Milimo
26 Mpoonya Agripa+ wakaambila Paulo kuti: “Wazumizyigwa kulyaambilila omwini.” Eelyo Paulo wakatandabika janza lyakwe akutalika kulyaambilila kuti:
2 “Kujatikizya zintu zyoonse nzyobanditamikizya ba Juda,+ O Mwami Agripa, ndilikkomene kuti nkuumbele lyako nkonditiilyaambilile buzuba obuno, 3 ikapati nkaambo ulizizyi kabotu ziyanza zyoonse alimwi amanyongwe aali akati kaba Juda. Aboobo, ndakulomba kuti undiswiilile cakukkazika moyo.
4 “Mubwini, ibuumi mbondakali kupona kuzwa kubukubusi akati kamusyobo wangu* amu Jerusalemu bulizyibidwe kabotu aba Juda boonse+ 5 ibakandizyi musyule, alimwi inga bapa bumboni kuti kabayanda, ikuti ndakali mu Farisi+ uuzitobela kapati njiisyo zyakakamu kabukombi bwesu.+ 6 Pele lino ndiliimvwi aano kandibetekwa akaambo kabulangizi mbondijisi bwacisyomezyo Leza ncaakaambila bamatata;+ 7 eeci ncecisyomezyo ncoonya misyobo yesu iili 12 ncoilangila kuti cizuzikizyigwe kwiinda mukulitakata kumubelekela mulimo uusetekene syikati amasiku. Ibulangizi oobu mbondijisi mbobandipeda mulandu iba Juda,+ O Mwami.
8 “Nkaambo nzi nywebo ncomutasyomi kuti Leza ulabusya bantu bafwide? 9 Mebo lwangu, ndakalisinizyide kuti ndakeelede kucita zintu zinji zyakukazya Jesu muna Nazareta. 10 Eeci ncindakacita ncobeni mu Jerusalemu alimwi basalali banji ndakabaanga muntolongo,+ nkaambo basilutwe babapaizi bakalindipede nguzu;+ alimwi nobakapegwa mulandu wakujaigwa, ndakazuminizya. 11 Kwiinda mukubasubula ziindi zinji muzikombelo zyoonse, ndakasoleka kubasinikizya kutama lusyomo lwabo; alimwi mbwaanga ndakali abukali kapati kulimbabo, ndakasika nkondibatobela nomuba muminzi yeengelede kuyoobapenzya.
12 “Kandijisi bubi kucita zintu eezyi, cimwi ciindi nindakali kweenda kuya ku Damasiko kanditumidwe alimwi akupegwa nguzu zyoonse kuzwa kuli basilutwe babapaizi, 13 munzila masyikati, O Mwami, ndakabona mumuni uumweka kapati kwiinda mumuni wazuba iwakamweka kuzwa kujulu kundizinguluka mebo alimwi abaabo mbotwakali kweenda limwi.+ 14 Alimwi toonse notwakawida ansi, ndakamvwa jwi mumwaambo wa Chihebrayo kaliti: ‘Saulo, Saulo, ino undipenzyela nzi? Ulalicisa buyo omwini ikuti uzumanane kuzibbakela zibinzyo.’* 15 Pele ndakati: ‘Ino nduwe ni, Mwami?’ Eelyo Mwami wakati: ‘Ndime Jesu ooyo ngopenzya. 16 Nokuba boobo, nyamuka akwiimikila. Nkaambo ndalibonya kulinduwe kutegwa ndikusale kuba mubelesi wangu akamboni wazintu nzyoolibonena azintu nzyondiyookutondezya kumbele kujatikizya ndime.+ 17 Ndiyookuvwuna kubantu aaba alimwi akuli bamasi, nkonditiikutume+ 18 kuyoojalula meso aabo,+ kuyoobagwisya mumudima+ akubanjizya mumumuni+ akubagwisya kubweendelezi bwa Saatani+ kubaleta kuli Leza, kutegwa balekelelwe zibi+ akutambula lukono lupegwa baabo basalazyigwa akaambo kalusyomo lwabo mulindime.’
19 “Aboobo, O Mwami Agripa, tiindakakaka kutobela cilengaano eeco cakujulu, 20 pele kusaanguna abaabo bakali ku Damasiko,+ mpoonya abakali mu Jerusalemu+ alimwi amucooko coonse ca Judaya akuli bamasi, ndakatola mulumbe wakuti beelede kweempwa akusandukila kuli Leza kwiinda mukucita milimo yeendelana akweempwa kwabo.+ 21 Eeci ncicakapa kuti ba Juda bandijate mutempele akuyanda kundijaya.+ 22 Pele akaambo kakuti ndakapegwa lugwasyo kuzwa kuli Leza, ndazumanana kusikila buzuba buno kupa bumboni kubantu-bantu buyo abapati, alimwi tandaambi cintu cili coonse ccita buyo zintu zyakaambwa a Basinsimi a Musa kuti zyakali kuyoocitika,+ 23 kuti Kristo wakali kuyoopenga,+ alimwi mbwaakali kunooli wakusaanguna kubusyigwa kuzwa kubafwu,+ wakali kuyookambauka makani aamumuni kubantu aaba alimwi akuli bamasi.”+
24 Lino Paulo naakali kulyaambilila makani aaya, Fesito wakaamba ajwi pati kuti: “Wasondoka Paulo! Lwiiyo lwaatala lwakupa kusondoka!” 25 Pele Paulo wakati: “Tandisondokede pe, Oolemekwa Fesito, pele ndaamba twaambo twamasimpe alimwi twamaano. 26 Mubwini, imwami ngondaambila cakutayoowa ulaazyi kabotu makani aaya; nkaambo ndilisinizyide kuti kunyina kaambo mumakani aaya nkotazyi, nkaambo zintu eezyi tiizyakacitilwa kunze aacuulu pe.+ 27 Sena yebo, O Mwami Agripa, ulabasyoma Basinsimi? Ndilizyi kuti ulabasyoma.” 28 Pele Agripa wakaambila Paulo kuti: “Muciindi cisyoonto buyo inga wandisandula kuba Munakristo.” 29 Mpoonya Paulo wakati: “Kulomba kwangu kuli Leza nkwakuti kufwumbwa naa muciindi cisyoonto naa cilamfwu, yebo alimwi aboonse buyo ibandiswiilila sunu babe mbubonya mbuli ndime, kugwisya buyo nketani eezyi.”
30 Mpoonya mwami wakanyamuka, eelyo mweendelezi, Berenike abaalumi mbobakakkede limwi bakanyamuka abalo. 31 Pele nobakali kuzwa bakatalika kwaambaula akati kabo kabati: “Imwaalumi ooyu kunyina cintu ncacita iceelede kumupa kujaigwa naa kwaangwa.”+ 32 Mpoonya Agripa wakaambila Fesito kuti: “Imwaalumi ooyu naangununwa ikuti naatakalomba kuti mulandu wakwe utolwe kuli Kaisara.”+