2 Makani
22 Mpoonya bantu bamu Jerusalemu bakabikka Ahaziya* mwanaakwe musyoonto kuba mwami mubusena bwakwe, nkaambo zigwebenga zisaala izyakaboolede kunkambi abana Arabiya zyakabajaya boonse bana bakwe bapati.+ Aboobo Ahaziya mwana wa Jehoramu wakatalika kulela kali mwami wa Juda.+ 2 Ahaziya wakali amyaka iili 22 naakaba mwami, eelyo wakalela kwamwaka omwe mu Jerusalemu. Banyina bakali ba Ataliya+ muzyukulu* wa Omuri.+
3 Lino awalo wakeenda munzila zyabamuŋanda ya Ahabu,+ nkaambo banyina mbabakali basikumulaya mukucita zintu zibi. 4 Alimwi wakazumanana kucita zibi mumeso aa Jehova mbubonya mbuli bamuŋanda ya Ahabu, nkaambo mbibakaba basikumulaya nobakafwa bausyi, calo cakasololela kulunyonyooko lwakwe. 5 Wakalutobela lulayo lwabo akuunka antoomwe a Jehoramu mwana wa Mwami Ahabu wa Israyeli ku Ramoti-gileadi+ kuti bakalwane a Mwami Hazaeli+ wa Siriya, ooko basimata nkobakayasila Jehoramu. 6 Wakapiluka ku Jezreeli+ kuti akapone zilonda nzyobakamucisa ku Rama ciindi naakalwana a Mwami Hazaeli wa Siriya.+
Ahaziya* mwana wa Jehoramu+ mwami wa Juda wakaunka kuyoobona Jehoramu+ mwana wa Ahabu ku Jezreeli nkaambo bakamucisa.*+ 7 Pele Leza wakapa kuti Ahaziya azundwe kwiinda mukumupa kuti aunke kuli Jehoramu; alimwi naakasika wakaunka a Jehoramu kuyooswaangana a Jehu+ muzyukulu* wa Nimusi ooyo Jehova ngwaakananika kuti anyonyoone bamuŋanda ya Ahabu.+ 8 Lino Jehu naakatalika kujaya bamuŋanda ya Ahabu, wakajana basilutwe ba Juda alimwi abana babanabokwabo a Ahaziya, babelesi ba Ahaziya, eelyo wakabajaya.+ 9 Mpoonya wakayandaula Ahaziya; eelyo bakamujata mu Samariya mwaakayubide akumuleta kuli Jehu. Kumane bakamujaya akumuzikka+ nkaambo bakati: “Muzyukulu wa Jehosafati, iwakayandaula Jehova camoyo woonse.”+ Taakwe naba omwe wamuŋanda ya Ahaziya wakajisi nguzu zyakweendelezya bwami.
10 Ataliya+ banyina Ahaziya naakabona kuti mwanaakwe musankwa wafwa, wakabajaya bana bamwami* boonse bamuŋanda ya Juda.+ 11 Nokuba boobo, Jehosabati mwana musimbi wamwami wakabweza Jehoasi+ mwana wa Ahaziya akumubba kuzwa akati kabana bamwami ibakeelede kujaigwa, akumubikka walo antoomwe asikumulela muŋanda yakoona. Jehosabati mwana wa Mwami Jehoramu+ (wakali mukaintu wa Jehoyada+ mupaizi alimwi mucizyi wa Ahaziya) wakacikonzya kumusisa kuzwa kuli Ataliya, aboobo tanaakamujaya pe.+ 12 Jehoasi wakazumanana kukkala antoomwe ambabo kwamyaka iili cisambomwe, kasisidwe muŋanda ya Leza mwini-mwini, ciindi Ataliya naakali kweendelezya munyika eeyo.