Ezekieli
24 Alimwi ijwi lya Jehova lyakandisikila mumwaka wafwuka, mumwezi wa 10, mubuzuba bwa 10 bwamwezi ooyo kaliti: 2 “Omwanaamuntu, kobulemba buzuba oobu, nkokuti buzuba obuno mbubonya. Mwami wa Babuloni watalika kulwana Jerusalemu ibuzuba obuno mbubonya.+ 3 Alimwi koamba kasimpi kujatikizya ŋanda eeyi yabazangi, ubaambile kuti:
“‘Mboobu mbwaamba Mwami Singuzuzyoonse Jehova:
“Sibika mpoto; inzya sibika mpoto amulilo utile amaanzi mulinjiyo.+
4 Kobikka zituli zyanyama mulinjiyo,+ zituli zibotu zyoonse,
Zyacibelo azyakucamba; koizuzya amafwuwa mabotu kapati.
5 Kobweza mbelele mbotu kapati mubutanga,+ usikke nkuni zinji koonse-koonse kunsi aampoto.
Kozijika zituli eezyo alimwi amafwuwa aali mulinjiyo.”’
6 “Aboobo mboobu mbwaamba Mwami Singuzuzyoonse Jehova:
‘Maawe kumunzi uutila bulowa,+ kumpoto iijisi nkalaya, iitanagusyigwa nkalaya!
Kogusya zituli zili mulinjiyo zyoonse cimwi acimwi;+ utazyuumini cisolo pe.
7 Nkaambo bulowa bwamunzi buli mulinguwo;+ munzi ooyu wakabutila atala aandomba iinyina cintu.
Tiiwakabutila ansi kuti ubuvwikkile abulongo pe.+
8 Kutegwa ndibusye bukali bwakuti ndipe cisubulo,
Ndabikka bulowa bwamunzi atala aandomba iimweka alimwi iinyina cintu,
Kutegwa butavwikkilwi pe.’+
9 “Aboobo mboobu mbwaamba Mwami Singuzuzyoonse Jehova:
‘Maawe kumunzi uutila bulowa!+
Ndiyakuukomezya mulwi wankuni.
10 Amulundike nkuni, muyasye mulilo,
Nyama amwiileke ibile mane ilekane, amuminunune musinza, aalo mafwuwa amwaaleke aide.
11 Amusibike mpoto iinyina cintu amakala aamulilo kuti ipye,
Kutegwa mukuba wanjiyo usalale pyu akupya kwalo.
Busofwaazi bwayo ibuli mukati kanjiyo bulanyenguluka+ alimwi nkalaya yanjiyo ilaligwa.
12 Nkulipenzya buyo alimwi maliminya buyo,
Nkaambo nkalaya eeyo inji kapati taikoozwa pe.+
Mpoto eeyo amwiisowele buyo mumulilo ankalaya yanjiyo!’
13 “‘Yebo wakasofwaala akaambo kabukkale bwako busesemya.+ Ndakasola kukusalazya, pele tonookasalala pe kubusofwaazi bwako. Tokasalazyigwi limbi kusikila mane bukamane ibukali bwangu mbondijisi kulinduwe.+ 14 Mebo nde Jehova ndime ndaamba. Ciyoocitika ncobeni. Ndiyoobweza ntaamu kakunyina kuwayawaya, tandikakweengeleli pe alimwi tandikacinci maano.+ Bayookubeteka kweelana anzila zyako alimwi amicito yako,’ mbwaamba Mwami Singuzuzyoonse Jehova.”
15 Alimwi ijwi lya Jehova lyakandisikila kaliti: 16 “Omwanaamuntu, anguma yomwe buyo ndilakunyanga muyandwa wako ngoyandisya.+ Toyelede koomoka; nokuba kulila naa kweenda misozi. 17 Utongele buyo cakaumuumu, alimwi utaciti zilengwa zyaadilwe zicitilwa bafwide.+ Kolyaanga citambala cako kumutwe,+ akusama mpato zyako kumaulu.+ Utalivwumbi acilezu camulomo waatala pe,+ alimwi utalyi cakulya ncobatiikuletele bamwi.”+
18 Lino mafwumofwumo ndakaambila bantu makani aaya, mpoonya imangolezya mukaintu wangu wakafwa. Aboobo nibwakaca ndakacita mbubonya mbundakalaililwa. 19 Bantu bakali kundibuzya kuti: “Sena kunyina notiitwaambile mbozitujatikizya swebo zintu eezyi nzyocita?” 20 Mpoonya ndakabavwiila kuti: “Ijwi lya Jehova lyandisikila kaliti: 21 “Kobaambila bamuŋanda ya Israyeli kuti: “Mboobu mbwaamba Mwami Singuzuzyoonse Jehova, ‘Ndili afwaafwi kucisofwaazya cikombelo cangu,+ eeco icimupa kulidunda kapati, ncomuyandisya alimwi ncomulombozya kapati mumyoyo yanu. Ibana banu basankwa abasimbi, aabo mbomwakasiya musyule, bayoojaigwa apanga.+ 22 Mpoonya muyoocita mbubonya mebo mbondacita. Kunyina nomuyoolivwumba acilezu camulomo wanu waatala nokuba kulya cakulya ncobayoomuletela bamwi.+ 23 Muyoolyaanga zitambala zyanu kumitwe yanu, alimwi kumaulu muyoosama mpato zyanu. Kunyina nomuyakoomoka nokuba kulila. Muciindi caboobo, muyoobola muzinyonyoono zyanu,+ alimwi muyootongela umwi aumwi kumweenzinyina. 24 Ezekieli waba citondezyo kulindinywe.+ Mbubonya mbwaacita walo, anywebo mbomuyoocita. Aboobo caakucitika eeci, muyoozyiba kuti mebo ndendime Mwami Singuzuzyoonse Jehova.’”’”
25 “Lino yebo omwanaamuntu, ibuzuba oobo nondiyoobanyanga mayubilo aabo—icintu cibotu ncobakkomanina, icintu eeco ncobayandisya, inzya cintu eeco myoyo yabo ncoilombozya kapati—antoomwe abana babo basankwa abasimbi,+ 26 imuntu uuyoofwutuka uyookuletela mulumbe.+ 27 Ibuzuba oobo yebo uyoojalula mulomo wako akwaambaula amuntu ooyo uuyoofwutuka, eelyo tokaumuni buyo limbi pe.+ Uyooba citondezyo kulimbabo, eelyo bayoozyiba kuti mebo ndime Jehova.”