Matalikilo
35 Kumane Leza wakati kuli Jakobo: “Nyamuka uunke ku Beteli+ akuyookkala nkukonya ooko, alimwi ukamuyakile cipaililo Leza mwini-mwini, ooyo iwakalibonya kulinduwe nookali kutija munyoko Esau.”+
2 Mpoonya Jakobo wakaambila bamuŋanda yakwe abantu boonse mbaakali limwi kuti: “Amusowe baleza boonse bakubeja bali akati kanu+ alimwi amulisalazye akucinca zisani zyanu, 3 atunyamuke twiinke ku Beteli. Okuya ndiyoomuyakila cipaililo Leza mwini-mwini, ooyo iwakandigwasya muciindi camapenzi alimwi ooyo iwali andime kuli koonse nkondaunka.”+ 4 Aboobo bakapa Jakobo baleza bakubeja boonse mbobakajisi amasikkiyo aakali kumatwi aabo, eelyo Jakobo wakazizikka* munsi aacisamu cipati icakali afwaafwi amunzi wa Sekemu.
5 Lino nibakazumanana kweenda, buyoofwu buzwa kuli Leza bwakabajata bantu bamuminzi yakali afwaafwi, aboobo tiibakabatobela bana ba Jakobo. 6 Mpoonya Jakobo wakasika ku Luzi,+ munyika ya Kanana, nkokuti Beteli, walo abantu boonse mbaakali limwi. 7 Ooko wakayaka cipaililo alimwi busena oobu wakabuulika kuti Eli-beteli,* nkaambo ooko Leza mwini-mwini wakalibonya kulinguwe ciindi naakali kutija munyina.+ 8 Kumane Debora+ sikulela mwana wa Rebeka wakafwa, eelyo wakazikkwa afwaafwi a Beteli munsi aacisamu cipati. Aboobo cisamu eeci wakacuulika kuti Aloni-bakuti.*
9 Leza wakalibonya alimwi kuli Jakobo naakali kuzwa ku Padani-aramu, eelyo wakamulongezya. 10 Mpoonya Leza wakati kulinguwe: “Izina lyako nduwe Jakobo.+ Tocinakwiitwi limbi kuti Jakobo, pele unakwiitwa kuti Israyeli.”+ 11 Leza alimwi wakamwaambila kuti: “Ndime Leza Singuzuzyoonse.+ Amuzyalane muvwule. Mulinduwe muyoozwa makamu aabantu,+ alimwi abami bayoozwa mulinduwe.+ 12 Alimwi nyika njindakapa Abrahamu a Izaka ndiyakwiipa kulinduwe akulunyungu lwako iluyooboola musyule lyako.”+ 13 Mpoonya Leza wakazwa akumusiya abusena aawo mpaakali kwaambawida anguwe.
14 Aboobo Jakobo wakaimika bbwe abusena mpaakaambawida anguwe, ibbwe lyaciibalusyo, kumane wakatila cituuzyo cinyugwa alimwi amafwuta alindilyo.+ 15 Alimwi Jakobo wakazumanana kwiita busena aawo Leza mpaakaambawida anguwe kuti Beteli.+
16 Mpoonya bakanyamuka kuzwa ku Beteli. Eelyo kabacili alamfwu kusika ku Efrata, Rakele wakatalika kumyongwa alimwi kutumbuka kwakwe kwakakatazya kapati. 17 Pele naakali kukatazyigwa kutumbuka, sikutumbusya wakamwaambila kuti: “Utayoowi pe, nkaambo ulazyala mwana musankwa aumbi.”+ 18 Lino buumi bwakwe nobwakali kuyanda kumusiya (nkaambo wakali afwaafwi kufwa) wakaulika mwana ooyu kuti Beni-oni,* pele bausyi bakamuulika kuti Benjamini.*+ 19 Aboobo Rakele wakafwa alimwi wakazikkwa nobakali munzila kuya ku Efrata, ku Betelehemu.+ 20 Mpoonya Jakobo wakabikka bbwe acuumbwe cakwe; eeli bbwe mpolicili acuumbwe ca Rakele kusikila sunu.
21 Kuzwa waawo Israyeli wakanyamuka akuyakwiimika tente lyakwe alaale, kunze aangazi ya Ederi. 22 Ciindi Israyeli naakali kukkala munyika eeyo, Rubeni wakoona a Biliha mwanakasuwa umwi wabausyi, alimwi Israyeli wakaamvwa makani aaya.+
Aboobo Jakobo wakaba abana basankwa bali 12. 23 Bana ba Leya kuli Jakobo mbaaba: Mutaanzi wakali Rubeni,+ mpoonya Simeoni, Levi, Juda, Isakara a Zebuloni. 24 Bana ba Rakele mbaaba: Josefa a Benjamini. 25 Alimwi bana ba Biliha, mubelesi wa Rakele mbaaba: Dani a Nafutali. 26 Eelyo bana ba Zilipa, mubelesi wa Leya mbaaba: Gadi a Aseri. Aaba mbabana ba Jakobo mbaakazyala naakali mu Padani-aramu.
27 Mukuya kwaciindi Jakobo wakasika ku Mamure+ ikwakali Izaka usyi, ku Kiriyati-ariba, nkokuti Hebroni, ooko Abrahamu alimwi a Izaka nkobakali kukkala kabali beenzu.+ 28 Izaka wakapona myaka iili 180.+ 29 Mpoonya Izaka wakafwa akuzikkwa mbubonya bwakazikkwa bamasyaanene bakwe kacembeede akupona myaka minji, ibana bakwe ba Esau a Jakobo bakamuzikka.+