Joshua
23 Lino nokwakainda mazuba manji kuzwa ciindi Jehova naakapa bana Israyeli kulyookezya+ koonse-koonse kuzwa kuli basinkondonyina, eelyo Joshua naakacembaala akuba amyaka minji,+ 2 Joshua wakaita bana Israyeli boonse,+ baalu babo, basololi babo, babetesi babo abasilutwe babo,+ akubaambila kuti: “Mebo ndacembaala; ndaba amyaka minji. 3 Nywebo mwakalibonena zyoonse Jehova Leza wanu nzyaakacita kumisyobo eeyi yoonse akaambo kandinywe, nkaambo Jehova Leza wanu nguwakali kumulwanina.+ 4 Amubone, ndakamupa nyika yamisyobo yakasyaala kuti ibe lukono lwamisyobo+ yanu kwiinda mukuuma cisolo,+ antoomwe ayeeyo yamisyobo njindakanyonyoona,+ kuzwa ku Jordano kusikila ku Lwizi Lupati* kumbo.* 5 Jehova Leza wanu nguwakali kuyaabubatanda kuzwa kubusyu bwanu+ akubaatula akaambo kandinywe, alimwi mwakaibweza nyika yabo mbubonya Jehova Leza wanu mbwaakamusyomezya.+
6 “Lino mweelede kuba basicamba kapati kutegwa mubambe akucita zyoonse zilembedwe mubbuku lya Mulawo+ wa Musa kuti mutaleyi kuzwa kulinguwo kululyo naa kulumwensyi,+ 7 alimwi akutavwelana amisyobo eeyi+ iisyeede akati kanu. Tamweelede kwaamba mazina aabaleza babo+ naa kukonka muzina lyabo, alimwi tamweelede kubabelekela naa kubakomba pe.+ 8 Pele mweelede kukakatila kuli Jehova Leza wanu,+ mbubonya mbomucita kusikila sunu. 9 Jehova uyootanda misyobo mipati alimwi iili anguzu kuzwa kubusyu bwanu,+ nkaambo taakwe muntu naba omwe wakakonzya kwiima kubusyu bwanu kusikila sunu.+ 10 Omwe wanu uyootandaanya bantu bali 1,000,+ nkaambo Jehova Leza wanu nguumulwanina,+ mbubonya mbwaakamusyomezya.+ 11 Aboobo amupakamane lyoonse+ kwiinda mukumuyanda Jehova Leza wanu.+
12 “Pele ikuti naa mwaleya akukakatila kuli bamasi basyeede+ akati kanu, akukwatana ambabo+ alimwi akuvwelana ambabo, 13 mweelede kuzyiba kuti Jehova Leza wanu takazumanani kumwaatwida misyobo eeyi.+ Bayoomubeda kakole, kasilaha acikwabbuzyo mumabazu aanu+ alimwi ambuli mamvwa mumeso aanu kusikila mukamane kufwa munyika eeyi mbotu Jehova Leza wanu njaakamupa.
14 “Lino amubone, ndilaafwaafwi kufwa,* alimwi mulizyi kabotu amyoyo yanu yoonse abuumi bwanu boonse kuti kunyina cisyomezyo nociba comwe catazuzikizyigwa akati kazisyomezyo zibotu zyoonse Jehova Leza wanu nzyaakamusyomezya. Zyoonse zyacitika kulindinywe. Kunyina nociba comwe catazuzikizyigwa.+ 15 Pele mbubonya zisyomezyo zibotu zyoonse Jehova Leza wanu nzyaakamusyomezya mbozyazuzikizyigwa kulindinywe,+ mbombubo oobo Jehova mbwayoomuletela mapenzi oonse ngaakaamba alimwi uyoomunyonyoona munyika eeyi mbotu Jehova Leza wanu njaakamupa.+ 16 Ikuti mukatyole cizuminano ca Jehova Leza wanu ncaakamulailila kuti mubambe akutalika kubelekela baleza bambi akubakotamina, bukali bwa Jehova buyoomusikila+ alimwi muyoofwa cakufwambaana munyika mbotu njaakamupa.”+