Jeremiya
3 Bantu babuzya kuti: “Ikuti mwaalumi waleka mukaintu wakwe eelyo mukaintu ooyo waunka akukwatwa kumwaalumi uumbi, sena weelede kumujola alimwi?”
Sena nyika eeyo tiiyasofwaazyigwa kapati?+
“Yebo wacita buvwuule abeenzinyoko banji,+
Aboobo sena weelede kujokela kulindime?” mbwaamba Jehova.
2 “Kowaala meso aako kutulundu tutakwe cintu ubone.
Ino nkuubusena nzi nkootakajatwa abasankwa?
Wakali kubakkalilila kumbali aanzila,
Mbubonya mbuli simutuntuli* mbwakkala munkanda.
Yebo uluujisi kusofwaazya nyika
Amicito yako yabuvwuule alimwi abubi bwako.+
3 Aboobo mvwula yalunywaanywa yalesyegwa,+
Ayalo mvwula yakumamanino aamainza tiiyawa pe.
4 Pele lino yebo undiita kuti,
‘Taata, yebo uli mweenzuma wakubukubusi bwangu!+
5 Sena muntu weelede kukkala kanyemede lyoonse,
Nokuba kubikkilila mane kukabe kutamani?’
Eeci ncencico ncoamba yebo,
Pele uluujisi kucita zibi, zyoonse nzyokonzya kucita.”+
6 Mumazuba aa Mwami Josiya+ Jehova wakati kulindime: “‘Sena wamubona ncaacita Israyeli uutasyomeki? Waunka atala aamalundu oonse malamfwu amunsi lyazisamu zyoonse zifwefwema kutegwa akacitile nkuko buvwuule.+ 7 Noliba leelyo naakamanizya kucita zintu zyoonse eezyi, mebo ndakazumanana kumwaambila kuti apiluke kulindime,+ pele walo tanaakapiluka pe; awalo Juda wakali kwiide kumulanga mucizyi wakwe mumpelenge.+ 8 Ndibone boobo, ndakamutanda Israyeli uutasyomeki akumupa lugwalo lwakumulekela limwi+ akaambo kabumambe bwakwe.+ Pele Juda mucizyi wakwe imumpelenge tanaakayoowa pe; awalo wakaunka akutalika kucita buvwuule.+ 9 Wakaubya-ubya makani aabuvwuule bwakwe, alimwi wakazumanana kusofwaazya nyika akucita bumambe amabwe alimwi azisamu.+ 10 Nokuba kuti zintu zyoonse eezyi zyakacitika, mucizyi wakwe Juda imumpelenge tanaakapiluka kulindime amoyo wakwe woonse, pele wakali kulicengeezya buyo,’ mbwaamba Jehova.”
11 Mpoonya Jehova wakandaambila kuti: “Israyeli uutasyomeki walitondezya kuti uliluleme kapati kwiinda Juda mumpelenge.+ 12 Koya, ukaambilizye majwi aaya kunyika kuti:+
“‘“Akaka kopiluka, yebo Israyeli omuzangi,” mbwaamba Jehova.’+ ‘“Tandikoomulanga cabukali pe,+ nkaambo mebo ndilasyomeka,” mbwaamba Jehova.’ ‘“Tandikoozumanana kunyema* mane kukabe kutamani. 13 Lino kouzumina buyo mulandu wako, nkaambo wazangila Jehova Leza wako. Wakazumanana kumwaya luyando* lwako kubeenzu* munsi lyazisamu zyoonse zifwefwema, pele tiimwakaswiilila jwi lyangu pe,” mbwaamba Jehova.’”
14 “Akaka amupiluke, nywebo nobana bazangi,” mbwaamba Jehova. “Nkaambo mebo ndaba simalelaanu* mwini-mwini; ndiyoomubweza, omwe-omwe kuzwa mumunzi umwi aumwi alimwi bobilo-bobilo kuzwa mumusyobo umwi aumwi, eelyo ndiyoomuleta ku Ziyoni.+ 15 Mpoonya ndiyoomupa beembezi beendelana amoyo wangu,+ eelyo bayoomusanina luzyibo alimwi abupampu. 16 Mumazuba aayo nywebo muyoovwula akuzyala micelo munyika,” mbwaamba Jehova.+ “Tabakaambi limbi kuti, ‘Bbokesi lyacizuminano ca Jehova!’ Talikayeeyegwi limbi mumoyo, tabakaliibaluki nokuba kulizula alimwi takukapangwi limbi pe. 17 Kuciindi eeco bayakwaamba Jerusalemu kuti ncuuno cabwami ca Jehova;+ alimwi masi oonse ayoobunganizyigwa ku Jerusalemu kuzootembaula zina lya Jehova,+ alimwi tabakabi limbi basinkazi ibatobela myoyo yabo mibi.”
18 “Mumazuba aayo bayakweenda antoomwe, nkokuti bamuŋanda ya Juda abamuŋanda ya Israyeli,+ alimwi bayoozwa antoomwe mucisi cakunyika akunjila mucisi ncindakapa bamauso kacili lukono lwabo.+ 19 Mebo ndakayeeya kuti, ‘Eelo kaka ndilikkomene kumubikka akati kabana bangu akumupa nyika iiyandwa kapati, lukono lubotu kapati akati kamasi!’*+ Alimwi ndakali kuyeeya kuti muyoondiita kuti, ‘Taata!’ akuti tamukaleki pe kunditobela. 20 ‘Ncobeni mbuli mukaintu mbwasiya mulumaakwe* cabumpelenge, mbombubo andinywe nobamuŋanda ya Israyeli mbomwandicitila cabumpelenge,’+ mbwaamba Jehova.”
21 Atala aatulundu tutakwe cintu kwamvwika majwi,
Majwi aakulila akukombelezya kwabana Israyeli,
Nkaambo bapilinganya nzila yabo beni;
Bamuluba Jehova Leza wabo.+
22 “Akaka amupiluke, nywebo nobana bazangi.
Mebo ndilaponya buzangi bwanu.”+
“Ndiswe aano! Twaboola kulinduwe,
Nkaambo yebo, O Jehova, ndonduwe Leza wesu.+
23 Ncobeni tulundu-lundu alimwi aciyoyooyo camumalundu nzyabuyo.+
Ncobeni muli Jehova Leza wesu momuli lufwutuko lwa Israyeli.+