Babetesi
2 Mpoonya mungelo wa Jehova+ wakazwa ku Giligala+ akuunka ku Bokimu eelyo wakati: “Ndakamugwisya mu Egepita akumuleta munyika njindakakonkezya kuli bamauso.+ Kunze lyaboobo ndakati, ‘Tandikatyoli cizuminano ncindakapanga andinywe.+ 2 Nywebo tamweelede kupanga cizuminano abantu bakkala munyika eeyi+ alimwi zipaililo zyabo+ mweelede kuzimwaya.’ Pele tiimwaswiilila jwi lyangu.+ Nkaambo nzi ncomwacitila boobu? 3 Nkakaambo kaako ncendakaambila kuti, ‘Tandikabatandi kubusyu bwanu pe,+ eelyo bayoomubeda tukole+ alimwi baleza babo bayoomoongelezya.’”+
4 Lino mungelo wa Jehova naakaambila bana Israyeli boonse majwi aaya, bantu bakatalika kulila cakoongolola. 5 Aboobo busena oobo bakabuulika kuti Bokimu,* eelyo ooko bakatuula zipaizyo kuli Jehova.
6 Joshua naakamwaisya bantu, bana Israyeli bakaunka umwi aumwi kulukono lwakwe, kutegwa baibweze nyika.+ 7 Bantu bakazumanana kubelekela Jehova mazuba oonse aabuumi bwa Joshua amumazuba oonse aabaalu aabo ibakasyaala naakafwa Joshua alimwi ibakabona milimo mipati yoonse Jehova njaakacitila bana Israyeli.+ 8 Mpoonya Joshua mwana wa Nuni, imubelesi wa Jehova wakafwa kajisi myaka iili 110.+ 9 Aboobo bakamuzikka mucilawo calukono lwakwe mu Timinati-heresi,+ mumalundu aa Efraimu, Cilundu ca Gaasi+ nkocili kunyika. 10 Izyalani eelyo lyoonse lyakafwa, mpoonya kwakaboola zyalani limbi ilyatakamuzyi Jehova naa milimo njaakacitila bana Israyeli.
11 Aboobo bana Israyeli bakatalika kucita zintu zibi mumeso aa Jehova alimwi akubelekela* ba Baala.+ 12 Bakamusiya Jehova Leza wabamausyi iwakabagwisya mucisi ca Egepita.+ Alimwi bakatobela baleza bambi babantu bakabazingulukide+ akubakotamina, eelyo bakamunyemya Jehova.+ 13 Bakamusiya Jehova akutalika kubelekela Baala alimwi a Asitoreti.+ 14 Eelyo bukali bwa Jehova bwakabukila bana Israyeli, aboobo wakabaaba mumaanza aabasikusaala ibakatalika kubasaala.+ Wakabaaba mumaanza aabasinkondonyina ibakabazingulukide,+ alimwi tiibakacili kukonzya kubalwana pe.+ 15 Kufwumbwa nkobakali kukonzya kuunka, janza lya Jehova lyakali kubaletela mapenzi,+ mbubonya mbwaakaamba Jehova, alimwi mbubonya Jehova mbwaakakonkezya kulimbabo,+ aboobo bakanjila mumapenzi aataambiki.+ 16 Aboobo Jehova wakali kubapa babetesi ibakali kubavwuna kumaanza aabasikubasaala.+
17 Pele nobaba babetesi babo bakakaka kubaswiilila, alimwi bakali kuvwuula abaleza bambi akubakotamina. Bakafwambaana kuleya kuzwa munzila eeyo bamausyi njobakali kutobela, aabo ibakabamba milawo ya Jehova.+ Tiibakacita mbuli bamausyi pe. 18 Kufwumbwa Jehova naakali kubapa babetesi,+ Jehova wakali kuba amubetesi ooyo akubavwuna kumaanza aabasinkondonyina mazuba oonse aamubetesi; nkaambo Jehova wakali kubafwida luse*+ akaambo kakutongela kwabo ikwakaletwa abaabo ibakali kubapenzya akubadyaaminina.+
19 Pele kuti naa mubetesi wafwa, bakali kuleya alimwi akucita zintu zibi kapati kwiinda bamausyi, kutobela baleza bambi, kubabelekela akubakotamina.+ Tiibakaileka micito yabo abusicinguni bwabo. 20 Mpoonya bukali bwa Jehova bwakababukila bana Israyeli+ eelyo wakati: “Akaambo kakuti musyobo ooyu watyola cizuminano+ cangu ncindakalailila bamausyi alimwi tiibandimvwida,+ 21 andime nsikooyoobatandila limbi nuuba omwe wamisyobo eeyo Joshua njaakasiya naakafwa.+ 22 Kutegwa ndikasunke bana Israyeli naa bayoobamba nzila ya Jehova+ kwiinda mukweenda mulinjiyo mbubonya mbuli bamausyi naa pe.” 23 Aboobo Jehova wakalekela misyobo eeyi kuti kiikkede. Tanaakafwambaana kwiitanda, alimwi tanaakayaaba mumaanza aa Joshua pe.