusikila nobwakaca. 37 Lino mafwumofwumo Nabala naakakololokwa, mukaintu wakwe wakamwaambila makani aaya. Aboobo moyo wakwe wakaba mbuli wamuntu uufwide, wakoona akuyuma mbuli bbwe. 38 Nikwakwainda mazuba aali kkumi, Jehova wakamujaya Nabala.

39 Lino Davida naakamvwa kuti Nabala wafwa, wakati: “Aalumbwe Jehova, iwandibetekela makani aakusampaulwa+ kwangu kuli Nabala+ akundilesya kucita bubi ndemubelesi wakwe, alimwi Jehova wapilusizya+ Nabala bubi bwakwe akububikka amutwe wakwe!” Kumane Davida wakatuma balombe kuli Abigayeli kuti bakamwaambauzizye kutegwa amukwate. 40 Aboobo babelesi ba Davida bakasika kuli Abigayeli ku Karimeli akumwaambila kuti: “Davida watutuma kulinduwe kuti tukutole ube mukaintu wakwe.” 41 Mpoonya aawo Abigayeli wakanyamuka akuvwuntama ansi akwaamba kuti: “Mebo ndemuzike wanu ndililibambilide nokuba kusanzya maulu+ aababelesi basimalelaangu.” 42 Mpoonya cakufwambaana Abigayeli+ wakanyamuka akutanta ambongolo yakwe eelyo babelesi bakwe basimbi bosanwe bakali kweendela musyule lyakwe; aboobo wakaunka antoomwe abatumwa ba Davida akuba mukaintu wakwe.

43 Lino Davida wakakwete kale Ahinoamu+ kuzwa ku Jezreeli,+ eelyo aaba bobilo bakaba bamakaintu bakwe.+

44 Pele Saulo wakakwasizye kale Mikala+ mwanaakwe, imukaintu wa Davida, kuli Paliti+ mwana wa Laisi iwakali waku Galimu.