Jeremiya
18 Ndeeli jwi ilyakamusikila Jeremiya kuzwa kuli Jehova: 2 “Nyamuka, uselemukile kuŋanda yamubumbi,+ eelyo ookuya ndiyookupa kumvwa majwi aangu.”
3 Aboobo ndakaselemukila kuŋanda yamubumbi, eelyo ookuya ndakajana ucita mulimo wakwe kumavwili aamubumbi. 4 Pele cintu eeco ncaakali kubumba abulongo cakanyonyooka mujanza lyakwe. Aboobo wakapanga cintu cimbi abulongo oobo, kweelana ancaakabona kuti ncecibotu mumeso aakwe.*
5 Mpoonya ijwi lya Jehova lyakandisikila kaliti: 6 “‘Sena nywebo tandikonzyi kumucita mbuli mbwaacita mubumbi ooyu, nywebo nobamuŋanda ya Israyeli?’ mbwaamba Jehova. ‘Amubone! Mbubonya mbuli bulongo mujanza lyamubumbi, anywebo mbomubede mujanza lyangu, nywebo nobamuŋanda ya Israyeli.+ 7 Kufwumbwa ciindi nendaamba kujatikizya bwami naa cisi+ kuti ndilacizyula, ndilacimwaya alimwi akucinyonyoona, 8 mpoonya cisi eeco caleka bubi bwancico oobo mbondaamba, nkokuti andime ndilacinca maano kujatikizya mapenzi ngondali kukanza kuciletela.+ 9 Pele kufwumbwa ciindi nendaamba kujatikizya bwami naa cisi kuti ndilaciyaka akucisimpa, 10 mpoonya calo cacita cintu cibi mumeso aangu akutaswiilila jwi lyangu, nkokuti andime ndilacinca maano kujatikizya bubotu mbondali kukanza kucicitila.’
11 “Aboobo lino, ndalomba, kobaambila bantu ba Juda alimwi abaabo bakkala mu Jerusalemu kuti, ‘Mboobu mbwaamba Jehova: “Amubone, ndilibambila kumuletela* mapenzi nywebo alimwi ndijisi makanze aakumulwana. Ndakomba, amuleke nzila zyanu zibi, amubambulule nzila zyanu alimwi amicito yanu.”’”+
12 Pele balo bakati: “Tacigwasyi pe!+ Swebo tunootobela buyo mizeezo yesu, alimwi umwi aumwi wesu unoocita zintu kweelana ankazi zili mumoyo wakwe mubi.”+
13 Aboobo mboobu mbwaamba Jehova:
“Akaka, amulibuzyile nobeni akati kamasi.
Ino nguni wakamvwide kale cintu cili boobu?
Nakalindu wa Israyeli wacita cintu cibi kapati iciyumya mate mukanwa.+
14 Sena caanda caku Lebano cilamana aamandomba aali kumingenyu yancico?
Sena maanzi aatontola aakunka kuzwa kulamfwu kuli naatiyuminine?
15 Pele bantu bangu bandiluba.+
Nkaambo baumpa zipaizyo* kucintu cabuyo,+
Alimwi balebya bantu munzila zyabo, mutuzila twansiku,+
Kuti beende mutuzila twamumabali aamugwagwa tutasumbude alimwi tutayalene,*
16 Kutegwa bacite cisi cabo kuba cintu cigambya+
Alimwi cakunoosibila mulosi lyoonse mane kukabe kutamani.+
Bantu boonse bainda kumbali aancico bayoocilanga cakugambwa alimwi akupukunya mitwe.+
17 Ndiyoobamwaya kumbele lyabasinkondonyina mbuli kuti bamwaigwa amuwo uuzwa kujwe.
Ndiyoobapa syule lyangu, ikutali busyu mubuzuba bwalunyonyooko lwabo.”+
18 Mpoonya bakaamba kuti: “Amuboole, tupangane cakumucita Jeremiya,+ nkaambo mulawo* taukoomana kubapaizi besu, alwalo lulayo talukoomana kubantu basongo noliba jwi kubasinsimi. Amuboole tumwaambe zibi,* alimwi tutazibikkili maano nzyaamba.”
19 Kondibikkila maano, O Jehova,
Akuswiilila nzyobaamba aabo bandikazya.
20 Sena bubotu bweelede kujolelwa abubi?
Nkaambo buumi bwangu+ babusyida cilindi.
Koyeeya mbondakali kwiima kumbele lyako akwaamba zintu zibotu kujatikizya mbabo,
Kuti ndilesye bukali bwako kulimbabo.
21 Aboobo bana babo kobaaba kunzala,
Akubatola kunguzu zyapanga.+
Bamakaintu babo kobapa kufwidwa bana, akuba bamukabafwu.+
Baalumi bali akati kabo abajaigwe acilwazi cijaya,
Balombwana babo abajaigwe apanga munkondo.+
22 Akumvwugwe jwi lyakulila mumaanda aabo
Ciindi yebo nobaletela zigwebenga zisaala cakutayeeyelwa.
Nkaambo bandisyida cilindi kuti bandijate
Alimwi bateya tukole kuti maulu aangu acegwe.+
23 Pele yebo, O Jehova,
Ulaazyi kabotu makanze oonse ngobajisi aakundijaya.+
Utacivwumbi pe cinyonyoono cabo,
Alimwi utacimwayi cibi cabo kumbele lyako.