2 Makani
34 Josiya+ wakali amyaka iili lusele naakaba mwami, alimwi wakalela kwamyaka iili 31 mu Jerusalemu.+ 2 Wakacita ziluleme mumeso aa Jehova akweenda munzila zya Davida sikale wakwe, alimwi tanaakaleya kululyo naa kulumwensyi.
3 Mumwaka walusele wabulelo bwakwe naakacili mulombe, wakatalika kuyandaula Leza wa Davida sikale wakwe;+ eelyo mumwaka wa 12 wakatalika kusalazya Juda a Jerusalemu+ kwiinda mukugwisya masena aakukombela,+ misemu yazisamu yakukomba,* zikozyanyo zibezedwe+ alimwi azikozyanyo zyalubulo zifwulidwe. 4 Kuyungizya waawo, bakamwaya zipaililo zyaba Baala kalangilila alimwi zibikkilo zyatununkilizyo izyakali atala aanzizyo wakazigonkaula. Alimwi ayalo misemu yazisamu yakukomba,* zikozyanyo zibezedwe azikozyanyo zyalubulo zifwulidwe wakazipwayaula akuziziya mane bwaba busu, eelyo wakabumwaya atala aazyuumbwe zyabaabo ibakali kuzituulila.+ 5 Mpoonya mafwuwa aabapaizi wakaaumpila azipaililo zyabo.+ Aboobo wakasalazya Juda a Jerusalemu.
6 Wakacita oobo amuminzi ya Manase, Efraimu+ a Simeoni kusikila kuminzi ya Nafutali, mumasena oonse aayengelede aakanyonyookede, 7 alimwi wakamwaya zipaililo akupwayaula misemu yazisamu yakukomba* azikozyanyo zyalubulo zifwulidwe+ akuziziya mane bwaba busu; azibikilo zyatununkilizyo zyoonse wakazigonkaula munyika yoonse ya Israyeli,+ naakamana wakapiluka ku Jerusalemu.
8 Mumwaka wa 18 wabulelo bwakwe naakamana kusalazya nyika atempele,* wakatuma Safani+ mwana wa Azaliya a Maaseya silutwe wamunzi alimwi a Joa mwana wa Joahazi mulembi kuti babambulule ŋanda ya Jehova Leza wakwe.+ 9 Bakaboola kuli Hilikiya mupaizi mupati akumupa mali aakaletwa kuŋanda ya Leza, aayo ba Levi ibakali kubeleka kabali balindizi bamilyango ngobakatambula kuzwa kubana Manase, bana Efraimu akubana Israyeli boonse+ kubikkilizya abana Juda boonse, bana Benjamini abantu bamu Jerusalemu. 10 Mpoonya bakaapa kulibaabo ibakasalidwe kubeleka mulimo iwakali kucitwa muŋanda ya Jehova. Kumane aabo ibakali kubeleka mulimo muŋanda ya Jehova bakaabelesya kubambulula ŋanda. 11 Aboobo bakaapa kuli basyaazibwene mukupanga zintu akubayaki kuti baule mabwe aacezudwe amasamu aazijatilizyo alimwi amisemu yakuyasya maanda aayo bami ba Juda ngobakalekelela kuti anyonyooke.+
12 Baalumi aabo bakaubeleka mulimo cakusyomeka.+ Ibakasalwa kubalanganya kabali balangizi bakali ba Jahati a Obadiya iba Levi kuzwa kubana Merari,+ alimwi a Zekariya a Mesulamu kuzwa kubana Kohati.+ Eelyo ba Levi, aabo boonse ibakacibwene kwiimba,+ 13 bakali kulanganya babelesi* alimwi bakali balangizi babaabo ibakali kubeleka milimo iindene-indene; alimwi ba Levi bamwi bakali balembi, basololi abalindizi bamilyango.+
14 Lino nobakali kugwisya mali aakaletwa kuŋanda ya Jehova,+ Hilikiya mupaizi wakajana bbuku lya Mulawo wa Jehova+ lyakapegwa kwiinda muli* Musa.+ 15 Aboobo Hilikiya wakati kuli Safani mulembi: “Ndalijana bbuku lya Mulawo muŋanda ya Jehova.” Kumane Hilikiya wakapa Safani bbuku eelyo. 16 Mpoonya Safani wakaleta bbuku eelyo kumwami akumwaambila kuti: “Babelesi bako bali mukucita milimo yoonse njobakapegwa. 17 Baakuna mali oonse aakajanika muŋanda ya Jehova alimwi baapa baalumi basalidwe alimwi abaabo babeleka mulimo.” 18 Alimwi Safani mulembi wakaambila mwami kuti: “Kuli bbuku limwi ndyaandipa Hilikiya mupaizi.”+ Kumane wakatalika kulibala kumbele lyamwami.+
19 Lino mwami mbwaakaamvwida buyo majwi aa Mulawo, mpoonya aawo wakazapula zisani zyakwe.+ 20 Kumane mwami wakalailila Hilikiya, Ahikamu+ mwana wa Safani, Abidoni mwana wa Mika, Safani mulembi alimwi a Asaya mubelesi wamwami kuti: 21 “Kamuya mukatubuzyile makani kuli Jehova, mebo abantu basyeede mu Israyeli amu Juda kujatikizya majwi aabbuku eeli lyajanwa; nkaambo bukali bwa Jehova ibweelede kutusikila mbupati akaambo kakuti bamatata tiibakalitobela jwi lya Jehova kwiinda mukutobela zyoonse zilembedwe mubbuku eeli.”+
22 Aboobo Hilikiya, antoomwe abaabo mwami mbaakatuma, bakaunka kuli Hulida musinsimi mukaintu.+ Wakali mukaintu wa Salumu mwana wa Tikiva imwana wa Harihasi iwakali kulanganya ciyobwedo cazisani alimwi wakali kukkala mubusena bupya bwamunzi wa Jerusalemu; eelyo bakaambaula anguwe nkukonya ooko.+ 23 Mukaintu ooyo wakati kulimbabo: “Mboobu mbwaamba Jehova Leza wa Israyeli, ‘Mwaalumi ooyo iwamutuma kulindime mukamwaambile kuti: 24 “Mboobu mbwaamba Jehova, ‘Ndilaleta mapenzi abusena oobu akubantu bakkala mumo,+ kusinganya koonse kulembedwe mubbuku+ ndyobakabala kumbele lyamwami wa Juda. 25 Akaambo kakuti bandisiya+ akutalika kuuntumuna busi bwazipaizyo kuli baleza bambi akundinyemya+ amilimo yoonse yamaanza aabo, bukali bwangu bulapoomokela busena oobu mbuli mulilo alimwi tabukonzyi kuzimwa pe.’”+ 26 Pele mwami wa Juda iwamutuma kuzoobuzya makani kuli Jehova, mumwaambile kuti, “Mboobu mbwaamba Jehova Leza wa Israyeli: ‘Kujatikizya majwi ngoomvwa,+ 27 akaambo kakuti moyo wako wakabomba alimwi wakalicesya kuli Leza nookamvwa majwi aakwe kujatikizya busena oobu abantu bakkala mumo, akuti wakalibombya kubusyu bwangu akuzapula zisani zyako akutalika kulila kubusyu bwangu, andime ndakuswiilila,+ mbwaamba Jehova. 28 Nkakaambo kaako ndiyookubunganya kuli bamauso,* alimwi uyoozikkwa mucuumbwe cako muluumuno. Meso aako taakaboni mapenzi oonse ngondiyooletela busena oobu abantu bakkala mumo.’”’”+
Eelyo mwami bakazoomwaambila majwi aaya. 29 Aboobo mwami wakatumya mulomo akwiita baalu boonse bamu Juda amu Jerusalemu.+ 30 Kumane mwami wakaunka kuŋanda ya Jehova antoomwe abaalumi boonse bamu Juda, bamu Jerusalemu, bapaizi, ba Levi—bantu boonse, bapati abaniini. Wakababalila majwi oonse aamubbuku lyacizuminano eelyo ilyakajanwa muŋanda ya Jehova.+ 31 Mwami wakaima mubusena bwakwe akupanga cizuminano*+ kubusyu bwa Jehova cakuti uyootobela Jehova akubamba milawo yakwe, ziyeekezyo zyakwe amalailile aakwe amoyo wakwe woonse abuumi bwakwe boonse+ kwiinda mukutobela majwi aacizuminano aakalembedwe mubbuku eeli.+ 32 Kuyungizya waawo, wakapa kuti bantu boonse bakali mu Jerusalemu a Benjamini bacizumine cizuminano eeco. Eelyo bantu bamu Jerusalemu bakacita kweelana acizuminano ca Leza, Leza wabamausyi.+ 33 Kumane Josiya wakagwisya zisesemyo* zyoonse munyika yoonse yabana Israyeli,+ alimwi wakapa kuti bantu boonse bakali mu Israyeli batalike kubelekela Jehova Leza wabo. Mubuumi bwakwe boonse* tiibakaleya akuleka kutobela Jehova Leza wabamausyi.