Intembauzyo
Kumweendelezi wanyimbo. Lwiimbo lwa Davida.
64 O Leza, koswiilila jwi lyangu nendikombelezya.+
Kokwabilila buumi bwangu kuli sinkondoma uuyoosya.
2 Kondisisa kumakanze aamaseseke aabantu babi,+
Kunkamu yabasimucita zibi.
3 Bakwenga milaka yabo mbubonya mbuli panga;
Bagamika majwi aabo mabi mbuli mivwi,
4 Kuti bayase muntu uutakwe mulandu kuzwa mumasena aabo aasisikide.
Cakutayeeyelwa balamuyasa kakunyina kuyoowa.
5 Balakakatila kumakanze aabo mabi;*
Balapangana mbobatiiteye tukole twabo.
Baamba kuti: “Ino nguni uutiitubone ootu?”+
6 Bayandaula nzila zipya zyakucita zintu zibyaabi;
Cabucenjezu bajana nzila yakucita zintu zibi;+
Mumoyo umwi aumwi wabo ujisi mizeezo iikatazyide.
7 Pele Leza uyoobayasa;+
Cakutayeeyelwa bayooba azilonda zyamuvwi.
8 Milaka yabo beni iyoobawisya;+
Boonse babalangilila bayoopukunya mitwe yabo.
9 Mpoonya bantu boonse bayooyoowa,
Bayakwaambilizya milimo njaacita Leza,
Alimwi bayakwiimvwisya milimo yakwe.+