2 Bakorinto
12 Ndileelede kulidunda. Tacigwasyi pe, pele lino ndilabandika zilengaano zigambya+ alimwi aziyubunuzyo zya Mwami.+ 2 Kuli muntu umwi uukamantene a Kristo ngondizyi, ooyo myaka iili 14 yainda wakakwempelwa kujulu lyatatu. Lino tandizyi naa wakakwempwa kali amubili wanyama naa pe; Leza alikke nguuzyi. 3 Inzya, muntu uuli boobo ndilimuzyi, pele tandizyi naa wakali amubili wanyama naa wakalaandeene amubili; Leza nguuzyi. 4 Ncondizyi ncakuti wakakwempelwa muparadaiso akumvwa majwi aataambiki alimwi aatazumizyidwe kwaambwa amuntu. 5 Ndilalidunda kujatikizya muntu ooyo, pele lwangu ndemwini tandikonzyi kulidunda pe, ccita buyo kujatikizya kubula nguzu kwangu. 6 Nkaambo nokuba kuti ndayanda kulidunda, tandikooba mufwubafwuba pe, nkaambo ndilaamba zyakasimpe. Pele ndalikasya kucita boobo, ikutegwa kutabi muntu naba omwe uundilumbaizya kapati kwiinda zintu nzyabona kandicita naa nzyamvwa kandaambaula, 7 akaambo buyo kakutambula ziyubunuzyo eezyo zigambya.
Ikutegwa nditalisumpuli cakwiindilila, ndakayaswa mumvwa mumubili,+ imungelo wa Saatani kuti kanduuma lyoonse, ikutegwa nditalisumpuli cakwiindilila. 8 Ziindi zyotatwe ndakakombelezya Mwami akaambo kaceeci, kuti cindileke. 9 Pele walo wakandaambila kuti: “Luzyalo lwangu lulizulide kulinduwe, nkaambo nguzu zyangu zilalondolwa mukubula nguzu kwako.”+ Aboobo cakukondwa, ndilalidunda kujatikizya kubula nguzu kwangu, ikutegwa nguzu zya Kristo zizumanane kundivwumba mbuli tente. 10 Aboobo ndilabotelwa eelyo nonditajisi nguzu, nonditukilwa, nondibula ziyandika, nondipenzyegwa akucitikilwa mapenzi aambi akaambo ka Kristo. Nkaambo eelyo nonditajisi nguzu, ndendilyo nondijisi nguzu kapati.+
11 Ndaba mufwubafwuba. Ndinywe mwakandipa kuba boobo, nkaambo mwakeelede kundilumbaizya. Nkaambo nokuba kuti tandibalwi pe, kunyina cintu nociba comwe ncobakandiinda baapostolo banu bacibwene kwiinda boonse.+ 12 Mubwini, izitondezyo zyamwaapostolo zyakatondezyegwa akati kanu akuliyumya kupati,+ alimwi akwiinda muzitondezyo azintu zigambya alimwi amilimo mipati.+ 13 Nkaambo ino mbungano zimwi zyoonse zyakajisi coolwe nzi ncomwatakajisi nywebo kunze lyakuti tiindakaba mukuli uuminya kulindinywe?+ Ndalomba mundilekelele cibi eeci.
14 Amubone! Eeci nciindi catatu kandilibambilide kuboola kulindinywe, pele tandikooba mukuli uuminya pe. Nkaambo tandiyandi lubono lwanu pe,+ pele ncondiyanda ndinywe; nkaambo bana+ tabalangilwi kuyobweda bazyali babo lubono pe, pele bazyali mbabalangilwa kuyobweda bana babo. 15 Mebo cilandibotela kapati kusowa zintu zyangu zyoonse akulitakata cakumaninina lwangu ndemwini akaambo kabuumi bwanu.+ Ikuti mebo kandimuyanda kapati, sena nywebo mweelede kundiyanda asyoonto? 16 Pele kufwumbwa mbozibede zintu, cipati ncakuti tiindamuminya pe.+ Nokuba boobo, mwaamba kuti, ndakabelesya “lweeno” alimwi ndakamucitila “cabucenjezu.” 17 Akati kabaabo mbondakatuma kulindinywe, sena kuli nindakamuunina kwiinda mulimbabo? 18 Ndakalomba Tito kuti aboole kulindinywe alimwi ndime ndakamutuma imukwesu ooyo ngobali limwi. Sena Tito wakamuunina? Peepe, kunyina naakasola abuniini.+ Sena tiitwakakamantene mumizeezo anguwe? Sena tiitwakali kweenda mumukondo omwe anguwe?
19 Sena ciindi coonse mwali kuyeeya kuti twali kusola kulilulamika kulindinywe? Nkuumbele lya Leza nkotwaambila katukamantene a Kristo. Pele, nobayandwa, zintu zyoonse nzyotucita nzyakumuyaka. 20 Nkaambo ndiliyoowede kuti ambweni ndaakuboola, tandikamujani mbuli mbondali kuyanda alimwi andime ambweni tandinooli mbuli mbomwali kuyanda, pele muciindi caboobo, ndiyoojana kuti kuli kulwana, munyono, bukali, mazwanga, kutamikizyanya, kuvwiyana, kulisumpula alimwi amanyongwe. 21 Ambweni ndaakuboola alimwi, Leza wangu uyoonduusya nsoni kumbele lyanu, eelyo inga ndaakulila bantu banji aabo bakabisya musyule, pele bataneempwa kubusofwaazi, bwaamu* alimwi abukkale bwabo busesemya* mbobakapona.