1 Batesalonika

4 Lino kumamanino bakwesu, mbubonya mbotwakamulailila kujatikizya mbomweelede kweenda kutegwa kamukkomanisya Leza,+ alimwi ncobeni oobo mbomweenda, tulamulomba akumukombelezya kwiinda mu Mwami Jesu kuti muzumanane kucita oobo kwiinda mbomucita lino. 2 Nkaambo mulaazyi malailile ngotwakamupa kuzwa ku Mwami Jesu.

3 Nkaambo Leza ncayanda nceeci cakuti kamusalala+ akulilesya kubwaamu.*+ 4 Umwi aumwi wanu azyibe kweendelezya mubili wakwe+ mwini munzila iisalala+ alimwi mubulemu, 5 ikutali muluunyaunya lwabulyato,+ mbuli loolo lujisi bamasi batamuzyi Leza.+ 6 Kutabi muntu naba omwe weelede kuciindizya akulida munyina masuku atala aamutwe mumakani aaya, nkaambo Jehova* nguupa cisubulo kujatikizya zintu eezyi zyoonse, mbubonya mbotwakamwaambilila limwi akumucenjezya cakusinizya. 7 Nkaambo Leza tanaakatwiitila busofwaazi pe, pele wakatwiitila kuti katusalala.+ 8 Aboobo imuntu uukaka njiisyo eeyi, tanyansyi muntu pe, pele unyansya Leza+ ooyo uumupa muuya wakwe uusalala.+

9 Pele ikujatikizya luyando lwabunyina,+ tatweelede kumulembela buya pe, nkaambo nywebo lwanu muyiisyigwa a Leza kuti kamuyandana.+ 10 Mubwini mulacita oobo kubakwesu boonse mu Makedoniya moonse. Pele lino bakwesu tumukulwaizya kuti muzumanane kucita boobo kwiinda waawo. 11 Amusoleke canguzu kukkala muluumuno,+ kamuyeeya buyo makani aanu+ alimwi akubeleka amaanza aanu nobeni,+ mbubonya mbotwakamulailila, 12 kutegwa kamweenda bweelede mumeso aabantu bakunze+ akutabula cintu cili coonse.

13 Kunze lyaboobo bakwesu, tatuyandi kuti mube bantu batazyi makani aajatikizya baabo iboona mulufwu,+ ikutegwa mutabi abuumba mbuli bamwi boonse ibatajisi bulangizi.+ 14 Nkaambo ikuti katusyoma kuti Jesu wakafwa alimwi wakabuka,+ nkokuti abalo aabo iboona mulufwu ikwiinda muli Jesu, Leza uyoobabusya ikutegwa bakabe anguwe.+ 15 Nkaambo kweelana ajwi lya Jehova* tumwaambila kuti, aabo ibasyaalizi akati kesu ibanoopona kuciindi cakubako kwa Mwami kunyina pe nobayoosaangunina baabo iboona mulufwu; 16 nkaambo Mwami lwakwe uyooseluka kuzwa kujulu akwaambilizya ajwi lyanguzu, ijwi lyasilutwe wabangelo+ alimwi amweembo wa Leza, eelyo aabo bafwide kabakamantene a Kristo bayoosaanguna kubuka.+ 17 Kuzwa waawo swebo tobasyaalizi notunoopona, antoomwe ambabo, tuyookwempelwa mumakumbi+ kuyoocingana a Mwami mujulu;+ aboobo tuyookkala a Mwami lyoonse.+ 18 Aboobo amuzumanane kuumbulizyanya amajwi aaya.