1 Timoteyo
1 Ndime Paulo, imwaapostolo wa Kristo Jesu kwiinda mukulaililwa a Leza Mufwutuli wesu alimwi a Kristo Jesu, ibulangizi bwesu,+ 2 nendalembela nduwe Timoteyo,*+ omwanaangu mwini-mwini+ mulusyomo kuti:
Iluzyalo, luse alimwi aluumuno kuzwa kuli Leza Taata akuli Kristo Jesu Mwami wesu azibe anduwe.
3 Mbubonya mbondakakukulwaizya kuti ukkale mu Efeso nindakali afwaafwi kuunka ku Makedoniya, ndakwaambila mbubonya alino, ikutegwa ubalailile bamwi kuti baleke kuyiisya njiisyo zimbi, 4 naa kubikkila maano kutwaano twakubeja+ alimwi amakani aamilongo yamazyalani. Izintu eezyi zinyina mpindu abuniini,+ pele ziletela buyo kuzumbauzya muciindi cakupa zintu zizwa kuli Leza iziyumya lusyomo. 5 Mubwini, imakanze aamalailile aaya ngakuti tube aluyando+ luzwa mumoyo uutuba amanjezyeezya mabotu alimwi alusyomo+ lwini-lwini lutali lwakuupaupa ameso. 6 Kwiinda mukuleya kuzintu eezyi, bamwi bakeenwa akutalika kwaamba makani aabuyo.+ 7 Bayanda kuba bamayi+ bamulawo, pele kabatazizyi nzyobaamba noziba zintu nzyobakakatila kwaamba kuti zililuzi.
8 Lino tulizyi kuti Mulawo uli kabotu kufwumbwa kuti muntu kautobela bweelede 9 kazyi kuti mulawo taubikkilwi muntu mululami pe, pele ubikkilwa bantu bataswiilili+ alimwi ibazangi, basampaula Leza abasizibi, batasyomeki,* basampaula zintu zisalala, basikujaya bamausyi abasikujaya bamanyina, abaabo bajaya bantu, 10 basibwaamu,* baalumi boona baaluminyina, basikubba bantunyina, babeji, basikukonka cakubeja, acintu cimbi cili coonse cikazyanya anjiisyo mbotu*+ 11 yeendelana amakani mabotu aabulemu aazwa kuli Leza uukkomene, aayo ngondakapegwa.+
12 Ndilamulumba Kristo Jesu Mwami wesu, ooyo wakandipa nguzu, nkaambo wakandibona kuti ndilasyomeka kwiinda mukundipa mulimo wakucita,+ 13 nokuba kuti musyule ndakali sikusampaula Leza asikupenzya bantu bakwe alimwi asikasampusampu.+ Nokuba boobo, ndakafwidwa luse, nkaambo ndakacita zintu cakutazyiba alimwi ndakanyina lusyomo abuniini. 14 Pele luzyalo lwa Mwami wesu lwakavwula kapati antoomwe alusyomo alimwi aluyando luli muli Kristo Jesu. 15 Majwi aaya alasyomeka alimwi ayelede kutambulwa cakumaninina: Kristo Jesu wakaboola munyika kuti afwutule basizibi.+ Ali baaba mebo ndime ndiindide.+ 16 Nokuba boobo, ndakafwidwa luse ikutegwa kwiinda mulindime, mebo ndesizibi kwiinda boonse, Kristo Jesu atondezye kukkazika moyo kwakwe koonse kutegwa ndibe citondezyo kuli baabo ibanoojisi lusyomo mulinguwe akuyoojana buumi butamani.+
17 Lino ku Mwami walyoonse alyoonse,+ ooyo uutafwi+ alimwi uutalibonyi,+ alimwi uuli ngo Leza alikke,+ akube lulemeko abulemu lyoonse mane kukabe kutamani. Ameni.
18 Malailile aaya ndakupa kuti waatobele mwanaangu, Timoteyo, kweelana azyakasinsimwa kujatikizya nduwe, kutegwa kwiinda mulinzizyo uzumanane kulwana nkondo mbotu,+ 19 ujatisye lusyomo amanjezyeezya mabotu,+ eezyo bamwi nzyobasowela ambali, eelyo lusyomo lwabo lwanyonyooka mbuli bwato bwaloba mulwizi. 20 Humenayo+ alimwi a Alekizanda bali akati kabaaba, alimwi ndabaaba kuli Saatani+ kutegwa kwiinda mukusubulwa baiye kuti tabeelede kusampaula Leza.