2 Samuele
5 Mukuya kwaciindi, misyobo yoonse yabana Israyeli yakaboola kuli Davida ku Hebroni+ akumwaambila kuti: “Bona! Swebo tuli zifwuwa zyako anyama yako.*+ 2 Kaindi, ciindi Saulo naakali mwami wesu, yebo ndonduwe wakali kusololela bana Israyeli kunkondo.*+ Alimwi Jehova wakakwaambila kuti: ‘Yebo nduwe uuyakweembela bantu bangu bana Israyeli alimwi nduwe uuyooba musololi wabo.’”+ 3 Aboobo baalu bana Israyeli boonse bakaboola kumwami ku Hebroni, eelyo Mwami Davida wakapanga cizuminano ambabo+ ku Hebroni kubusyu bwa Jehova. Mpoonya Davida bakamunanika kuba mwami wa Israyeli.+
4 Davida wakali amyaka iili 30 ciindi naakaba mwami, alimwi wakeendelezya myaka iili 40.+ 5 Ku Hebroni wakeendelezya cisi ca Juda myaka iili ciloba amyezi iili cisambomwe, eelyo mu Jerusalemu+ wakeendelezya myaka iili 33, kali mwami wanyika ya Israyeli yoonse alimwi a Juda. 6 Mpoonya mwami abaalumi bakwe bakaunka ku Jerusalemu kuyoolwana bana Jebusi+ ibakali kukkala munyika eeyo. Bakamusampaula Davida kabati: “Tokanjili mumunzi uuno pe! Nobaba boofwu abalema bayookutanda.” Mumoyo bakali kwaamba kuti, ‘Davida takanjili mumunzi uuno pe.’+ 7 Nokuba boobo, Davida wakauzunda munzi uukwabilidwe wa Ziyoni, ooyo lino wiitwa kuti Munzi wa Davida.+ 8 Aboobo mubuzuba oobo Davida wakati: “Aabo balwana bana Jebusi beelede kwiinda mumugelo wamaanzi kuyoojaya ‘balema aboofwu,’ aabo ibamusulide Davida!” Nkakaambo kaako ncobaamba kuti: “Boofwu abalema tabakanjili muŋanda.” 9 Mpoonya Davida wakakkala mubusena bukatazya kusika, eelyo munzi ooyu wakazikwiitwa* kuti Munzi wa Davida; alimwi Davida wakatalika kuyaka kuzinguluka koonse kuzwa ku Citantaala*+ kuya mukati kamunzi.+ 10 Aboobo Davida wakali kuyaabuba anguzu,+ alimwi Jehova Leza wamakamu wakali anguwe.+
11 Mwami Hiramu+ wa Turo wakatuma batumwa kuli Davida alimwi wakatuma azisamu zyakkedari,+ babezi abasikuyaka malambo kubelesya mabwe, eelyo bakatalika kuyaka ŋanda* ya Davida.+ 12 Lino Davida wakazyiba kuti Jehova wakamukkazikizya kuba mwami wa Israyeli+ akuti wakasumpula bwami bwakwe+ akaambo kabantu bakwe bana Israyeli.+
13 Lino Davida wakakwata bamwanakasuwa+ abamakaintu bambi mu Jerusalemu naakazwa ku Hebroni, eelyo Davida wakazyala bana banji, basankwa abasimbi.+ 14 Aaya ngamazina aabana mbaakazyala ku Jerusalemu: Samua, Sobabu, Natani,+ Solomoni,+ 15 Ibara, Elisua, Nefegi, Jafiya, 16 Elisama, Eliyada a Elifeleti.
17 Lino ba Filisiti nobakamvwa kuti Davida wananikwa kuba mwami wa Israyeli,+ ba Filisiti boonse bakaboola kuyandaula Davida.+ Eelyo Davida naakamvwa boobo, wakaunka kumpangala.+ 18 Kumane ba Filisiti bakaboola akumwaikizyanya mu Kkuti* lya Refaimu.+ 19 Davida wakabuzya Jehova+ kuti: “Sena nduunke kuyoolwana ba Filisiti? Sena ulabaaba mumaanza aangu?” Mpoonya Jehova wakaambila Davida kuti: “Koya, nkaambo masimpe ba Filisiti ndilabaaba mumaanza aako.”+ 20 Aboobo Davida wakaboola ku Baala-perazimu, eelyo wakabajaya ooko. Mpoonya wakati: “Jehova wasolola kumbele lyangu mbuli maanzi manji aazambangulwe akubanyonyoona basinkondoma.”+ Nkakaambo kaako busena oobo wakabuulika kuti Baala-perazimu.*+ 21 Ba Filisiti bakasiya mituni yabo ooko, mpoonya Davida abaalumi bakwe bakaibweza akwiinyonyoona.
22 Mukuya kwaciindi ba Filisiti bakaboola alimwi, eelyo bakamwaikizyanya mu Kkuti* lya Refaimu.+ 23 Kumane Davida wakabuzya kuli Jehova, pele wakamwaambila kuti: “Utabagami buya pe. Pele kozinguluka wiinde kusyule lyabo, mpoonya ukabalwane kumbele lyazivwuna zyabbaka. 24 Lino waakumvwa kukwayama mbuli bantu beenda atala aazivwuna zyabbaka, mpoonya aawo ukanyamuke akubalwana, nkaambo Jehova unooli wainda kale kumbele lyako kuyoojaya mpi yabasikalumamba yaba Filisiti.” 25 Aboobo Davida wakacita mbubonya Jehova mbwaakamulailila, eelyo wakabajaya ba Filisiti+ kuzwa ku Geba*+ mane kuyoosika ku Gezeri.+