Milimo
21 Notwakacikonzya kwaandaana ambabo akutanta bwato, cakufwambaana twakalulama akusika ku Kose, ibuzuba bwakatobela twakasika ku Rode, eelyo kuzwa kooko twakaunka ku Patara. 2 Notwakajana bwato ibwakali kuzabukila ku Fonike, twakatanta akuunka. 3 Notwakabona nsumbu ya Kupro, twakaisiya kulumwensyi* akuzumanana kuya ku Siriya. Twakaseluka ku Turo, nkaambo ooko nkokwakali kuyoolongolwedwa zintu zyakayumwidwe mubwato. 4 Twakayandaula akujana basikwiiya, mpoonya twakakkala ooko mazuba aali ciloba. Pele kweelana anzyobakaambilwa amuuya, cakwiinduluka-induluka bakaambila Paulo kuti atakalyati kuulu mu Jerusalemu.+ 5 Aboobo ciindi cesu cakuba kooko nicakamana, twakanyamuka akuzumanana alweendo lwesu, pele balo boonse, antoomwe abamakaintu abana bakatusindikila mane anze aamunzi. Eelyo twakafwugama kunkomwe yalwizi twapaila 6 akulayana. Mpoonya swebo twakatanta mubwato, balo bakapiluka kumaanda aabo.
7 Mpoonya lweendo lwesu lwamulwizi abwato kuzwa ku Turo lwakamana notwakasika ku Tolemai, eelyo ooko twakabaanzya bakwesu akukkala ambabo buzuba bomwe. 8 Buzuba bwakatobela twakanyamuka akuyoosika ku Kaisareya, eelyo twakaakunjila muŋanda ya Filipo mukambausi, iwakali umwi wabaalumi bali ciloba bakasalidwe,+ eelyo twakakkala anguwe. 9 Mwaalumi ooyu wakajisi bana basimbi batakakwetwe* bone ibakali kusinsima.+ 10 Pele notwakakkala ooko kwamazuba manji, musinsimi umwi uutegwa Agabo+ wakaselemuka kuzwa ku Judaya. 11 Mpoonya wakasika kulindiswe akubweza lutambo lwa Paulo, walyaanga kumaulu akumaanza akwaamba kuti: “Mboobu mbowaamba muuya uusalala, ‘Mwaalumi mukamwini lutambo oolu ba Juda bayoomwaanga mbubonya oobu ku Jerusalemu+ akumwaaba mumaanza aabantu bamasi.’”+ 12 Lino notwakamvwa makani aaya, swebo abaabo ibakali kooko twakatalika kumukombelezya kuti ataunki ku Jerusalemu. 13 Mpoonya Paulo wakaingula kuti: “Ino mwabaanzi ncomulila akusola kundityompya?* Mutapengi, ndililibambilide ikutali buyo kwaangwa mu Jerusalemu pele akufwa akaambo kazina lya Mwami Jesu.”+ 14 Notwakakakilwa kumukasya kuunka, twakaumuna buyo akwaamba kuti: “Kuyanda kwa Jehova* akucitike.”
15 Lino naakainda mazuba aaya twakalibambila lweendo akutalika kuunka ku Jerusalemu. 16 Basikwiiya bamwi baku Kaisareya bakaunka andiswe, bakatutola kuli Munasoni waku Kupro, umwi wabasikwiiya bakusaanguna ooyo wakajisi ŋanda nkotwakali kuyoosikila. 17 Notwakasika ku Jerusalemu, bakwesu bakatutambula amaanza obilo. 18 Pele buzuba bwakatobela Paulo wakatusangana kuya kuli Jakobo,+ alimwi abaalu boonse bakaliko. 19 Eelyo wakabaanzya akutalika kupandulula zintu zyoonse Leza nzyaakacita akati kabamasi kwiinda mumulimo wakwe.
20 Nobakamana kuswiilila makani aaya, bakalemeka Leza, pele bakaambila Paulo kuti: “Wabona mukwesu, kuti kuli zyuulu-zyuulu zyabasyomi akati kaba Juda, alimwi boonse buyo mbasungu kutobela Mulawo.+ 21 Pele bamvwa ntwiintwi yakuti yebo wali kuyiisya ba Juda boonse akati kabamasi zintu zyaluleyo kumulawo wa Musa, kwiinda mukubaambila kuti batanoopaluli bana babo nokuba kutobela ziyanza izyalikucitwa lyoonse.+ 22 Aboobo, ino lino tulacita buti? Nociba buti, kwalo kumvwa balamvwa kuti wasika. 23 Aboobo kocita ncotukwaambila: Tulijisi baalumi bone bakakonka. 24 Koya abaalumi aaba ukalisalazye omwini antoomwe ambabo kweelana amulawo alimwi ukababbadelele nzyobayandika, kutegwa mitwe yabo ikagelwe. Aboobo boonse bayoozyiba kuti ntwiintwi nzyobakamvwa kujatikizya nduwe nzyakubeja, pele kuti weenda munzila yeelede, akuti ulautobela Mulawo.+ 25 Pele kujatikizya basyomi bali akati kabamasi, twakabalembela makani aajatikizya mbotwakasala akubatumina kuti beelede kulikasya kuli zyeezyo zituulilwa mituni,+ kubulowa,+ kuzintu zisinidwe*+ alimwi akubwaamu.”*+
26 Mpoonya Paulo wakabatola baalumi aabo buzuba bwakatobela akulisalazya antoomwe ambabo kweelana amulawo,+ alimwi wakanjila mutempele kutegwa akaambilizye naakali kuyoomana mazuba aakulisalazya kweelana amulawo anocakeelede kuletwa cituuzyo caumwi aumwi wabo.
27 Lino mazuba aali ciloba naakali afwaafwi kumana, ba Juda bazwa ku Asiya nobakamubona mutempele, bakayunga nkamu yabantu yoonse, mpoonya bakamujata, 28 kaboongolola kuti: “Nobaalumi bamu Israyeli, amutugwasye! Ooyu ngomuntu uuyiisya bantu boonse koonse-koonse kusampaula bantu besu, Mulawo wesu, busena obuno. Alimwi ciinda kubija ncakuti waleta aba Giriki mutempele, aboobo wabusofwaazya busena obuno busalala.”+ 29 Bakaamba boobo akaambo kakuti musyule bakabwene Turofimo+ muna Efeso kali anguwe mumunzi, aboobo bakali kuyeeya kuti Paulo wakamuletede mutempele. 30 Munzi woonse wakanyonganizyigwa, aboobo bantu boonse bakaguumukila kutempele, bakajata Paulo akumukwelela anze lyatempele, mpoonya ndilyonya eelyo milyango yakajalwa. 31 Bantu nobakatiimujaye, makani akamusikila mweendelezi wankamu yabasikalumamba kuti kuli manyongwe mu Jerusalemu yoonse; 32 mpoonya-mpoonya wakabweza basikalumamba abasilutwe babasikalumamba akubalikila kulimbabo. Mbobakamubonena buyo mweendelezi wabasikalumamba antoomwe abasikalumamba, bakaleka kumuuma Paulo.
33 Mpoonya mweendelezi wabasikalumamba wakasika munsi lyakwe akumujata alimwi wakalailila kuti aangwe nketani zyobilo;+ amane wakatalika kubuzya naa wakali ni alimwi ancaakacitide. 34 Pele bamwi munkamu bakatalika koompolola kwaamba cintu cimwi, abambi cimbi. Aboobo, mbwaanga wakaalilwa kuzyiba masimpe aali woonse akaambo kamanyongwe, wakalailila kuti atolwe nkobakkala basikalumamba. 35 Pele naakasika amatantilo aaŋanda, wakatembwa buya abasikalumamba akaambo kabukali bwankamu yabantu, 36 nkaambo nkamu yabantu yakali kumutobela, kaboompolola kuti: “Aajaigwe!”
37 Nobakatiimunjizye mobakkala basikalumamba, Paulo wakabuzya mweendelezi wabasikalumamba kuti: “Sena inga wandizumizya kukwaambila cintu cimwi?” Wakamwaambila kuti: “Sena ulaambaula Chigiriki? 38 Aboobo sena toli muna Egepita uulya kumazuba aamusyule wakabusya manyongwe akusololela baalumi bajayi bali 4,000 kuunka munkanda?” 39 Mpoonya Paulo wakati: “Mebo ndili mu Juda+ waku Tarso+ mu Kilikiya, imuntu wamumunzi uulaampuwo. Aboobo ndakukomba, kondizumizya ndaambaule kubantu.” 40 Naakamuzumizya, Paulo kaimvwi aamatantilo aŋanda, wakatambika janza kubantu. Nobakaumuna, wakakanana kulimbabo mumwaambo wa Chihebrayo+ kati: