Isaya
2 Nceeci ncaakabona Isaya mwana wa Amozi kujatikizya Juda a Jerusalemu:+
Cilundu caŋanda ya Jehova
Ciyakwiimikwa nji kwiindilila atala eeni aamalundu,+
Alimwi ciyoosumpulwa kwiinda tulundu-lundu toonse,
Eelyo masi oonse ayoowuumukila kulincico.+
3 Alimwi bantu bamisyobo minji bayakweenda akwaamba kuti:
“Amuboole, atweende tutante cilundu ca Jehova,
Kuŋanda ya Leza wa Jakobo.+
Walo uyootuyiisya nzila zyakwe,
Eelyo tuyakweenda munzila zyakwe.”+
Bayoofwula mapanga aabo kuba maamba aakulimya
Amasumo aabo kuba zyakukwezuzya zisamu.+
Cisi tacikanyamuni panga kulwana cisinyina,
Alimwi tabakaiyi limbi nkondo pe.+
6 Nkaambo yebo wabatantamuka bantu bako, iŋanda ya Jakobo,+
Akaambo kakuti balivwuzizya zintu zizwa Kujwe;
Bacita masalamuzi+ mbuli ba Filisiti,
Alimwi bajisi bana banji babamuzwakule.
7 Cisi cabo cizwide nsiliva angolida,
Alimwi lubono lwabo talukonzyi kubalwa.
Cisi cabo cizwide mabbiza,
Alimwi nkalaki zyabo tazikonzyi kubalwa.+
8 Cisi cabo cizwide baleza banyina mulimo.+
Bakotamina milimo yamaanza aabo beni,
Zintu zyakapangwa aminwe yabo beni.
9 Aboobo muntu ulakotama, alimwi ulalifwiinsya,
Eelyo yebo tokonzyi kubajatila pe.
10 Njila mumandomba akuyuba mulusuko
Akaambo kakuyoosya kwa Jehova
Alimwi akaambo kabulemu bwakwe bupati kapati.+
Jehova alikke nguuyoosumpulwa mubuzuba oobo.
12 Nkaambo oobo mbuzuba bwa Jehova wamakamu.+
Buyoosikila muntu woonse uulitukumuna akulisumpula,
Amuntu uuli woonse uusumpukide naa uutasumpukide,+
13 Buyoosikila masamu aakkedari oonse malamfwu alimwi aasumpukide aaku Lebano
Alimwi amasamu mapati oonse aaku Basani,
14 Buyoosikila malundu malamfwu oonse
Atulundu-lundu toonse tusumpukide,
15 Buyoosikila ngazi zyoonse zilamfwu alimwi amalambo oonse mayumu,
16 Buyoosikila mato mapati oonse aaku Tarisi+
Alimwi amato oonse mayandisi.
17 Bantu balitukumuna bayoofwiinsyigwa,
Alimwi bantu balimvwa bayoovwuntama ansi.*
Jehova alikke nguuyoosumpulwa mubuzuba oobo.
18 Baleza banyina mulimo bayoomaninina.+
19 Alimwi bantu bayoonjila mumampangala aamandomba
Amumalyango aansi,+
Akaambo kakuyoosya kwa Jehova
Alimwi akaambo kabulemu bwakwe bupati kapati,+
Aakunyamuka akupa kuti nyika izuzume akaambo kakuyoowa.
20 Mubuzuba oobo bantu bayoobweza baleza babo babuyo ibansiliva abangolida
Mbobakalipangilide kuti kababakotamina
Akubasowela kumbeba akutumpaafwa,*+
21 Kutegwa banjile mumalyango aamumandomba
Amuŋanzi zyamyala,
Akaambo kakuyoosya kwa Jehova
Alimwi akaambo kabulemu bwakwe bupati kapati,
Aakunyamuka akupa kuti nyika izuzume akaambo kakuyoowa.
22 Kutegwa mulivwune, amuleke kusyoma muntu buyo,
Ooyo uuli muya buyo mumpemo zyakwe.*
Nkaambo nzi walo ncayelede kubikkilwa maano?