2 Timoteyo

3 Pele kozyiba kuti, kumazuba aamamanino+ kuyooba ziindi zikatazya ncobeni. 2 Nkaambo bantu bayooba basikuliyanda, bayandisya mali, basikulidunda, basikulisumpula, basikusampaula, batamvwidi bazyali, batalumbi, batasyomeki, 3 batajisi luyando lwakuzyalwa andulo, batanyoneki, basikubejelezya, batalilesyi, bakali, batayandi bubotu, 4 basikwaaba bamwi, batalaiki, basikulitukumuna, bayandisya zyakulikondelezya kwiinda kuyandisya Leza, 5 ibalibonya mbuli kuti balilyaabide mubukombi, pele nguzu+ zyambubo balazikazya; eelyo ibantu bali boobu kobatantamuka. 6 Kubantu bali boobo nkokuzwa baalumi ibaunka cabucenjezu mumaanda akweena bamakaintu ibatajisi nguzu alimwi ibalemenedwe zibi, ibeendelezyegwa azisusi ziindene-indene, 7 ibaiya lyoonse pele ibatakonzyi kuba aluzyibo lwini-lwini lwakasimpe.

8 Lino mbubonya Janesi a Jambure mbobakamukazya Musa, abalo aaba balazumanana kukazya kasimpe. Ibantu bali boobu balinyongene mumizeezo cakumaninina, tabeeleli makani aalusyomo. 9 Nokuba boobo, kunyina nkobaya pe, nkaambo bufwubafwuba bwabo buyoolibonya kubantu boonse, mbubonya mbobwakalibonya bufwubafwuba bwabaalumi bobilo aabo.+ 10 Pele yebo wakabikkila maano kapati kukuyiisya kwangu, kubukkale bwangu,+ kumakanze aangu, kulusyomo lwangu, kukukkazika moyo kwangu, kuluyando lwangu, kukuliyumya kwangu, 11 kukupenzyegwa alimwi akumapenzi aangu mbuli yaayo aakandicitikila ku Antiokeya,+ ku Ikoniyo,+ ku Lustro.+ Ndakaliyumya nindakali kupenzyegwa alimwi Mwami wakandivwuna mumapenzi aaya oonse.+ 12 Mubwini, boonse aabo bayanda kupona buumi bwakubelekela Leza cakulyaaba mukuyanzana a Kristo Jesu abalo bayoopenzyegwa.+ 13 Pele bantu babyaabi abasilweeno bayoobija akubijila limwi, banikweena bamwi alimwi akweenwa lwabo beni.+

14 Pele yebo, kozumanana kuzitobela zintu nzyookayiisyigwa alimwi nzyookagwasyigwa kusyoma+ camoyo woonse, nkaambo ulibazyi aabo ibakakuyiisya nzizyo 15 akuti kuzwa kubuvwanda+ ulaazyi malembe aasalala,+ aayo aakonzya kukupa kuti ube musongo kutegwa ukafwutuke kwiinda mulusyomo muli Kristo Jesu.+ 16 Magwalo oonse akasololelwa a Leza+ alimwi alagwasya mukuyiisya,+ mukusinsa, mukululamika zintu, mukulaya cabululami,+ 17 kutegwa muntu wa Leza ayelele ncobeni, kalibambilide cakumaninina kubeleka mulimo mubotu uuli woonse.