2 Makani
30 Hezekiya wakatumya mulomo kubana Israyeli+ boonse aba Juda, alimwi wakalemba magwalo kubana Efraimu a Manase+ kuti baboole kuŋanda ya Jehova ku Jerusalemu kutegwa bacitile Jehova Leza wa Israyeli Pobwe Lyakwiindilila.+ 2 Nokuba boobo, mwami, basilutwe bakwe alimwi ambungano yoonse mu Jerusalemu bakasala kucita Pobwe Lyakwiindilila mumwezi wabili,+ 3 nkaambo tiibakakonzya kucita oobo aciindi cibikkidwe+ akaambo kakuti tabali banji bapaizi ibakalisalazyide+ alimwi bantu tiibakabungana mu Jerusalemu. 4 Bubambe oobu bwakamubotela mwami ambungano yoonse. 5 Aboobo bakaambilizya mu Israyeli yoonse kuzwa ku Beere-seba kusikila ku Dani,+ kuti bantu baboole akucita Pobwe Lyakwiindilila lya Jehova Leza wa Israyeli mu Jerusalemu, nkaambo kwaciindi cili mbocibede tiibakali kucita pobwe eeli kabali nkamu kweelana ambokulembedwe mumulawo.+
6 Mpoonya batumwa bakabweza magwalo kuzwa kumwami akuli basilutwe bakwe akuunka mu Israyeli yoonse a Juda kweelana ambwaakalailila mwami kuti: “Nobana Israyeli, amupiluke kuli Jehova Leza wa Abrahamu, Izaka a Israyeli, kutegwa apiluke kulindinywe nomusyeede, nomwakafwutuka kumaanza aabami ba Asuri.+ 7 Mutabi mbuli bamauso alimwi abanabokwanu ibatakasyomeka kuli Jehova Leza wabamausyi cakuti wakabacita kuba cintu cigambya mbuli mbomubwene.+ 8 Lino mutayumyi myoyo yanu mbuli mbobakacita bamauso.+ Amulibombye kuli Jehova akuboola kutempele lyakwe+ ndyaasalazya kukabe kutamani, mubelekele Jehova Leza wanu kutegwa bukali bwakwe buyaka mbuli mulilo bumuleke.+ 9 Nkaambo kuti naa mwapiluka kuli Jehova, banabokwanu abana banu balafwidwa luzyalo kulibaabo bakabatola mubuzike+ alimwi bayoozumizyigwa kupiluka kunyika eeyi,+ nkaambo Jehova Leza wanu ngusiluse alimwi ngusilweetelelo,*+ alimwi takamufwutatili ikuti naa mwapiluka kulinguwe.”+
10 Aboobo batumwa bakaunka munzi amunzi munyika yoonse ya Efraimu a Manase+ mane kusikila ku Zebuloni, pele bantu bakali kubaseka akubafwubaazya.+ 11 Nokuba boobo, bantu bamwi baku Aseri a Manase alimwi aku Zebuloni bakalibombya akuboola ku Jerusalemu.+ 12 Alimwi janza lya Leza mwini-mwini lyakali abantu bamu Juda kutegwa libakamantanye* kuti batobele ncaakabalailila mwami abasilutwe kwiinda mujwi lya Jehova.
13 Lino nkamu mpati yabantu yakabungana antoomwe ku Jerusalemu kuti bacite Pobwe lya Zinkwa Zitajisi Bumena+ mumwezi wabili;+ yakali mbungano mpati kapati. 14 Mpoonya bakanyamuka akugwisya zipaililo zyakali mu Jerusalemu+ alimwi azipaililo zyoonse zyatununkilizyo bakazigwisya+ akuyoozisowela mu Kkuti lya Kidroni. 15 Kumane bakajaya cipaizyo ca Pobwe Lyakwiindilila mubuzuba bwa 14 bwamwezi wabili. Eelyo bapaizi aba Levi bakafwa nsoni aboobo bakalisalazya akuleta zituuzyo zyuumpwa kuŋanda ya Jehova. 16 Bakaima mumasena aabo kweelana a Mulawo ngubakapedwe a Musa imuntu wa Leza mwini-mwini; mpoonya bapaizi bakasansaila bulowa+ mbobakatambula kuzwa kuba Levi. 17 Kwakali bantu banji mumbungano ibatakaningalisalazya, ba Levi mbabakali kujaya zipaizyo zya Pobwe Lyakwiindilila zyabaabo boonse ibakasofweede,+ kuti babasalazye kuli Jehova. 18 Kwakali mweelwe mupati wabantu, ikapati aabo ibakazwa ku Efraimu, Manase,+ Isakara a Zebuloni ibatakaningalisalazya pele ibakalya Pobwe Lyakwiindilila nokuba kuti tiibakali kweelela kweelana ambokulembedwe. Nokuba boobo Hezekiya wakabapailila ulaamba: “Jehova imubotu+ alekelele 19 umwi aumwi iwabamba moyo wakwe kukuyandaula Leza mwini-mwini+ Jehova, Leza wabamausyi, nokuba kuti tasalazyidwe kweelana amalailile aakusalazyigwa.”+ 20 Aboobo Jehova wakauswiilila mupailo wa Hezekiya akubalekelela* bantu.
21 Mpoonya bana Israyeli ibakali mu Jerusalemu bakacita Pobwe lya Zinkwa Zitajisi Bumena+ mazuba aali ciloba kumwi kabasekelela,+ alimwi ba Levi abapaizi bakali kutembaula Jehova buzuba abuzuba kabalizya kapati zibelesyo zyakwiimbya kuli Jehova.+ 22 Kuyungizya waawo, Hezekiya wakabayumya-yumya ba Levi boonse ibakali kubelekela Jehova cabusongo. Bakalya pobwe eelyo lyakabikkidwe mazuba aali ciloba+ kumwi kabatuula zipaizyo zyalumvwano+ akulumba Jehova Leza wabamausyi.
23 Mpoonya mbungano yoonse yakazumina kucita pobwe mazuba aambi aali ciloba, aboobo bakacita oobo mazuba aambi aali ciloba kabasekelela.+ 24 Mwami Hezekiya wa Juda wakasanga bapoho bali 1,000 ambelele zili 7,000 kumbungano, eelyo basilutwe bakasanga bapoho bali 1,000 ambelele zili 10,000 + kumbungano; alimwi bapaizi banji bakazumanana kulisalazya.+ 25 Mpoonya mbungano yoonse ya Juda, bapaizi, ba Levi ambungano yoonse yakaboola kuzwa kucisi ca Israyeli+ alimwi abeenzu+ ibakazwa kucisi ca Israyeli abaabo ibakali kukkala mu Juda bakazumanana kusekelela. 26 Aboobo kwakaba kusekelela kupati mu Jerusalemu, nkaambo kuzwa mumazuba aa Solomoni mwana wa Davida mwami wa Israyeli, kwakanyina cintu cili boobu cakacitikide kale mu Jerusalemu.+ 27 Mpoonya bapaizi iba Levi bakaimikila akulongezya bantu;+ eelyo Leza wakaamvwa majwi aabo alimwi mupailo wabo wakasika kujulu, kubusena bwakwe busalala.