Jeremiya
11 Ndeeli jwi lyakamusikila Jeremiya kuzwa kuli Jehova: 2 “Amumvwe majwi aacizuminano eeci, nywebo nobantu!
“Majwi aaya koambila* bantu bamu Juda alimwi abaabo bakkala mu Jerusalemu, 3 ubaambile kuti, ‘Mboobu mbwaamba Jehova Leza wa Israyeli: “Ulisinganizyidwe muntu uutaswiilili majwi aacizuminano eeci,+ 4 ngendakabalailila bamauso mubuzuba obuya nindakabagusya mucisi ca Egepita,+ kuzwa mubbibi lyamulilo lyakunyenguluda butale,+ kuti, ‘Amuswiilile jwi lyangu, alimwi amucite zintu zyoonse nzyendimulaila; eelyo muyooba bantu bangu andime ndiyooba Leza wanu,+ 5 kutegwa ndizuzikizye cikonke ncindakakonka kuli bamauso, kuti ndibape cisi cikunka buci amukupa,+ mbuli mubuzuba obuno.’”’”
Aboobo ndakavwiila kuti: “Ameni,* O Jehova.”
6 Mpoonya Jehova wakandaambila kuti: “Ambilizya majwi aaya oonse muminzi ya Juda alimwi amumigwagwa ya Jerusalemu, kuti: ‘Amumvwe majwi aacizuminano eeci alimwi akwaacita. 7 Nkaambo cakusinizya ndakalailila bamauso mubuzuba nindakabagwisya mucisi ca Egepita kusikila mubuzuba obuno, cakwiinduluka-induluka ndakali kubalaya* kuti: “Amuswiilile jwi lyangu.”+ 8 Pele tiibakaswiilila nokuba kucenjeka matwi aabo; muciindi caboobo, cankazi umwi aumwi wabo wakazumanana kutobela moyo wakwe mubi.+ Aboobo ndakabaletela majwi oonse aacizuminano eeci aayo ngendakabalailila kuti baacite, pele balo bakakaka kwaacita.’”
9 Mpoonya Jehova wakandaambila kuti: “Kuli makanze aabuzangi akati kabantu bamu Juda alimwi abaabo bakkala mu Jerusalemu. 10 Bapilukila kuzinyonyoono zyabamausyi ibakali kumazuba aakaindi, aabo ibakakaka kuswiilila majwi aangu.+ Lino abalo batobela baleza bambi akubabelekela.+ Bamuŋanda ya Israyeli abamuŋanda ya Juda batyola cizuminano cangu ncindakapangana abamausyi.+ 11 Aboobo mboobu mbwaamba Jehova, ‘Ndilabaletela mapenzi+ ngobatakonzyi kutija. Baakundikwiilila kuti ndibagwasye, tandikabavwiili pe.+ 12 Mpoonya minzi ya Juda alimwi abaabo bakkala mu Jerusalemu bayakuunka kuli baleza babo aabo mbobaumpila zipaizyo* ikuyookwiilila lugwasyo,+ pele tabakabafwutuli pe kuciindi camapenzi aabo. 13 Nkaambo baleza bako, O Juda, bavwula mbubonya mbuli minzi yako, alimwi nywebo mwabikkila cintu cisesemya* zipaililo zinji mbubonya mbuli migwagwa ya Jerusalemu, zipaililo zyakuumpila zipaizyo kuli Baala.’+
14 “Lino yebo,* utabapailili bantu aaba pe. Utabakwiilili kulindime nokuba kubaiminina mumupailo,+ nkaambo mebo tandikooswiilila ciindi nobandikwiilila akaambo kamapenzi aabo.
15 Ino muyandwa wangu ujisi nguzu nzi zyakuti kajanika muŋanda yangu
Kakuli bantu banji kapati bacita makanze mabi?
Anyama iisetekene,* sena balaaleya mapenzi aasika kulinduwe?
Sena kuli notiisekelele aciindi eeco?
16 Ciindi cimwi Jehova wakali kukwiita kuti cisamu camaolifa cifwefwema,
Ceebeka, icijisi micelo mibotu.
Akuzuma kupati, walo wamudoneka mulilo,
Alimwi batyola mitabi yancico.
17 “Jehova wamakamu, ooyo iwakakusyanga yebo,+ waamba kuti mapenzi alakusikila akaambo kabubi bwakacitwa abamuŋanda ya Israyeli alimwi abamuŋanda ya Juda, aabo ibandinyemya kwiinda mukuumpa zipaizyo kuli Baala.”+
18 Jehova wakandaambila kutegwa ndizyibe;
Aciindi eciya yebo wakandipa kubona nzyobakali kucita.
19 Mebo ndakali buyo mbuli kana kambelele kataputauki ikatolwa kukujaigwa.
Tiindakazyi kuti bakanza ndime, kabati:+
“Atucinyonyoone cisamu antoomwe amicelo yancico,
Alimwi atumukosole munyika yabaumi,
Kutegwa zina lyakwe litakayeeyegwi limbi.”
Akaka andilibonene mbotiibasubule,
Nkaambo kaambo kangu ndakabikka mumaanza aako.
21 Aboobo mboobu mbwaamba Jehova kubantu baku Anatoti+ aabo bayanda kukujaya,* kabati: “Toyelede kusinsima muzina lya Jehova,+ buyo-buyo tulakujaya”; 22 aboobo mboobu mbwaamba Jehova wamakamu: “Lino ndilabasubula. Balombwana babo bayoojaigwa apanga,+ eelyo bana babo basankwa abasimbi bayoofwa anzala.+ 23 Takukasyaali muntu naba omwe akati kabo, nkaambo ndiyoobaletela mapenzi bantu baku Anatoti,+ mumwaka ngobayoosubulwa.”