Jeremiya
16 Ijwi lya Jehova lyakandisikila alimwi kaliti: 2 “Toyelede kukwata mukaintu, alimwi toyelede kuba abana basankwa abasimbi mubusena oobu pe. 3 Nkaambo mboobu mbwaamba Jehova kujatikizya bana basankwa abasimbi ibazyalwa mubusena obuno, alimwi akujatikizya bamanyina babazyala abamausyi bapa kuti bazyalwe mucisi ecino: 4 ‘Bayoofwa akaambo kazilwazi zijaya,+ pele tabakalilwi nokuba kuzikkwa; bayooba mbuli mbolezi atala aanyika.+ Bayooloba akaambo kapanga anzala,+ eelyo mitunta yabo iyooba cakulya cabayuni bauluka mujulu acabanyama baanyika.’
5 Nkaambo mboobu mbwaamba Jehova,
‘Utanjili muŋanda mobacitila pobwe basimalila,
Alimwi utaunki kuyoolila akuyoobaumbulizya+ pe.’
‘Nkaambo mebo ndabanyanga luumuno lwangu bantu aaba,’ mbwaamba Jehova,
‘Noluba luyando lwangu lutamani alimwi aluse lwangu.+
6 Ibapati alimwi abaniini, boonse buyo bayoofwa mucisi eeci.
Tabakazikkwi pe,
Kunyina uuyoobalila,
Alimwi kunyina muntu uuyoolinengaula naa kulinyoola munkulu akaambo kambabo.*
7 Alimwi kunyina uuyoobapa cakulya aabo balila,
Kuti abaumbulizye akaambo kabafwu babo;
Alimwi kunyina uuyoobapa nkapu yakubatontozya myoyo
Kuti banywe akaambo kakufwidwa bausyi naa banyina.
8 Utanjili muŋanda yakupobweda
Akukkala ambabo kuti ulye akunywa.’
9 “Nkaambo mboobu mbwaamba Jehova wamakamu, Leza wa Israyeli, ‘Amubone, mumazuba aanu alimwi kamulangilila nywebo nobantu, ndiyoopa kuti limane jwi lyakusekelela ajwi lyakukondwa, ijwi lyasibwiinga ajwi lyanabwiinga+ mubusena obuno.’
10 “Bantu aaba waakubaambila majwi aaya oonse bayookubuzya kuti, ‘Ino nkaambo nzi Jehova ncaambila kuti tulasikilwa mapenzi aaya oonse mapati? Ino ncinyonyoono nzi alimwi ncibi nzi ncotwacita kuli Jehova Leza wesu?’+ 11 Yebo ukabavwiile kuti, ‘“Akaambo kakuti bamauso bakandisiya,”+ mbwaamba Jehova, “eelyo bakazumanana kutobela baleza bambi, bakali kubabelekela akubakotamina.+ Pele bakandisiya mebo, alimwi tiibakaubamba mulawo wangu pe.+ 12 Alimwi nywebo nzyomwacita zilainda kubija aali zyeezyo nzyobakacita bamauso,+ alimwi umwi aumwi wanu utobela nkazi zyamoyo wakwe mubi muciindi cakumvwida ndime.+ 13 Aboobo ndiyoomuvwululusya kuzwa mucisi eeci akumusowela mucisi ncomutazyi nywebo, nobaba bamauso,+ eelyo ooko muyoobelekela baleza bambi isyikati amasiku,+ nkaambo tandikamufwidi luzyalo pe.”’
14 “‘Nokuba boobo, mazuba alaboola,’ mbwaamba Jehova, ‘eelyo nobatakaambi limbi kuti: “Masimpe Jehova mbwali muumi, ooyo wakagwisya bana Israyeli mucisi ca Egepita!”+ 15 pele kuti: “Masimpe Jehova mbwali muumi, ooyo wakagwisya bana Israyeli kuzwa kucisi cakunyika alimwi akuzwa kuzisi zyoonse nkwaakabamwailide!” eelyo ndiyoobapilusya kucisi cabo eeco ncondakapa bamausyi.’+
16 ‘Mpaawa lino ndiita bazubi banji,’ mbwaamba Jehova,
‘Eelyo bayoobazuba.
Mpoonya ndiyakwiita bavwimi banji,
Eelyo bayoobavwima mumalundu oonse amutulundu toonse
Alimwi amuŋanzi zyamyala.
17 Nkaambo meso aangu alizibwene zyoonse nzyobacita.*
Tabasisidwe kumbele lyangu pe,
Acalo cinyonyoono cabo tacisisidwe mumeso aangu.
18 Aboobo cakusaanguna, ndiyoobapa cisubulo ceelene acinyonyoono cabo alimwi acibi cabo,+
Nkaambo basofwaazya cisi cangu amitunta yamituni yabo iisesemya
Alimwi bazuzya lukono lwangu azintu zyabo zivwundausya kumoyo.’”+
19 O Jehova, onguzu zyangu amampangala aangu,
Obusena bwangu bwakutijila mubuzuba bwamapenzi,+
Masi ayooboola kulinduwe kuzwa kumagolelo aanyika,
Akwaamba kuti: “Bamatata bakakona buyo bubeji,
Zintu zyabuyo alimwi azintu zitagwasyi.”+
20 Sena muntu ulakonzya kulipangila baleza
Kakuli tabali baleza beni-beni?+
21 “Aboobo ndilabapa kuzyiba,
Inzya aciindi eeci ndilabapa kuzyiba janza lyangu alimwi anguzu zyangu,
Eelyo bayoozyiba kuti izina lyangu ndime Jehova.”