Jeremiya
9 Eelo kaka nicali cibotu ikuti mutwe wangu niwali maanzi,
Ameso aangu naali kasensa kamisozi!+
Nindali kulila isyikati amasiku
Akaambo kabantu bajaidwe akati kabantu bangu.
2 Eelo kaka nicali cibotu ikuti nindalijisi busena bwakukkala bwabasilweendo munkanda!
Nindabasiya bantu bangu akuunka kuzwa kulimbabo,
Nkaambo boonse buyo mbaasimamambe,+
Nkakamu kabantu bampelenge.
3 Bapeta milaka yabo mbuli mboboongomeka mata;
Bubeji ikutali kusyomeka, mbobunji mucisi.+
“Bayaabwiindila buya kubija,
Alimwi tabandibikkili maano mebo pe,”+ mbwaamba Jehova.
4 “Umwi aumwi wanu acenjelele mweenzinyina,
Alimwi mutamusyomi naba mwanookwanu pe.
5 Umwi aumwi ucenga mweenzinyina,
Alimwi kunyina waamba masimpe.
Bayiisya milaka yabo kwaamba zyakubeja.+
Balaliminya beni kucita zintu zibi.
6 Yebo ukkede akati kalweeno.
Bakakaka kundizyiba akaambo kalweeno lwabo,” mbwaamba Jehova.
7 Aboobo mboobu mbwaamba Jehova wamakamu:
“Ndiyoobanyengulula akubalingula,+
Nkaambo ino mbuti bumbi mbondikonzya kumucita mwana musimbi wabantu bangu?
8 Mulaka wabo muvwi uujaya iwaamba buyo zyalweeno.
Amulomo wakwe imuntu waamba zyaluumuno kumweenzinyina,
Pele mumoyo wakwe ulimuteede.”
9 “Sena tandeelede kubapa mulandu akaambo kazintu eezyi?” mbwaamba Jehova.
“Sena tandeelede kucisubula cisi cili boobu?+
10 Ndiyoolila akoomoka akaambo kamalundu
Alimwi ndiyakwiimba lwiimbo lwabuumba* akaambo kamacelelo aamunkanda,
Nkaambo aumpwa cakuti taakwe muntu wiinda mulingawo,
Alimwi taakwe banyama bavwubwa balimvwisya kabalila.
Bayuni bauluka mujulu alimwi abanyama bamusyokwe, boonse buyo batija; baunka.+
11 Ndiyoopa kuti Jerusalemu ube buyo milwi yamabwe,+ busena bukkala bamwaaba,+
Alimwi minzi ya Juda ndiyakwiipa kuba matongo, aatakkalwi bantu.+
12 Ino nguni musongo uukonzya kucimvwisya eeci?
Ino nguni Jehova ngwaambila amulomo wakwe kutegwa acaambilizye?
Nkaambo nzi cisi ncicanyonyoonwa?
Nkaambo nzi ncicaumpwa mbuli nkanda,
Cakuti kunyina wiinda mulincico?”
13 Jehova wakavwiila kuti: “Akaambo kakuti baukaka mulawo* wangu ngundakababikkila, alimwi akaambo kakuti tiibaswiilila akutobela jwi lyangu. 14 Muciindi caboobo, bakali kutobela myoyo yabo cankazi,+ alimwi bakali kutobela zikozyanyo zya Baala, mbubonya mbobakabayiisya bamausyi kuti kabacita.+ 15 Aboobo mboobu mbwaamba Jehova wamakamu, Leza wa Israyeli, ‘Lino bantu aaba ndilabapa kulya cisamu cilula lu, alimwi ndilabanywisya maanzi aajisi musamu uujaya.+ 16 Ndiyoobamwaya akati kamasi aayo ngobatakazyi balo nobaba bamausyi,+ alimwi musyule lyabo ndiyoobatumina panga kusikila mane ndikabamane kubajaya.’+
17 Mboobu mbwaamba Jehova wamakamu,
‘Amucite camaano.
Amwiite bamakaintu baimba nyimbo zyabuumba,*+
Alimwi amutumye mulomo kuli bamakaintu bacibwene kulila, baboole,
18 Kutegwa bafwambaane bazootoomokele,
Kutegwa meso eesu ayende misozi
Akuti zikoye zyesu zikunke maanzi.+
19 Nkaambo kwamvwugwa jwi lyakoomoka mu Ziyoni:+
“Maawe twanyonyoonwa!
Maawe nsoni zyatujaya!
Nkaambo twacisiya cisi cesu, alimwi baamwaya maanda eesu.”+
20 Nywebo nobamakaintu amumvwe jwi lya Jehova.
Matwi aanu aatambule jwi lizwa kumulomo wakwe.
21 Nkaambo lufwu lwatunjilila mumawindo eesu;
Lwanjila mungazi zyesu zikwabilidwe
Kutegwa lujaye bana bali mumigwagwa
Alimwi abalombwana bali mumabuwa aabuleya.’+
22 Koamba kuti, ‘Mboobu mbwaamba Jehova:
“Mitunta yabantu iyakwaalabana mbuli mbolezi mumuunda
Mbubonya mbuli mulongo wamaila aazwa akuceswa aayalene ansi musyule lyasikutebula,
Kakunyina muntu waabungika.”’”+
23 Mboobu mbwaamba Jehova:
“Musongo atalidundi akaambo kabusongo bwakwe;+
Singuzu atalidundi akaambo kanguzu zyakwe;
Awalo muvwubi atalidundi akaambo kabuvwubi bwakwe.”+
24 “Pele ooyo uulidunda aalidunde akaambo kakaambo aaka kakuti:
Ulijisi maano aakumvwisya zintu alimwi ulindizyi mebo,+
Kuti ndime Jehova, ooyo uutondezya luyando lutamani, uubeteka kabotu akucita bululami munyika,+
Nkaambo eezyi nzyezintu nzyendikkomanina,”+ mbwaamba Jehova.
25 “Amubone! Mazuba alaboola,” mbwaamba Jehova, “eelyo nendiyoobapa mulandu bantu boonse bapalwidwe, pele ibacili muciimo cakutapalulwa,+ 26 nkokuti bana Egepita,+ bana Juda,+ bana Edomu,+ bana Amoni,+ bana Moabu+ alimwi abaabo boonse bageledwe malezu aamumpobe aabo ibakkala munkanda;+ nkaambo masi oonse taapalwidwe, alimwi bamuŋanda ya Israyeli boonse tabapalwidwe mumoyo.”+