2 Bami
18 Lino mumwaka watatu wabulelo bwa Hosea+ mwana wa Ela imwami wa Israyeli, Hezekiya+ mwana wa Mwami Ahazi+ wa Juda wakaba mwami. 2 Wakali amyaka iili 25 naakaba mwami alimwi wakalela myaka iili 29 mu Jerusalemu. Banyina bakali ba Abi* mwana wa Zekariya.+ 3 Wakazumanana kucita ziluleme mumeso aa Jehova,+ mbubonya mbwaakacita Davida sikale wakwe.+ 4 Ngonguwe wakagwisya masena aakukombela+ akupwayaula misemu yamabwe yakukomba,* kugonka musemu wacisamu wakukomba*+ akupwayaula nzoka yamukuba njaakapangide Musa;+ nkaambo kusikila kumazuba aayo bana Israyeli bakacili kuuntumuna busi bwazipaizyo kulinjiyo, alimwi yakali kwiitwa kuti mutuni wanzoka yamukuba.* 5 Wakali kusyoma Jehova Leza+ wa Israyeli; alimwi musyule lyakwe kwakanyina mwami uumbi wakali mbuli nguwe akati kabami ba Juda, nobaba baabo ibakamusaangunina. 6 Wakakakatila kuli Jehova.+ Tanaakaleka kumutobela; wakazumanana kubamba milawo eeyo Jehova njaakapa Musa. 7 Alimwi Jehova wakali anguwe. Kufwumbwa nkwaakali kuunka, wakali kucita cabusongo. Wakamuzangila mwami wa Asuri alimwi wakakaka kumubelekela.+ 8 Ngonguwe wakazunda ba Filisiti+ kusikila ku Gaza azilawo zyawo, alimwi akuzwa kungazi yabalindizi kusikila kumunzi uukwabilidwe.*
9 Lino mumwaka wane wabulelo bwa Mwami Hezekiya, nkokuti mumwaka waciloba wabulelo bwa Hosea+ mwana wa Ela imwami wa Israyeli, Mwami Salimaneseri wa Asuri wakaboola kuzoolwana Samariya akuusinkilila.+ 10 Bakauzunda+ kumamanino aamyaka yotatwe; mumwaka wacisambomwe wabulelo bwa Hezekiya, nkokuti mumwaka wafwuka wabulelo bwa Mwami Hosea wa Israyeli, Samariya wakazundwa. 11 Mpoonya imwami wa Asuri wakatola bana Israyeli kabali baange+ ku Asuri akuyoobakkazika mu Hala amu Habori munsi aamulonga wa Gozani alimwi amuminzi yaba Medi.+ 12 Eeci cakacitika akaambo kakuti tiibakaswiilila jwi lya Jehova Leza wabo, pele bakali kusotoka cizuminano cakwe, alimwi azintu zyoonse Musa mubelesi wa Jehova nzyaakalailila.+ Tiibakaziswiilila pe nokuba kuzitobela.
13 Mumwaka wa 14 wabweendelezi bwa Mwami Hezekiya, Sanakeribu mwami wa Asuri+ wakaboola kuzoolwana minzi iikwabilidwe yoonse ya Juda akwiizunda.+ 14 Aboobo Mwami Hezekiya wa Juda wakatuma mulomo kumwami wa Asuri ku Lakisi kuti: “Ndabisya. Koleka kundilwana alimwi ndilakupa kufwumbwa ncotiindaambile.” Mwami wa Asuri wakaambila Mwami Hezekiya wa Juda kuti ape matalenta* aansiliva aali 300 amatalenta aangolida aali 30. 15 Aboobo Hezekiya wakamupa nsiliva yoonse yakali kukonzya kujanika muŋanda ya Jehova amuziyobwedo zyamuŋanda yamwami.+ 16 Aciindi eeco Mwami Hezekiya wa Juda wakagwisya zijazyo zyatempele+ lya Jehova aminsende njaakazilulwide angolida,+ mpoonya wakazipa mwami wa Asuri.
17 Mpoonya mwami wa Asuri wakatuma Taritani,* Rabisarisi* a Rabisake* kuzwa ku Lakisi+ kuti baunke ku Jerusalemu+ ku Mwami Hezekiya antoomwe ampi mpati yabasikalumamba. Eelyo bakaunka ku Jerusalemu akuyakwiima kukagelo kacizyiba caatala, eeco cili kumugwagwa wamuunda wasikuwasya.+ 18 Lino nobakaita mwami kuti azwe, Eliyakimu+ mwana wa Hilikiya, ooyo iwakali kulanganya basiŋanda yamwami, antoomwe a Sebina+ mulembi alimwi a Joa mwana wa Asafu sikulemba makani bakazwa akuunka kulimbabo.
19 Mpoonya Rabisake wakabaambila kuti: “Amumwaambile Hezekiya kuti, ‘Mboobu mbwaamba mwami mupati, imwami wa Asuri: “Ino ncinzi cikupa kuba sicamba?+ 20 Yebo waamba kuti, ‘Ndilizyi cakucita alimwi ndilaanguzu zyakulwana nkondo,’ pele majwi aaya taagwasyi pe. Ino nguni ooyo ngosyoma cakuti toyoowi kundizangila?+ 21 Bona! Usyoma tete eeli lityokede, nkokuti Egepita,+ itete eelyo linga ikuti naa muntu wayaama aalindilyo, lilakonzya kumuyasa mujanza akubbila. Oobo mbwabede Farao mwami wa Egepita kulibaabo boonse bamusyoma. 22 Alimwi ikuti naa mundaambile kuti, ‘Tusyoma Jehova Leza wesu,’+ sena tali nguwe uuli aamasena aakukombela alimwi azipaililo eezyo nzyaakamwaya+ Hezekiya, akwaambila bantu bamu Juda amu Jerusalemu kuti, ‘Mweelede kukotama ansi kumbele lyacipaililo eeci cili mu Jerusalemu’?”’+ 23 Lino nkooko, amubbejelane asimalelaangu, mwami wa Asuri: Ndilakupa mabbiza aali 2,000 tubone naa ulakonzya kwaajanina basikwaatanta.+ 24 Aboobo ino mbuti mbokonzya kutanda mweendelezi omwe muniini kapati akati kababelesi basimalelaangu, kakuli yebo usyoma nkalaki alimwi abasimabbiza baku Egepita? 25 Lino sena ndaliboolela buyo kakunyina kuzumizyigwa a Jehova kuzoolwana busena oobu akubunyonyoona? Jehova lwakwe nguwakandaambila kuti, ‘Koya ukalwane cisi eeci akucinyonyoona.’”
26 Mpoonya Eliyakimu mwana wa Hilikiya, Sebina+ alimwi a Joa bakaambila Rabisake+ kuti: “Twalomba kaka kuti ubandike ababelesi bako mumwaambo wa Chiaramu,*+ nkaambo tulaumvwa; utaambauli andiswe mumwaambo waba Juda kabamvwide bantu bali atala aabwaanda.”+ 27 Pele Rabisake wakati kulimbabo: “Sena nkuuli simalelaanu akulindinywe buyo nkwaandituma simalelaangu kuti ndizikwaambe majwi aaya? Sena takuli akubaalumi aabo ibakkala atala aabwaanda nkwaandituma, aabo ibatiilye tubi twabo beni akunywa minsyu yabo beni antoomwe andinywe?”
28 Mpoonya Rabisake wakaima akoompolola ajwi lipati mumwaambo waba Juda, kuti: “Amumvwe majwi aamwami mupati, imwami wa Asuri.+ 29 Mboobu mbwaamba mwami, ‘Mutalekeli Hezekiya kuti amucenge, nkaambo takonzyi kumuvwuna mumaanza aangu pe.+ 30 Alimwi mutalekeli Hezekiya kumupa kusyoma Jehova kwiinda mukwaamba kuti: “Ncobeni Jehova ulatuvwuna, alimwi munzi ooyu taukokwaabwa mumaanza aamwami wa Asuri pe.”+ 31 Mutamuswiilili Hezekiya pe, nkaambo mboobu mbwaamba mwami wa Asuri: “Amumvwane andime akulibombya kulindime,* eelyo umwi aumwi wanu uyoolya kumusaansa wakwe mwini akumukuyu wakwe mwini, alimwi umwi aumwi wanu uyoonywa maanzi aazwa mumukalo wakwe mwini, 32 kusikila ndikaboole akumutola kunyika iili mbuli nyika yanu,+ inyika yamaila awaini mupya, inyika yacinkwa amyuunda yamisaansa, nyika yamaolifa abuci. Mpoonya muyoozumanana kupona alimwi tamukafwi. Mutamuswiilili Hezekiya pe, nkaambo umucenga buya naamba kuti, ‘Jehova ulatuvwuna.’ 33 Sena kuli leza akati kabaleza bamasi aambi wavwuna cisi cakwe mumaanza aamwami wa Asuri? 34 Ino bali kuli baleza ba Hamati+ aba Aripadi? Ino bali kuli baleza ba Sefaravaimu,+ Hena alimwi a Iva? Sena bakamuvwuna Samariya mumaanza aangu?+ 35 Ino nguni akati kabaleza boonse bamasi aaya iwavwuna cisi cakwe mumaanza aangu, cakuti Jehova awalo inga wavwuna Jerusalemu mumaanza aangu?”’”+
36 Pele bantu bakaumuna buyo, tiibakamuvwiila noliba jwi lyomwe, nkaambo mwami wakabalailide kuti, “Mutakamuvwiili pe.”+ 37 Pele Eliyakimu mwana wa Hilikiya, iwakali kulanganya basiŋanda bamwami,* Sebina mulembi, alimwi a Joa mwana wa Asafu sikulemba makani bakaunka kuli Hezekiya kabazapwide zisani zyabo akumwaambila majwi aa Rabisake.