2 Bakorinto
8 Lino bakwesu tuyanda kumuzyibya luzyalo lwa Leza ilwakatondezyegwa kumbungano zyaku Makedoniya.+ 2 Ciindi bantu bamumbungano eezyi nobakali kusunkwa kapati mumapenzi, lukkomano lwabo lutalivwulili abucete bwabo butaambiki zyakapa kuti bwaabi bwabo buvwule kapati. 3 Nkaambo bakapa kweelana ambobakali kukonzya,+ inzya, ndilakonzya kubacitila bumboni kuti, bakacita boobo kwiindilila ambobakali kukonzya.+ 4 Cakulisungula bakazumanana kutulomba akutukombelezya kapati kuti bazumizyigwe kuba acoolwe cakupa alimwi akutola lubazu mumulimo wakugwasya basalali.+ 5 Alimwi ikutali buyo kweelana ambotwakali kulangila pe, pele cakusaanguna bakalipa ku Mwami mpoonya akulindiswe kwiinda mukuyanda kwa Leza. 6 Aboobo twakayumya-yumya Tito+ kuti, mbwaanga nguwakautalisya mulimo ooyu wakupa camoyo omwe akati kanu, ngonguwe weelede akuumanizya. 7 Nokuba boobo, mbubonya mbomuli bavwubi muzintu zyoonse, mulusyomo, mukwaambaula, muluzyibo, mubusungu boonse alimwi amuluyando ndotujisi kulindinywe, amube bavwubi amumulimo ooyu wakupa camoyo omwe.+
8 Tandaambi boobu kuti ndimubikkile mulawo pe, pele kutegwa ndimuzyibye busungu bwabamwi akuti ndibone mboluli lwini-lwini luyando ndomujisi. 9 Nkaambo muliluzyi luzyalo lwa Mwami wesu Jesu Kristo, kuti nokuba kuti wakali muvwubi, wakaba mucete akaambo kandinywe,+ ikutegwa mube bavwubi kwiinda mubucete bwakwe.
10 Alimwi mukaambo aaka ndimupa muzeezo ooyu:+ Eeci cigwasya ndinywe, mbwaanga lino kwainda mwaka omwe kuzwa ciindi nomwakatalika kucita mulimo ooyu alimwi tiimwakatalika buyo kuucita pe pele alimwi mwakatondezya kuti mulayandisisya kuucita. 11 Aboobo lino, amuumanizye mulimo ooyo ngomwakatalika kucita, ikutegwa mucizuzikizye eeco ncomwakalibambilide kucita kweelana anzyomujisi. 12 Nkaambo ikuti kusaanguna muntu kalibambilide, eeco ncapa cilatambulika ikapati kuti wacipa kweelana anzyajisi+ ikutali kweelana anzyatajisi. 13 Nkaambo tandiyandi kuti bamwi zibaubile, pele nywebo zimuyumine pe; 14 pele ndiyanda kuti zintu ziindilide nzyomujisi lino zizulizye kubulizya kwabo, ikutegwa baakuba aziindilide abalo bakazulizye kubulizya kwanu, ikutegwa kube kweelana. 15 Mbubonya mbokulembedwe kuti: “Imuntu wakajisi zinji tanaakajisi zinji kapati, amuntu wakajisi zisyoonto tanaakajisi zisyoonto kapati.”+
16 Lino aalumbwe Leza akaambo kakuti wapa moyo wa Tito+ kuba abusungu mbubonya mbotujisi aswebo kulindinywe, 17 nkaambo mubwini tanaatobela buyo kuyumya-yumya kwesu, pele alimwi cakuyandisisya, walisungula lwakwe mwini kuboola kulindinywe. 18 Pele antoomwe anguwe twatuma mukwesu umwi uulumbaizyigwa mumbungano zyoonse akaambo kamilimo njacita kujatikizya makani mabotu. 19 Kutali buyo boobo, pele alimwi mbungano zyakamusala kuti keenda andiswe notweendelezya bwaapauzi bwazipego zipegwa amoyo omwe kutegwa Mwami apegwe bulemu alimwi akutondezya kuti tulilibambilide kugwasya bamwi. 20 Aboobo tatuyandi muntu uuli woonse kutupa mulandu mumulimo wazyakusanga zinji zipegwa amoyo omwe nzyotweendelezya.+ 21 Nkaambo ‘zyoonse tulazilanganya cakusyomeka ikutali buyo kumbele lya Jehova,* pele alimwi akumbele lyabantu.’+
22 Kunze lyaboobo, antoomwe ambabo twatuma mukwesu aumwi ooyo bunji bwaziindi ngotwasola akujana kuti musungu muzintu zinji, pele lino iwasungwaala kwiindilila akaambo kakuti ulamusyoma kapati nywebo. 23 Pele ikuti naa kuli mibuzyo njomujisi kujatikizya Tito, amuzyibe kuti mweenzuma alimwi ngusimilimoma uubelekela ndinywe; alimwi ikuti naa kuli mibuzyo njomujisi kujatikizya bakwesu, amuzyibe kuti mbaapostolo bambungano alimwi mbulemu bwa Kristo. 24 Aboobo amutondezye kuti mulabayanda,+ alimwi amuzitondezye mbungano kaambo ncotwakali kulidunda kujatikizya ndinywe.