1 Batesalonika

3 Aboobo, nocakatwaalila kuzumanana kuliyumya, twakabona kuti inga cainda kubota kuti twazumanana kukkala tolikke mu Atene;+ 2 eelyo twakatuma Timoteyo,+ imukwesu alimwi mubelesi wa Leza* mumakani mabotu aajatikizya Kristo, kutegwa amuyumye akumuumbulizya mulusyomo lwanu, 3 kutegwa kutabi muntu naba omwe uuzungaanizyigwa amapenzi aaya. Nkaambo nywebo nobeni mulizyi kuti tatukonzyi kwaaleya mapenzi aaya.*+ 4 Nkaambo notwakali andinywe, twakali kumwaambilila limwi kuti tuyoocitikilwa mapenzi, alimwi eeco ncicacitika mbubonya mbomuzyi.+ 5 Nkakaambo kaako, nindakakakilwa kuzumanana kuliyumya, ndakamutuma kulindinywe kutegwa ndizyibe kusyomeka kwanu,+ nkaambo ambweni munzila imwi Sikusunka+ wakamusunka alimwi mulimo wesu wakaba wabuyo.

6 Pele Timoteyo wasika ino-ino aawa ikuzwa kulindinywe+ alimwi watwaambila makani mabotu kujatikizya kusyomeka kwanu aluyando ndomujisi, kuti mulatwiibaluka lyoonse caluyando, alimwi mulayandisisya kutubona mbubonya aswebo mbotuyandisisya kumubona nywebo. 7 Nkakaambo kaako bakwesu, mumause* amumapenzi eesu oonse twaumbulizyigwa akaambo kandinywe alimwi alusyomo ndomutondezya.+ 8 Akaambo kakuti muliimvwi nji mu Mwami, twayumizyigwa alimwi.* 9 Nkaambo ino inga twamulumba buti Leza twalanga mbotukondedwe kapati kumbele lya Leza wesu akaambo kandinywe? 10 Syikati amasiku tupaila mipailo yakukombelezya camoyo woonse kutegwa tukamubone cantongolameso akuyungizya zibulide kulusyomo lwanu.+

11 Lino Leza wesu alimwi Taateesu lwakwe alimwi a Mwami wesu Jesu abatubambile nzila kutegwa tuboole kulindinywe. 12 Kunze lyaboobo, Mwami amupe kuyungizya, inzya, amupe kuyungizya luyando ndomujisi kuli umwi amweenzinyina+ akubantu boonse, mbubonya mbotucita kulindinywe, 13 ikutegwa ayumye myoyo yanu, kaitakwe kampenda mukusalala kumeso aa Leza+ wesu alimwi Taateesu kuciindi cakubako kwa Mwami wesu+ Jesu antoomwe abasalali bakwe boonse.