Isaya
58 “Ongolola canguzu; utayoowi pe!
Pozomoka mbuli mweembo.
Ambilizya kubantu bangu ibuzangi bwabo,+
Akwaambila bamuŋanda ya Jakobo zibi zyabo.
2 Balandiyandaula buzuba abuzuba,
Alimwi batondezya kuti balakkomana kuzyiba nzila zyangu,
Mbuli kuti cakali cisi cakali kucita bululami
Ambuli kuti tiicakasiide bululami bwa Leza wabo.+
Bandibuzya kujatikizya mbeta ziluleme,
Kabakkomanina kuswena afwaafwi a Leza:+
3 ‘Ino nkaambo nzi ncotaboni notuliimya kulya?+
Alimwi nkaambo nzi ncotabikkili maano notulipenzya?’+
Nkaambo buzuba nomuliimya kulya, mucita zintu nzyomuyanda nobeni,
Alimwi mupenzya babelesi banu.+
4 Nomuliimya kulya mulazwangana akulwana,
Alimwi muwaala mfwaindi zyabubi.
Tamukonzyi kuliimya kulya mbuli mbomucita sunu akulangila kuti jwi lyanu limvwugwe kujulu.
5 Sena kuliimya kulya nkondiyanda mbokweelede kuba oobu,
Ibuzuba muntu naile kulipenzya,
Nakotamika mutwe wakwe mbuli bwizu,
Akuyala cisani camasaka alimwi amulota mbuli bulo bwakwe?
Sena eeci ncencico ncoamba kuti nkuliimya kulya alimwi mbuzuba butambulika kuli Jehova?
6 Peepe, nkooku kuliimya kulya nkondiyanda mebo:
Kuti mugusye nketani zyabubi,
Kuti mwaangulule zitolopo zyajoko,+
Kuti muleke bantu bapengede kuti baunke kabaangulukide,+
Akuti mutyole majoko oonse muzibeela zyobilo;
7 Kuti umupe cakulya muntu uufwide nzala,+
Kuti bacete alimwi abantu batajisi kwakukkala ubatambule muŋanda yako,
Kuti wabona muntu uuli amantanda, umupe zisani zyakusama,+
Akuti utalisisi kubanabokwanu.
8 Ikuti wacita boobo mumuni wako uyoomweka mbubonya mbuli bucedo,+
Alimwi uyooponesyegwa cakufwambaana.
Bululami bwako buyookusololela kumbele lyako,
Alimwi bulemu bwa Jehova buyookukwabilila kusyule lyako.+
9 Aboobo yebo uyakwiita, eelyo Jehova uyookuvwiila;
Uyoolilila kugwasyigwa, eelyo walo uyakwaamba kuti, ‘Ndime aano!’
Ikuti naa ukagusye joko lili akati kanu
Alimwi ukaleke kutondeka amunwe wako akwaamba zintu zibyaabi,+
10 Ikuti bantu bafwide nzala ukabape zyakulya nzyoyandisya+
Akukkutya baabo bapenzyegwa,
Nkokuti mumuni wako uyoomweka nomuba mumudima,
Alimwi musinze wako uyoogweemuka mbuli akalangabwaaseme.+
11 Jehova uyookusolweda lyoonse
Akukukkutya nomuba munyika njumu nta;+
Uyooyumya mafwuwa aako,
Eelyo uyooba mbuli muunda uutilailwa kabotu,+
Mbuli kasensa kamaanzi kajisi maanzi aatayuminini.
12 Akaambo kanduwe bantu bayooyakulula matongo aakaindi,+
Mpoonya yebo uyooyakulula ntalisyo zyakumazyalani aakaindi.+
Uyakwiitwa kuti nduwe sikubambulula malambo aandukide,*+
Sikubambulula migwagwa iinookkedwe bantu mumabali.
13 Ikuti akaambo ka Sabata ulilesye* kucita zintu nzyoyanda yebo omwini mubuzuba bwangu busalala+
Alimwi waambe Sabata kuti ncintu cikubotela kapati, buzuba bwa Jehova busalala, ibuzuba bulemekwa,+
Alimwi ikuti ubulemeke muciindi cakucita zintu nzyoyanda yebo omwini akwaamba majwi aabuyo,
14 Nkokuti uyoobotelwa kapati muli Jehova,
Alimwi ndiyookupa kutanta amasena aasumpukide aamunyika.+
Ndiyookupa kulya kulukono lwa Jakobo sikale wako,+
Nkaambo mulomo wa Jehova nguwaamba.”