Isaya
37 Lino Mwami Hezekiya mbwaakaamvwida buyo makani aaya, wakazapula zisani zyakwe akusama cisani camasaka, kumane wakanjila muŋanda ya Jehova.+ 2 Mpoonya wakatuma Eliyakimu, ooyo iwakali kulanganya basiŋanda bamwami,* Sebina mulembi, alimwi abaalu akati kabapaizi, kabasamide zisani zyamasaka, kuti baunke kuli Isaya+ musinsimi, imwana wa Amozi. 3 Bakaakumwaambila kuti: “Mboobu mbwaamba Hezekiya, ‘Oobu buzuba mbuzuba bwamapenzi, mbuzuba bwakukalalilwa* abwakusampaulwa; nkaambo bana bayanda kutumbukwa,* pele taakwe nguzu zyakubatumbuka.+ 4 Ambweni Jehova Leza wako ulaamvwa majwi aa Rabisake, ooyo mwami wa Asuri simalelaakwe ngwaakatuma kuzoosampaula Leza uupona,+ eelyo uyoomusubula akaambo kamajwi aayo Jehova Leza wako ngaamvwa. Aboobo kobapailila+ ibasyeede aabo ibakafwutuka.’”+
5 Aboobo babelesi ba Mwami Hezekiya bakasika kuli Isaya,+ 6 eelyo Isaya wakabaambila kuti: “Mboobu mbomweelede kumwaambila simalelaanu, ‘Mboobu mbwaamba Jehova: “Utayoowi+ pe akaambo kamajwi aayo ngoomvwa ngobaamba babelesi bamwami wa Asuri+ aakundisampaula. 7 Lino ndilamupa kuti abe amuzeezo mumoyo wakwe,* aboobo uyoomvwa mulumbe akujokela kucisi cakwe mwini;+ eelyo ndiyoopa kuti akajaigwe apanga mucisi cakwe mwini.”’”+
8 Lino Rabisake naakamvwa kuti mwami wa Asuri wakalizwide ku Lakisi, wakapiluka kulinguwe akumujana kalwana munzi wa Libina.+ 9 Lino mwami wakamvwa makani aajatikizya Mwami Tirihaka wa Etiopiya aakuti: “Waboola kuzookulwana.” Naakamvwa boobo, wakatuma batumwa alimwi kuli Hezekiya,+ ulaamba: 10 “Mboobu mbomweelede kumwaambila Mwami Hezekiya wa Juda, ‘Utalekeli Leza wako ooyo ngosyoma kuti akucenge, kaamba kuti: “Jerusalemu takokwaabwa mumaanza aamwami wa Asuri pe.”+ 11 Bona! Wakalimvwida bami ba Asuri ncobakacita kuzisi zyoonse nobakazinyonyoona.+ Aboobo sena yebo olikke uyoovwunwa? 12 Sena baleza bazisi nzyobakanyonyoona bamatata bakazivwuna zisi eezyo?+ Ino uli kuli Gozani, Harani,+ Resefi alimwi abantu baku Edeni ibakali ku Tele-asara? 13 Ino uli kuli mwami wa Hamati, mwami wa Aripadi alimwi amwami wamunzi wa Sefaravaimu,+ wa Hena awa Iva?’”
14 Mpoonya Hezekiya wakatambula magwalo ngobakajisi batumwa mumaanza akwaabala. Kumane Hezekiya wakaunka kuŋanda ya Jehova, waakwaavwungulula* kumbele lya Jehova.+ 15 Mpoonya Hezekiya wakatalika kupaila kuli Jehova+ kuti: 16 “O Jehova wamakamu,+ Leza wa Israyeli, ookkede acuuno cabwami atala* aabakerubi, yebo olikke ndonduwe Leza mwini-mwini wamami oonse aamunyika. Nduwe wakalenga majulu alimwi anyika. 17 Kocenjeka matwi aako, O Jehova, umvwe!+ Kojalula meso aako, O Jehova, ubone!+ Komvwa majwi oonse aa Sanakeribu aayo ngaatuma kuti asampaule Leza uupona.+ 18 Ncamasimpe, O Jehova, kuti bami ba Asuri baanyonyoona masi oonse,+ kubikkilizya anyika yabo beni. 19 Alimwi baleza babo bakabasowela mumulilo,+ nkaambo mubwini tiibakali baleza pe, pele bakali milimo buyo yamaanza aamuntu,+ bakali bazisamu amabwe. Nkakaambo kaako bakacikonzya kubanyonyoona. 20 Aboobo lino, O Jehova Leza wesu, kotufwutula kujanza lyakwe, kutegwa mami oonse aamunyika azyibe kuti yebo olikke, ndonduwe Leza, O Jehova.”+
21 Mpoonya Isaya mwana wa Amozi wakatuma mulumbe ooyu kuli Hezekiya: “Mboobu mbwaamba Jehova Leza wa Israyeli, ‘Akaambo kakuti wapaila kulindime kujatikizya Mwami Sanakeribu wa Asuri,+ 22 ngaaya majwi ngaamba Jehova kujatikizya nguwe:
“Nakalindu, imwana musimbi wa Ziyoni wakunyansya, wakuweela.
Mwana musimbi wa Jerusalemu wakupukunyizyila mutwe.
23 Ino nguni ngoosampaula+ akutukila?
Ino nguni ngoobwentela ajwi lipati+
Akupwatwida meso cakulisumpula?
Wacitila Uusalala wa Israyeli!+
24 Kwiinda mubabelesi bako wamusampaula Jehova+ akwaamba kuti,
‘Ankalaki zyangu zyankondo zitalivwulili
Ndiyootanta atala eeni aamalundu malamfwu,+
Imasena aali kule kapati aa Lebano.
Ndiyoogonka masamu malamfwu aakkedari aankuko, amasamu aataliboteli aamulombe aankuko.
Ndiyoosika kumakkalilo aankuko aali atala eeni, kucisaka cankuko icijisi zisamu zisisinkene.
25 Ndiyoosya migoti akunywa maanzi;
Ndiyootuyuminizya tulonga twamaanzi* twamu Egepita amaulu aangu.’
26 Sena tonookamvwa? Cakalikanzidwe* kuzwa kaindi.
Ndakacibamba* kuzwa mazuba aakaindi.+
Lino ndilacicita.+
Yebo uyoopa kuti minzi iikwabilidwe inyonyoonwe akuba zitantaala buyo.+
27 Bantu bakkala mumo bayoobula nguzu;
Bayooyoowa akufwa nsoni.
Bayooba mbuli zimena ansi zyamusyokwe ambuli mweemvwe,
Mbuli bwizu bumenede aziluli ibuyuma nokuli muwo uupya wakujwe.
28 Pele mebo ndilizyi kabotu nokkala, nounka, nonjila,+
Alimwi anotondezya bukali kulindime,+
29 Nkaambo bukali mbotondezya kulindime+ alimwi akuvwuluma kwako zyasika kumatwi aangu.+
Aboobo ndiyoobikka kalobyo kangu mumpemo yako+ amatomu aangu kumilomo yako,
Mpoonya ndiyookweenzya akukupilusya munzila njiyonya eeyo njookaletezya.”
30 “‘Lino eeci nceciyooba citondezyo kulinduwe:* Mwaka uuno muyoolya maila aamakoko;* mpoonya mumwaka wabili muyoolya maila aayoosyuuka kulingawo; pele mumwaka watatu muyoosyanga mbuto akutebula, alimwi muyoosyanga myuunda yamisaansa akulya micelo yanjiyo.+ 31 Aabo bamuŋanda ya Juda ibayoofwutuka, inzya aabo bayoosyaala,+ bayoosimpa miyanda ansi akuzyala micelo atala. 32 Nkaambo ibasyeede bayoozwa mu Jerusalemu alimwi aabo ibayoofwutuka bayoozwa mu Cilundu ca Ziyoni.+ Busungu bwa Jehova wamakamu mbobuyoocicita eeci.+
33 “‘Aboobo mboobu mbwaamba Jehova kujatikizya mwami wa Asuri:+
“Takanjili mumunzi ooyu pe+
Naa kufwusa muvwi mulinguwo
Nokuba kuulwana antobo
Naa kuulundikila citantaala kutegwa aulwane.”’+
34 ‘Uyoopiluka munzila njiyonya eeyo njaakaletezya;
Takanjili mumunzi ooyu pe,’ mbwaamba Jehova.
36 Mpoonya mungelo wa Jehova wakaunka akujaya baalumi bali 185,000 munkambi yabana Asuri. Eelyo bantu nobakabuka mafwumofwumo, bakajana boonse mitunta buyo.+ 37 Aboobo Mwami Sanakeribu wa Asuri wakazwa akupiluka ku Nineve+ ooko nkwaakaakukkala.+ 38 Lino naakavwunteme ansi kuŋanda* ya Nisiroki leza wakwe, Adrameleki a Sarezere ibana bakwe bakulizyalila bakamujaya apanga,+ kumane bakatijila kucisi ca Ararati.+ Mpoonya Esari-hadoni+ imwanaakwe wakaba mwami mubusena bwakwe.