Marko
7 Lino ba Farisi abalembi bamwi ibakazwa ku Jerusalemu bakamubunganina.+ 2 Eelyo bakabona basikwiiya bakwe bamwi kabalya cakulya amaanza aasofweede, nkokuti kabatasambide kumaanza.* 3 (Nkaambo ba Farisi aba Juda tabalyi ccita kuti basamba kumaanza kusika kutukokola, kuccilila tunsiyansiya twabasikale, 4 alimwi bazwa kumusika tabalyi ccita kuti basamba. Kuli atumwi tunsiyansiya tunji ntobakatambula alimwi ntobakakatila, mbuli kunyika nkapu, nongo azibelesyo zyamukuba mumaanzi.)+ 5 Aboobo ba Farisi abalembi aaba bakamubuzya kuti: “Ino nkaambo nzi basikwiiya bako ncobataccilili tunsiyansiya twabasikale, mukuti balalya cakulya amaanza aasofweede?”+ 6 Wakabaingula kuti: “Nobasikuupaupa ameso, Isaya wakaliluzi naakasinsima kwaamba ndinywe mbuli mbokulembedwe kuti, ‘Aaba bantu balandilemeka amilomo yabo, pele myoyo yabo ili kule andime.+ 7 Kundikomba kwabo nkwabuyo, nkaambo bayiisya milawo yabantu kuba njiisyo zya Leza.’+ 8 Musiya mulawo wa Leza akuccilila tunsiyansiya twabantu.”+
9 Alimwi wakabaambila kuti: “Cabucenjezu mubikka ambali mulawo wa Leza kutegwa muzumanane atunsiyansiya twanu.+ 10 Mucikozyanyo, Musa wakaamba kuti, ‘Lemeka bauso abanyoko,’+ alimwi akuti, ‘Ooyo uusampaula* bausyi naa banyina ajaigwe.’+ 11 Pele nywebo mwaamba kuti: ‘Kuti muntu waambila bausyi naa banyina kuti: “Kufwumbwa ncendijisi icikonzya kumugwasya ngukkobbani (nkokuti, cipego caabidwe kuli Leza),”’ 12 nywebo tamucimuzumizyi kucitila bausyi naa banyina+ mulimo uuli woonse. 13 Aboobo mupa kuti jwi lya Leza libe lyabuyo akaambo katunsiyansiya twanu ntomwakasiilwa.+ Alimwi mucita zintu zinji zili boobu.”+ 14 Aboobo naakaita nkamu yabantu alimwi, wakabaambila kuti: “Amundiswiilile nywebo nyoonse, alimwi mumvwisye ncezyaamba zintu eezyi.+ 15 Taakwe cintu cilaanze lyamuntu icinjila mulinguwe cikonzya kumusofwaazya; pele zintu zizwa mumuntu nzyezintu zimusofwaazya.”+ 16 *—
17 Lino naakasiya nkamu yabantu akunjila muŋanda, basikwiiya bakwe bakatalika kumubuzya makani aajatikizya cikozyanyo eeci.+ 18 Aboobo wakababuzya kuti: “Sena andinywe tamumvwisyi mbuli mbabo? Sena tamuzyi kuti taakwe cilaanze icinjila mumuntu cikonzya kumusofwaazya, 19 mbwaanga cilanjila ikutali mumoyo wakwe, pele mwida kusikila limwi cazwa anze?” Eelyo mukwaamba boobo wakacisalazya kuti zyakulya zyoonse zilasalala. 20 Alimwi wakati: “Eeco cizwa mumuntu ncecisofwaazya muntu.+ 21 Nkaambo mukati, mumoyo wamuntu,+ momuzwa mizeezo mibi, bwaamu,* bubbi, bujayi, 22 bumambe, busyaacivwulemwangu, bubi, lweeno, bukkale busesemya,* munyono, kusampaula, kulisumpula alimwi abufwubafwuba. 23 Zintu zyoonse eezyi zibi zizwa mukati alimwi zilamusofwaazya muntu.”
24 Kumane wakanyamuka akutozya kumasena aali mucooko ca Turo a Sidoni.+ Ooko wakanjila muŋanda imwi alimwi tanaakali kuyanda kuti kube muntu uuzyiba, pele bantu bakazyiba. 25 Mpoonya aawo mukaintu iwakajisi mwana musimbi iwakanjidwe muuya uusofweede wakamvwa kuti nkwali, eelyo wakaboola akumufwugamina kumaulu.+ 26 Mukaintu ooyo wakali mu Giriki, sicisi* waku Fonike yaku Siriya; eelyo wakaluujisi kumulomba kuti alitande daimona ilyakali mumwanaakwe. 27 Pele wakamwaambila kuti: “Koleka bana bakkute saansi, nkaambo tacili cibotu kubweza cinkwa cabana akuciwaalila tubwa.”+ 28 Pele mukaintu wakamuvwiila kuti: “Inzya mwami, pele notuba tubwa tuli mujungusi aatebulu tulalya bufwefwelenga buloka nobalya bana.” 29 Kumane Jesu wakamwaambila kuti: “Akaambo kakuti waamba boobo, koya; idaimona lyazwa mumwanaako musimbi.”+ 30 Aboobo wakaunka nkwazwa akujana kuti mwana ulilede abulo alimwi daimona lyakalizwide.+
31 Jesu naakajoka kuzwa kucooko ca Turo, wakainda mu Sidoni kuya ku Lwizi lwa Galilaya akwiinda mucooko ca Dekapole.*+ 32 Ooku bakamuletela musinkematwi iwakali sikamaama,+ mpoonya bakamukombelezya kuti abikke maanza alinguwe. 33 Eelyo wakamutola ambali kuzwa munkamu. Mpoonya wakanjizya minwe yakwe mumatwi aamuntu ooyu, eelyo amane kuswida mate, wakamujata amulaka.+ 34 Mpoonya naakalanga kujulu, wakaswa ciya akumwaambila kuti: “Efatha,” nkokuti “Sinkuka.” 35 Eelyo matwi aakwe akasinkuka,+ alimwi eeco cakaangide mulaka wakwe cakaangululwa, mpoonya wakatalika kwaambaula kabotu. 36 Kumane boobo wakabalailila kuti bataambili muntu uuli woonse,+ pele naakali kubalailila boobo, balo bakali kwiindilizya buya kwaambilizya makani aayo.+ 37 Masimpe bakagambwa kapati,+ eelyo bakati: “Wazicita kabotu zintu zyoonse. Basinkematwi ulabasinkula abasyaataambi ulabapa kwaambaula.”+