Jobu
39 “Sena ulicizyi ciindi mpongo zyamumalundu nozizyala?+
Sena yebo wakazibona insya kazizyala bana bazyo?+
2 Sena ulaibala myezi njobakkwanya banyama aaba kabatanazyala?
Sena ulicizyi ciindi ncobazyala?
3 Balasunsumana ciindi nobazyala bana babo,
Eelyo balaleka kumyongwa.
4 Bana babo balaba anguzu alimwi bakomenena musyokwe;
Balaunka alimwi tabajoki kuli bamanyina.
5 Ino nguni wakapa kuti mbongolo yamusyokwe kailicelela,+
Alimwi ino nguni wakayaangununa ntambo mbongolo yamusyokwe?
6 Cibanda camucimpayuma ndakacipanga kuti cibe munzi wanjiyo
Akuti kiikkala munyika yacikula.
7 Mbongolo yamusyokwe ilaseka lupyopyongano luli mumunzi;
Alimwi taimvwi kusabila kwamuntu wiitanda.
8 Ileendeenda mumalundu, kiiyandaula macelelo,
Iyandaula bwizu buli boonse busyuukide.
9 Sena mupoho wamusyokwe* inga wazumina kukubelekela?+
Sena inga woona mucaanda cabanyama bako?
10 Sena yebo ulakonzya kumupopa mupoho wamusyokwe kuti akulimine mifwolo,
Naa sena inga wakutobela kuti akakulimine* mukkuti?
11 Sena ulasyoma nguzu zyakwe zinji
Akumulekela kuti acite mulimo wako uuminya?
12 Sena ulamusyoma kuti ulakuletela maila* ngotebula,
Alimwi sena walo ulayobolola akuleta maila kulubuwa lwako lwakuumina maila?
13 Mpowani ilavwapaula mababa aanjiyo cakukkomana,
Pele sena mababa amapepe aanjiyo alakonzya kweelana aatongola?+
14 Nkaambo yalo ilasiya mayi aayo ansi,
Akwaakasaazya mubulongo.
15 Ilaluba kuti kuulu kulakonzya kwaapwaya
Naa kuti munyama wamusyokwe ulakonzya kwaalyata.
16 Bana banjiyo ilabacitila calunya, mbuli kuti tabali banjiyo;+
Tiilibiliki kuti milimo yanjiyo ilakonzya kuba yabuyo.
17 Nkaambo Leza wakayiima* busongo
Alimwi kunyina naakaipa maano.
18 Pele ciindi niivwundumuka akuvwapaula mababa aanjiyo,
Ilaseka bbiza ayooyo uutantide aalindilyo.
19 Sena nduwe uupa bbiza nguzu?+
Sena ulalisamika ngala zivwupauka munsingo?
20 Sena ulakonzya kulipa kuti lisotauke mbuli nsozi?
Bulemu bwakulila kwandilyo bulayoosya.+
22 Lilaseka zintu ziyoosya alimwi taliyoowi pe.+
Talizyuuluki akutija akaambo kapanga.
23 Inkomwe yamivwi ilacokola kumbali lyandilyo,
Isumo alimwi amuumba zilamweka.
25 Mbolyamvwida buyo kulila kwamweembo lilati, ‘Ehee!’
Kalicili kooko lilanunkizya nkondo
Alimwi lilamvwa koompolola kwabeendelezi babasikalumamba alimwi aloompololo lwankondo.+
26 Sena sikakonze ulauluka kuya mujulu akaambo kamaano aako,
Akutandabika mababa aakwe kumusanza?
27 Sena nduwe uulailila sikwaze kuti auluke kuya mujulu+
Akuti ayake citeente cakwe mujulu,+
28 Alimwi akuti kaona ajeleele masiku,
Kuti kakkala mumayubilo aakwe aali atala lyandomba?*
30 Bana bakwe balanywa bulowa;
Alimwi kufwumbwa nkobabede aabo bajaidwe, awalo nkwabede.”+