Jobu
42 Mpoonya Jobu wakaambila Jehova kuti:
2 “Lino ndazyiba kuti yebo ulakonzya kucita zintu zyoonse
Akuti kunyina cintu ncokanza kucita icikonzya kukwaalila.+
3 Yebo wakabuzya kuti, ‘Ino nguni ooyu uuyabaizya makanze aangu katakwe luzyibo?’+
Aboobo ndakaambaula, pele kutali camaano
Kujatikizya zintu zigambya kapati nzyonditazyi.+
4 Yebo wakaamba kuti, ‘Koswiilila mebo ndaambaule.
Ndilakubuzya, mpoonya yebo undivwiile.’+
5 Ndakali kumvwa buyo mpuwo yako,
Pele lino ndakubona ameso aangu.
7 Lino Jehova naakamana kwaamba majwi aaya kuli Jobu, Jehova wakaambila Elifazi muna Temani kuti:
“Yebo abeenzinyoko bobilo+ mwandinyemya kapati akaambo kakuti tiimwaamba zyamasimpe kujatikizya ndime+ mbuli bwacita mubelesi wangu Jobu. 8 Aboobo lino, amubweze bapoho bali ciloba abagutu bali ciloba, muunke kuli Jobu mubelesi wangu, kutegwa mulituulile cipaizyo cakuumpa. Eelyo Jobu mubelesi wangu ulamupailila.+ Ncobeni ndilautambula mupailo wakwe* wakuti nywebo nditamusubuli kweelana abufwubafwuba bwanu, nkaambo tiimwaamba zyamasimpe kujatikizya ndime mbuli bwacita mubelesi wangu Jobu.”
9 Aboobo Elifazi muna Temani, Bilidadi muna Sua alimwi a Zofari muna Naamati bakaunka akucita mbubonya mbwaakabaambila Jehova. Eelyo Jehova wakautambula mupailo wa Jobu.
10 Lino Jobu naakabapailila beenzinyina,+ Jehova wakaagusya mapenzi aakamujisi+ Jobu alimwi wakamupilusyila buvwubi bwakwe.* Jehova wakamuyungizyila kobilo mweelwe wazintu zyoonse nzyaakajisi kumatalikilo.+ 11 Eelyo banabokwabo boonse basankwa abasimbi alimwi abeenzinyina boonse bakaindi+ bakaboola kulinguwe akulya cakulya anguwe kuŋanda yakwe. Bakeetezyegwa akumuumbulizya akaambo kamapenzi oonse Jehova ngaakalekela kuti amusikile. Umwi aumwi wabo wakamupa cipego camali anweenwe yangolida.
12 Aboobo Jehova wakaleleka mamanino aabuumi bwa Jobu kwiinda matalikilo aakwe,+ cakuti Jobu wakaba ambelele zili 14,000, nkamela zili 6,000, zipani zyaŋombe zili 1,000, ambongolo zizyazi zili 1,000.+ 13 Alimwi wakaba abana bambi basankwa bali ciloba abana basimbi botatwe.+ 14 Mwana musimbi wakusaanguna wakamuulika zina lyakuti Jemima, wabili Keziya, mpoonya watatu Kereni-hapuki. 15 Munyika yoonse kunyina basimbi bakali kweebeka mbuli bana basimbi ba Jobu, alimwi bausyi bakabapa lukono antoomwe abanabokwabo basankwa.
16 Nozyakainda eezyi Jobu wakapona myaka iili 140 akulibonena bana abazyukulu bakwe, nkokuti imazyalani one. 17 Kumane Jobu wakafwa, kaponede myaka minji akukkutila abuumi.