Ezara
3 Lino mwezi waciloba+ niwakasika alimwi bana Israyeli nibakali muminzi yabo, bakalibunga-bunga antoomwe camoyo omwe mu Jerusalemu. 2 Jeshua+ mwana wa Jehozadaki abapaizinyina alimwi a Zerubabeli+ mwana wa Sealitiyeli+ abanabokwabo bakanyamuka akuyaka cipaililo ca Leza wa Israyeli, kutegwa batuule zipaizyo zyuumpwa alincico kweelana azilembedwe mu Mulawo wa Musa+ muntu wa Leza mwini-mwini.
3 Aboobo bakayaka cipaililo abusena aawo mpocakabede kaindi, nokuba kuti bakaliyoowede akaambo kabantu bamasi bakeengelede,+ bakatalika kutuulila Jehova zipaizyo zyuumpwa alincico, nkokuti zipaizyo zyuumpwa zyamafwumofwumo azyakumangolezya.+ 4 Kumane bakacita Pobwe lya Zivwuka kweelana azilembedwe,+ alimwi buzuba abuzuba bakali kutuula mweelwe uugaminide wazipaizyo zyuumpwa iwakali kuyandika kweelana amulawo.+ 5 Kumane bakatuula zituuzyo zyuumpwa+ zyalyoonse azituuzyo zyaciindi noukkala mwezi+ azyamapobwe aayo oonse aasalazyidwe+ aa Jehova, kubikkilizya azituuzyo zyakuliyandila+ eezyo bantu boonse nzyobakali kutuula kuli Jehova. 6 Kuzwa mubuzuba bwakusaanguna bwamwezi waciloba+ bakatalika kutuula zipaizyo zyuumpwa kuli Jehova nokuba kuti ntalisyo yatempele lya Jehova tiiyakaningayakwa.
7 Bakapa mali kuli basikubeza mabwe+ abasyaazibwene mukupanga zintu,+ alimwi bakapa zyakulya, zyakunywa amafwuta kubana Sidoni akubana Turo kutegwa balete masamu aakkedari aayo ngobakainzya mulwizi kuzwa ku Lebano kuzoosika ku Jopa,+ kweelana ambwaakabazumizya Mwami Koresi wa Persia.+
8 Mumwaka wabili mumwezi wabili kabasikide kuŋanda ya Leza mwini-mwini ku Jerusalemu, Zerubabeli mwana wa Sealitiyeli, Jeshua mwana wa Jehozadaki alimwi abanabokwabo boonse, bapaizi aba Levi alimwi abantu boonse ibakazwa mubuzike+ kuya ku Jerusalemu bakautalika mulimo; eelyo bakasala ba Levi ibakali amyaka iili 20 kuya kumbele kuti babe basikweendelezya mulimo waŋanda ya Jehova. 9 Aboobo Jeshua, abana bakwe abanabokwabo alimwi a Kadimiyeli abana bakwe, ibana ba Juda, bakabelekela antoomwe kulanganya baabo ibakali kubeleka mulimo muŋanda ya Leza mwini-mwini antoomwe abana ba Henadadi+ alimwi abana babo abanabokwabo, iba Levi.
10 Lino bayaki nobakamana kuyaka ntalisyo yatempele ya Jehova,+ mpoonya bapaizi bakanyamuka kabasamide zisani zyabo zyabupaizi kabajisi amyeembo,+ eelyo ba Levi bana ba Asafu bakajisi nsakalala kuti batembaule Jehova kweelana ambwaakalailila Mwami Davida wa Israyeli.+ 11 Kumane bakavwiilana+ mukutembaula akulumba Jehova, “nkaambo mubotu; alimwi luyando lwakwe lutamani kubana Israyeli nkoluli lyoonse mane kukabe kutamani.”+ Eelyo bantu boonse bakoongolola aloongololo lupati kutembaula Jehova nkaambo ntalisyo yaŋanda ya Jehova yakayakwa. 12 Bunji bwabapaizi, ba Levi abasilutwe baziinga zyabamausyi–bamadaala ibakaibona ŋanda ntaanzi+–bakoomoka kulila nobakabona ntalisyo yaŋanda eeyi kaiyakwa, kakuli bamwi banji bakali koongolola cakukondwa.+ 13 Aboobo bantu tiibakali kukonzya kwaandaanya koongolola kwakukondwa akoongolola kwakulila nkaambo bantu bakali koongolola aloongololo lupati kapati cakuti loongololo oolo lwakamvwigwa akule kapati.