Isaya
25 O Jehova, nduwe Leza wangu.
Ndilakulemeka, nditembaula zina lyako,
Nkaambo wacita zintu zigambya,+
Wazuzikizya makanze aako aansiku,+
Cakusyomeka+ acalusinizyo.
2 Nkaambo wasandula munzi kuba mulwi wamabwe,
Imunzi uukwabilidwe kuba citantaala buyo,
Ingazi yabamuzwakule taicili munzi;
Taikayakululwi limbi pe.
4 Nkaambo waba matijilo kumuntu uupengede,
Matijilo kumuntu mucete kumapenzi+ aamujisi,
Mayubilo kumvwula yaguwo,
Alimwi cimvwiide cakuyusila kupya kwazuba.+
Ciindi bukali bwabantu basilunya nobuli mbuli mvwula yaguwo yuuma kubwaanda,
5 Mbuli kupya munyika iinyina maanzi,
Yebo ulaumuzya kuyobeka kwabeenzu.
Mbubonya kupya mbokumanizyigwa acimvwule cakkumbi,
Alwalo lwiimbo lwabantu basilunya mbolumanizyigwa.
6 Mucilundu eeci,+ Jehova wamakamu uyoobambila bantu boonse
Pobwe lyazyakulya zibotu zyamafwuta,+
Ipobwe lyawaini mubotu kapati,*
Lyazyakulya zibotu zyamafwuta zizwide mooma,
Lyawaini mubotu kapati, iwakaminununwa.
7 Mucilundu eeci uyoonyonyoona* mulembo uuvwumbide bantu boonse
Alimwi acivwumbyo civwumbide masi oonse.
8 Uyoolumena* lufwu mane kukabe kutamani,+
Alimwi Mwami Singuzuzyoonse Jehova uyoosindula misozi kumasyu oonse.+
Uyoogwisya masampu aabantu bakwe munyika yoonse,
Nkaambo Jehova lwakwe nguwaamba makani aaya.
9 Mubuzuba oobo, bayakwaamba kuti:
“Amubone! Ooyu ngo Leza wesu!+
Ooyu ngu Jehova!
Twali kumulangila.
Atukondwe akusekelela mulufwutuko luzwa kulinguwe.”+
10 Nkaambo janza lya Jehova linooli acilundu eeci,+
Eelyo cisi ca Moabu+ ciyoolyataukwa mubusena bwancico
Mbuli bwizu mbobulyataukwa akuba mulwi wambolezi.
11 Uyookwasula maanza aakwe mulincico
Mbubonya mbuli muntu uusaya mbwaakwasula nasaya,
Eelyo uyoomanizya kulisumpula kwancico+
Kafwusa maanza aakwe cabupampu.
12 Awalo munzi uukwabilidwe, amalambo aako malamfwu aalukwabilizyo,
Walo uyakuunyonyoona;
Uyakuuwisyila ansi, mulusuko.