Isaya
2 Umwi aumwi uyooba mbuli busena bwakutijila muwo,*
Busena bwakuyusila* mvwula mpati yamuwo,
Uyooba mbuli tulonga twamaanzi mucisi cinyina maanzi,+
Mbuli cimvwule camwala mupati kapati munyika yacimpayuma.
3 Mpoonya meso aabaabo babona taakajalwi limbi pe,
Aalo matwi aabaabo bamvwa ayoomvwisya.
4 Myoyo yabaabo baingene iyooyeeyesya luzyibo,
Ayalo milaka yabantu bajisi kamaama iyookanana kabotu akwaamba zintu zimvwika.+
5 Mufwubafwuba takaambwi limbi kuti mwaabi,
Awalo muntu uutalomene takaambwi kuti ninkumekume;
6 Nkaambo mufwubafwuba uyakwaamba zintu zyabufwubafwuba,
Alimwi moyo wakwe uyookanza kucita zintu zibi,+
Kuti asumpule luleyo* akwaamba zyakuzangila Jehova,
Kutegwa muntu uufwide nzala abule cakulya
Akupa kuti ooyo uufwide nyota abule cakunywa.
7 Nzila zyamuntu uutalomene nzibi;+
Usumpula bukkale busesemya
Kutegwa anyonyoone muntu uupenzyegwa kwiinda mukwaamba zyakubeja,+
Nokuba kuti mucete waamba zyamasimpe.
8 Pele walo mwaabi ujisi makanze aakwaabila bamwi,
Alimwi ulazumanana kucita zintu zijatikizya bwaabi.*
9 “Nywebo nobamakaintu nomuliibide, amunyamuke, muswiilile jwi lyangu!
Nywebo nobana basimbi batakombeleli,+ amubikkile maano kuzintu nzyondaamba!
10 Kwainda mwaka omwe amazuba aali mbwaabede, nywebo nomutakombeleli muyookankama,
Nkaambo mulimo wakutebula misaansa waakumana, kunyina micelo iinooyobolwedwe.+
11 Amuyoowe nywebo nobamakaintu nomuliibide!
Amukankame, nywebo nomutakombeleli!
Amusamunune zisani musyaale mantanda,
Alimwi amusame zisani zyamasaka muzibuno zyanu.+
12 Amulyuume azyamba zyanu mulile
Akaambo kamyuunda iiyandwa kapati alimwi akaambo kamusaansa uuzyala micelo.
13 Nkaambo nyika yabantu bangu inoozwide buyo mamvwa amitubetube;
Ziyoovwumba maanda oonse aakulikondelezyela,
Inzya, imunzi uukkomene kapati.+
Ofeli+ antoomwe angazi yamulindizi zyaba buyo nyika iinyonyookede,
Busena busobanina mbongolo zyamusyokwe,
Imacelelo aamatanga,+
15 Kusikila mane tukatilwe muuya kuzwa kujulu,+
Alimwi nkanda ikabe muunda wazisamu zyamicelo,
Awalo muunda wazisamu zyamicelo ukabonwe mbuli syokwe.+
16 Mpoonya lubeta lululeme luyookkala munkanda,
Abwalo bululami buyookkala mumuunda wazisamu zyamicelo.+
17 Bululami bwini-bwini buyooleta luumuno,+
Alimwi micelo yabululami bwini-bwini iyooba luumuno akuliiba mane kukabe kutamani.+
18 Bantu bangu bayookkala mubusena bwaluumuno,
Mumakkalilo aakwabilidwe alimwi amumasena aakulyookezyela aaluumuno.+
19 Pele civwulamabwe ciyoowisya masamu oonse musyokwe,
Alimwi munzi uyookolomonwa akuba nyika iiyalene.