2 Makani
14 Kumane Abija wakoona abamausyi alimwi bakamuzikka mu Munzi wa Davida;+ eelyo Asa mwanaakwe wakaba mwami mubusena bwakwe. Mumazuba aakwe munyika kwakaba luumuno kwamyaka iili kkumi.
2 Asa wakacita zintu zibotu alimwi ziluleme mumeso aa Jehova Leza wakwe. 3 Wakagwisya zipaililo zyabaleza beenzu+ amasena aakukombela alimwi wakapwayaula misemu yamabwe yakukomba+ akugonkaula misemu yazisamu yakukomba.*+ 4 Kuyungizya waawo, wakaambila ba Juda kuti bayandaule Jehova Leza wabamausyi kuti batobele Mulawo akuubamba. 5 Aboobo wakanyonyoona masena aakukombela alimwi azibikkilo zyatununkilizyo muminzi yoonse ya Juda,+ alimwi mubweendelezi bwakwe, bwami oobu bwakazumanana kuba muluumuno. 6 Wakayaka minzi iikwabilidwe mu Juda,+ nkaambo nyika yakali muluumuno alimwi kunyina bakali kumulwana mumyaka eeyo nkaambo Jehova wakamupa kulyookezya.+ 7 Aboobo wakaambila ba Juda kuti: “Atwiiyake minzi eeyi akuyaka malambo kumabazu oonse alimwi angazi+ akubikka milyango ampingizyo. Nkaambo nyika icili yesu akaambo kakuti twayandaula Jehova Leza wesu. Twamuyandaula, eelyo watupa kulyookezya kumabazu oonse.” Aboobo mayake aabo akazwidilila.+
8 Asa wakalijisi basikalumamba bali 300,000 kuzwa mu Juda ibakajisi ntobo zipati amasumo. Kuzwa kuli Benjamini kwakali basikalumamba basinguzu ibali 280,000 ibakajisi ntobo zisyoonto alimwi amata.*+
9 Mpoonya Zera muna Etiopiya wakaunka kuyoobalwana kajisi basikalumamba bali 1,000,000 ankalaki zili 300.+ Naakasika ku Maresha,+ 10 Asa wakaunka kuyoomulwana eelyo bakalibambila kulwana mu Kkuti lya Zefata ku Maresha. 11 Mpoonya Asa wakaita Jehova Leza wakwe+ akwaamba kuti: “O Jehova, tacikwe makani kulinduwe naa aabo mbogwasya mbanji naa tabajisi nguzu.+ Kotugwasya, O Jehova Leza wesu, nkaambo tusyoma* nduwe+ alimwi muzina lyako twaboola kuti tulwane nkamu eeyi.+ O Jehova, nduwe Leza wesu. Utalekeli muntu uulya maila kuti akuzunde.”+
12 Aboobo Jehova wakazunda bana Etiopiya kubusyu bwa Asa a Juda, eelyo bana Etiopiya bakatija.+ 13 Asa abantu mbaakali limwi bakabatandaanya mane kuyoosika ku Gerari,+ eelyo bana Etiopiya bakali kuyaabujaigwa cakuti kunyina wakafwutuka, nkaambo bakanyonyoonwa a Jehova alimwi ampi yakwe. Kumane bakabweza zisaalo zinji kapati. 14 Kuyungizya waawo bakainyonyoona minzi yoonse kuzinguluka Gerari, nkaambo buyoofwu buzwa kuli Jehova bwakabasikila; bakaisaala minzi yoonse nkaambo mulinjiyo mwakali zintu zinji zyakusaala. 15 Alimwi bakaanyonyoona matente aabaabo bakajisi banyama bavwubwa akusaala mbelele zinji ankamela, kumane bakapiluka ku Jerusalemu.